Read Batak Toba PANURIRANG JESAYA 48 Bible Online

PANURIRANG JESAYA 48 - Batak Toba bible

PANURIRANG JESAYA 48

¹I. [1] Tangihon ma on, ho ale pinompar ni si Jakkob, angka na marpanggoarhon Israel, jala marharoroan sian * mual ni Juda, angka na + marmangmang tu goar ni Jahowa, jala angka na papujipuji Debata ni Israel, alai ndang di bagasan hasintongan manang hatigoran. [474†]

²Ai marpanggoarhon huta na badia i do nian nasida, jala marpangunsandean nian di Debata ni Israel, Jahowa Zebaot do goarna.

³Angka na masa parjolo i nunga tibu hian hupalumba, jala sian pamanganku do i ruar, jala hupatubegehon tu nasida. Tompu do i hubahen gabe saut ro. [475†]

⁴Ala naung huboto hian * na jogal do ho marroha jala marurat bosi tangkuhukmu, jala tombaga pardompahanmu. [476†]

⁵Dibahen i hupalumba hian tu ho sian na robi: Tagan so ro dope nunga hupatubegehon hian tu ho, asa unang tardok ho; ajiajianku do na mambaheni jala ganaganaan na huuhir dohot na hutompa do na mandokkoni.

⁶Nunga dibege ho hian, parateatehon ma saluhutna i. Beha ia hamu nda hatindangkononmu sintongna? Nunga hupatubegehon tu ho olat ni on angka na imbaru dohot angka na simuk, na so binotom na sai laon.

⁷Nuaeng pe tartompa nasida, ndada nahinan, jala di jolo ni ari parbinegeanmu, asa unang tardok ho: Ida ma, nunga huboto hian.

⁸Ndang dung dibege manang diboto ho hian, manang tarbortik tu pinggolmu uju i; ai huboto do simeoleol situtu ho, jala pangalaosi do ho targoar sian bortian ni inangmu.

⁹Ala ni goarhu sambing umbahen hupalambat rimashu, jala ala ni hamuliaonku hupaombun ahu mangolani ho umbahen so siap ho hubahen. [477†]

¹⁰Ida ma, nunga hupapita ho, alai ndada songon perak; ingkon di bagasan pamurunan ni pardangolan ahu manguji ho. [478†]

¹¹Ala ni ahu, ala ni goarhu tutu nunga hubahen songon i, ai tung beha ma pangaramunna disi? Jala * ndang lehononku hamuliaonku tu na asing. [479†] II.

¹²Tangihon ma ahu, ale Jakkob, dohot ho ale Israel naung hujou! Sai * tongtong do ahu, + ahu do parjolo, ahu do huhut parpudi! [480†]

¹³Tanganku do huhut naung paojak tano on, jala siamunhu paherbang angka langit. Joujou do ahu di nasida, mamintor rap jongjong do. [481†]

¹⁴Marluhut ma hamu sudena jala tangihon hamu! Tung ise ma sian nasida paboahon angka sisongon i? Jahowa do mangkaholongi * ibana; bahenonna ma lomo ni rohana tu Babel, jala tanganna mangalo halak Kasdim. [482†]

¹⁵Ahu, ahu ma tutu naung mandok i; ahu huhut manjou ibana; ahu parohon ibana, jadi ingkon tulus dalanna i.

¹⁶Ro ma hamu jumonok tu ahu, tangihon hamu ma on! Sian mulamula dope * ndang dung hudok di sihabunian. Olat ni tingki hajadianna, nunga disi hian ahu; alai anggo nuaeng + disuru Tuhan Jahowa dohot Tondina i ahu. [483†]

¹⁷Songon on do hata ni Jahowa sipalua ho, na badia ni Israel: Ahu do Jahowa Debatam, na mangajarhon tu ho bahen hatuaonmu, na manogu ho di dalan sidalananmu.

¹⁸* Aut na diradoti roham angka patikki, jala doshon batang aek hasonanganmu, jala hatigoranmu doshon galumbang ni laut. [484†]

¹⁹Jala doshon horsik di topi laut pinomparmu toropna, jala angka tubum songon rihit di topi ni batang aek; ndang tagamon ripur manang mago goarna maradophon ahu. [485†] III.

²⁰* Ruar ma hamu sian Babel, maporus ma hamu sian Kasdim! Marsoara olopolop ma hamu paboahon, patubegehon hata i! Pasar hamu ma i ro di ujung ni tano on, dok hamu ma: Nunga dipalua Jahowa naposona si Jakkob. [486†]

²¹Jadi ndang mauas nasida di angka halongonan, uju i tinogihonna i nasida; mabaor do aek sian dolok batu di nasida dibahen ibana jala dibolahon batu i gabe mabaor aek sian bagasan. [487†]

²²Alai anggo di halak parjahat ndang adong hasonangan, ninna Jahowa. [488†]