Read Batak Toba PANURIRANG JESAYA 58 Bible Online

PANURIRANG JESAYA 58 - Batak Toba bible

PANURIRANG JESAYA 58

¹I. [1] Mangasa gogo ma ho joujou, unang paontok! Pangiar ma soaram songon sarune jala pabotohon tu * bangsongku pangalaosionnasida dohot tu pinompar ni si Jakkob dosanasida i. [606†]

²Sai dilului nasida do ahu nian ariari, jala dihalomohon parbinotoan di angka dalanku, hira bangso na mangulahon hatigoran, jala na so dung tumadingkon uhum ni Debatana, lam dipangido nasida muse sian ahu angka * uhum hatigoran, jala dihalomohon hajojonok ni Debata. [607†]

³Ninna do: Boasa tung marpuasa hami, hape ndang diida ho? Hupasipal hami dagingnami, hape ndang dipardulihon roham? Ida ma di ari parpuasaonmuna, apala disi ma disubut hamu rohamu, jala disosaksosak hamu do pangulamuna.

⁴Ida ma, marpuasa pe hamu asa mambahen bada dohot parsalisian huhut mamastapi mangasahon gostong ni botohon. Unang datdati hamu marpuasa songon nuaeng, ai ndang tarbahen sahat soaramuna tu banua ginjang.

⁵Tung * parpuasaon na tarhalomohon ahu ma i, sadari dionsit jolma i rohana, dipatungki uluna songon arung, marpeahan di hori dohot di sirabun? Tung parpuasaon ma i goaron, jala ari lomo ni roha ni Jahowa? [608†] II.

⁶Nda on do parpuasaon na huhalomohon: Harhari angka ihotihot ni hajahaton, palua angka tali ni auga; jala palua halak na nirupa, jala ropuhi nasa auga?

⁷Nda on do, molo * diponggoli ho rotim tu halak na male, jala ditogihon ho tu jabum halak na dangol dohot panangkarnangkar? Molo diida ho halak na marsaemara, gabe diabiti ho ibana, jala ndang martabuni ho maradophon sibukmu. [609†]

⁸Jadi tompu ma * binsar hatiuronmu songon buha siang ari, jala hatop martumbur hahisaronmu, jala mardalan di jolom + hatigoranmu, hamuliaon ni Jahowa manimpuli sian pudim. [610†]

⁹Dung i * joujou ma ho, jadi alusan ni Jahowa ma ho; molo angguhangguk ho, gabe dohononna ma: Ida ma, dison do ahu! Molo dipaholang ho sian tongatongam pangarupaon, tudutudu ni jarijari dohot pangkuling hajahaton. [611†]

¹⁰Jala dilehon ho asi ni roham tu na male, jala dipasabam ho roha ni na dangol, jadi binsar ma hatiuronmu di bagasan haholomon, jala hagolaponmu tudoshon hos ni ari.

¹¹Jadi sai tongtong ma togutoguon ni Jahowa ho jala pasabamonna roham di angka inganan na rahar, jala papironna holiholim, gabe tudoshon * porlak na siniram do ho, jala songon mual, na so dung marsik. [612†]

¹²Jadi paulion ni angka anakmu ma angka pasipasi sian narobi, patindangonmu ma angka ojahan marsundutsundut, jala goaron ni halak ma ho: Sipauli angka riga, sitotas angka dalan balobung asa hainganan. [613†]

¹³Molo tung ditait ho patmu sian * ari Sabbat mangulahon lomo ni roham di ari habadiaonku, jala digoar ho ari Sabbat: Ari hasoloan, marmulia di angka jolma na badia ni Jahowa; jala dipasangap ho ibana, unang diulahon ho angka dalanmu, unang diihutihut ho lomo ni roham manang marhata rari. [614†]

¹⁴Jadi marlas ni roha ma ho mida Jahowa, jala * ahu manogunogu ho di atas ni angka buntulbuntul ni tano on, jala parmudumuduonku ma ho marhitehite parjambaran ni Jakkob ompumuna i, ai pamangan ni Jahowa do mandok songon i. [615†]