Read Batak Toba PANURIRANG JESAYA 7 Bible Online

PANURIRANG JESAYA 7 - Batak Toba bible

PANURIRANG JESAYA 7

¹I. [1] Dung i masa ma di angka ari ni si Ahas, anak ni si Jotam, anak ni si Usia, raja ni Juda, * nangkok ma si Resin, raja sian Ram dohot si Peka, anak ni si Remalia, raja sian Israel, tu Jerusalem naeng marmusu dompak huta i, alai ndang tarpapatusa. [71†]

²Jadi dung tarbortik barita i tu pinompar ni si Daud: Nunga marsaro halak Ram di Epraim! Jadi bukbak ma roha ni rajai dohot roha ni bangsona, songon hau di tombak angka na humutur binahen ni alogo.

³Dung i ninna Jahowa ma tu si Jesaya: Ruar ma ho manjumpangkon si Ahas, ho dohot si Sear-Jasub anakmu, tu ujung ni pamalian aek ni ambar parjolo, tu dalan ni hauma paninaron. [72†]

⁴Jala dok tu ibana: Dungo ho, jala * sonang! Unang ho mabiar, jala unang biahaton roham maradophon tampahan ni na dua tulbu na martimus on, i ma parpiar ni muruk ni si Resin dohot halak Ram, nang anak ni si Remalia. [73†]

⁵Ala na jat sangkap ni halak Ram, Epraim dohot anak ni si Remalia dompak ho songon on:

⁶Nangkok ma hita dompak Juda, asa itagunturi, jala mangalaum tu hita, jala tapabangkit anak ni si Tabeel bahen raja di tongatonganasida.

⁷Dibahen i songon on do hata ni Tuhan Jahowa: Na so tupa do i tulus manang masa!

⁸Ai sabungan ni Ram do ia Damaskus, jala pandapotan ni Damaskus do si Resin; jala di bagasan onompulu lima taon on dope ingkon siap Epraim, ndang be masuk bangso etongon. [74†]

⁹Jala sabungan ni Epraim do Samaria, jala pandapotan ni Samaria do anak ni si Remalia. * Molo so porsea hamu, ndang tagamon hot hamu. [75†] II.

¹⁰Angkup ni didok Jahowa ma mandok si Ahas, songon on:

¹¹Pangido sada tanda di ho sian Jahowa Debatam, pangido sian banua toru, manang sian banua ginjang sahali.

¹²Jadi ninna si Ahas ma: Ndang olo ahu mangido, asa unang huunjuni Jahowa.

¹³Jadi ninna si Jesaya ma: Ua tangihon hamu ma, ale pinompar ni si Daud! Ndang dope sae hamu pauruuruhon jolma, dohot do Debatangku naeng lojaanmuna.

¹⁴Dibahen i apala Tuhan i sandiri ma mangalehon sada * tanda di hamu: ** Ida ma, gabegabean ma sada namarbaju, jala tumubuhon sada anak, jala bahenonna ma goarna: + Immanuel. [76†]

¹⁵Mantega dohot situak ni loba panganonna, paima diboto mambolongkon na jat, jala mamillit na denggan. [77†]

¹⁶Ai * tagan so diboto dakdanak i dope mambolongkon na jat, jala mamillit na denggan, + tarulang ma tano i na nirajaan ni na dua raja hinabiaranmu i. [78†] III.

¹⁷Paroon ni Jahowa ma tu ho dohot tu bangsom dohot tu pinompar ni amam angka ari na so dung ro, olat ni ari hababali ni Epraim sian Juda, * bahenon ni raja ni Assur. [79†]

¹⁸Ai masa ma di ari na sasada i, paheheon ni Jahowa ma lanok angka na di ujung ni angka sunge ni Misir dohot loba angka na di tano Assur. [80†]

¹⁹Jadi ro be ma nasida jala songgop saluhutna tu angka sunge dohot tu angka rura dohot tu angka liang ni dolok batu dohot tu sude angka tadatada, ro di sude angka panjampalan.

²⁰Di ari na sasada i gorbangon ni Tuhan i ma marhitehite raut parnabung na sineoana di bariba ni batang aek i ma marhitehite raja ni Assur, obuk ni ulu dohot imbulu ni pat ro di sandok mise.

²¹Di ari na sasada i paodongon ni sada baoa ma sada anak ni lombu dohot dua birubiru.

²²Jadi bahenonna ma sian susu na godang i mantega panganonna: Ai mangan mantega dohot situak ni loba nasa na tading di parsitongaan ni tano i.

²³Ai masa ma di ari na sasada i: Nasa hajongjongan ni saribu kambona hau anggur najolo na mararga saribu rupia, gabe hatubuan ni duriduri dohot sihupi muse.

²⁴Ingkon marsumbia jala marsior iba laho tusi, ai duriduri jala sihupi nama masa di sandok tano i.

²⁵Jala saluhut dolok, angka pangguan najolo, ndang be tartopot sian biar mida angka duriduri dohot sihupi, bahen jampalan ni angka lombu nama, jala luntahan ni angka birubiru.