Read Batak Toba 3 MUSA 1 Bible Online

3 MUSA 1 - Batak Toba bible

3 MUSA 1

¹I. [1] Dung i dijou Jahowa ma si Musa jala ro ma hata ni Jahowa tu ibana sian undungundung parluhutan i songon on:

²Paboa ma tu halak Israel jala dok ma tu nasida: Tung sura adong sada jolma sian hamu na naeng mamelehon sada pelean tu Jahowa, ingkon sian pinahan do, sian lombu manang sian birubiru pelehononmuna peleanmuna i.

³Tung sura sada pelean situtungon naeng pelehononna sian lombu, ingkon jonggi na so marlindang pelehononna, ingkon boanonna do i sahat tu pintu ni undungundung parluhutan i, asa jumpangan asi ni roha ibana di adopan ni Jahowa. [1†]

⁴Dung i ampehononna ma tanganna tu ulu ni pelean situtungon i, asa dapotan asi ni roha ibana bahen pardengganan di ibana. [2†]

⁵Dung i potongonna ma lombu naposo i di adopan ni Jahowa; jala ingkon boanon ni angka malim, angka anak ni Aron ma mudar i jala pispishononna mudar i tu langgatan i humaliang, na di jolo ni pintu ni undungundung parluhutan i.

⁶Dung i bobakanna ma pelean situtungon i, laos disahei ma i marponggolponggol.

⁷Dung i mangopan api ma angka anak ni malim Aron di atas langgatan i, jala diampehon soban tu atas api i.

⁸Dung i ingkon jojor ampehonon ni angka anak ni Aron, angka malim i ma angka ponggolponggolna, uluna dohot pultahanna tu atas soban dohot api na di atas ni langgatan i.

⁹Alai anggo raoanna dohot bitisna ingkon burianna di bagasan aek, dung i tutungon ni malim i ma saluhutna i di atas langgatan i bahen pelean situtungon, bahen pelean api, bahen uap na hushus di Jahowa. [3†] II.

¹⁰Tung sura naeng pelehononna sada pelean situtungon sian pinahan na metmet, sian anak ni birubiru manang sian hambing, ingkon tunggal na so martihas do pelehononna.

¹¹Ingkon potongonna do i di adopan ni Jahowa, di lambung ni langgatan tungkan utara; jala ingkon pispishonon ni angka anak ni si Aron, angka malim i ma mudarna tu langgatan i humaliang.

¹²Dung i ingkon saheanna do i marponggolponggol jala sirangonna uluna dohot pultahanna, jala ingkon jojor do i ampehonon ni malim tu atas soban dohot api na di atas ni langgatan i.

¹³Alai anggo raoanna dohot bitisna ingkon burianna di bagasan aek, dung i ingkon pelehonon ni malim saluhutna i jala tutungonna di atas langgatan bahen pelean situtungon, i ma pelean api, uap na hushus di Jahowa. III.

¹⁴Alai tung sura naeng pelehononna sada pelean situtungon di Jahowa sian pidong, ingkon pelehononna do i sian anduhur tabu manang sian anak ni darapati.

¹⁵Ingkon boanon ni malim do i tu langgatan i, jala pulosonna uluna laos tutungonna do i di atas langgatan i jala patirisonna mudarna tu dorpi ni langgatan i.

¹⁶Alai padaoonna do anggo buriranna, imputna jala timpalhononna do i tu lambung ni langgatan tungkan habinsaran, tu partangkalan i.

¹⁷Dung i saheonna ma i di pamungkurina, alai ndang jadi ponggolhononna, dung i tutungon ni malim ma i di atas langgatan tu hau na di atas api bahen pelean situtungon, i ma pelean api, uap na hushus di Jahowa.