Read Batak Toba 3 MUSA 11 Bible Online

3 MUSA 11 - Batak Toba bible

3 MUSA 11

¹I. [1] Dung i ro muse hata ni Jahowa tu si Musa dohot tu si Aron, didok ma tu nasida:

²Dok hamu ma tu halak Israel songon on: On do pinahan angka na jadi panganonmuna sian saluhut pinahan angka na di atas tano on. [70†]

³Nasa pinahan na martambirik jala bola dua tambirikna i huhut marngalu, i ma na jadi panganonmuna.

⁴Alai ndang jadi panganonmuna sian angka na marngalu sambing dohot sian angka na marbola tambirikna sambing, songon: Unto, ai marngalu do i nian, alai ndang marbola anggo tambirikna, dibahen i ingkon ramun do i di hamu.

⁵Tole muse landuk, ai marngalu do i nian, alai ndang marbola anggo tambirikna, dibahen i ingkon ramun do i di hamu.

⁶Tole muse ampodi, ai marngalu do i nian, alai ndang marbola anggo tambirikna, dibahen i ingkon ramun do i di hamu.

⁷Tole muse babi, ai marbola do nian anggo tambirikna, alai ndang marngalu, dibahen i ingkon ramun do i di hamu.

⁸Ndang jadi hamu manganhon sian sibukna, bangkena pe ndang jadi jamaonmuna, ai ramun do i di hamu.

⁹Angka on do na jadi panganonmuna sian saluhut angka na di bagasan aek: Nasa na marhapihapi jala na marsisik di bagasan aek, di bagasan laut dohot di bagasan angka sunge, i ma na jadi panganonmuna.

¹⁰Alai nasa na so marhapihapi jala na so marsisik di bagasan laut manang di bagasan sunge, sian saluhut na manginsir di bagasan aek dohot sian saluhut na mangolu di bagasan aek i ingkon hagigian do i di hamu.

¹¹Ingkon hagigian do i tutu di hamu; ndang jadi hamu manganhon sian sibukna, ingkon marbiasbias hamu mida bangkena i.

¹²Saluhut tahe na so marhapihapi jala na so marsisik di bagasan aek, ingkon hagigian do i di hamu.

¹³Ingkon marbiasbias rohamuna mida angka pidong on, ndang jadi panganonmuna, ai hagigian do i, songon: Pidong raja wali, lali bangar, honong bosi.

¹⁴Tole lali lopak dohot lali lapuk ro di mansammansamna.

¹⁵Tole muse pidong sigak ro di mansammansamna.

¹⁶Tole muse pidong unto, langkupa, sihungkung, lali piuan ro di mansammansamna.

¹⁷Tole muse sipauk, soro aek dohot ampapaluan.

¹⁸Tole muse situbiak, onggang dohot silogologo.

¹⁹Tole muse siboru tasik, sibarung ro di mansammansamna, nang lompong dohot ariparip.

²⁰Nasa na manjirir sian angka na marhabong na mardalan maropat pat, ingkon hagigian do i di hamu.

²¹Alai na jadi do panganonmuna angka on sian saluhut na manjirir na marhabong, na mardalan maropat pat, i ma angka na marhaehae di atas ni patna, angka na pinangkena manimbungnimbung di atas tano i.

²²Angka on do na jadi panganonmuna sian i: Nasa mansam sihapor, i ma hapor gundong, hapor suhat dohot hapor hole ro di mansammansamna be.

²³Alai nasa na manjirir na asing sian angka na marhabong, na maropat pat, ingkon hagigian do i di hamu.

²⁴Ingkon gabe ramun do hamu bahenon ni; manang ise na manjama bangkena i, ingkon ramun do ibana sahat ro di bodari. [71†]

²⁵Jala manang ise na mangusung sian bangkena i, ingkon sunsionna pangkeanna, jala ingkon ramun ibana sahat ro di bodari.

²⁶Dibahen i nasa pinahan na marbola tambirikna, alai ndang bola dua tambirikna i jala ndang marngalu, ingkon ramun do i di hamu; manang ise na manjama angka i, ingkon ramun ibana.

²⁷Jala saluhut na mangojakkon tanganna mardalan sian nasa binatang na maropat pat i mardalan, ingkon ramun do di hamu; manang ise na manjama bangkena i, ingkon ramun do i sahat ro di bodari.

²⁸Jala manang ise na mangusung bangkena i, ingkon sunsionna do pangkeanna, jala ingkon ramun ibana sahat ro di bodari: Luhutna i ingkon ramun do i di hamu. II.

²⁹Nang angka on, sian na manjirir di atas tano on, ingkon ramun do i di hamu songon: Padidit, bagudung dohot boraspati ro di mansammansamna.

³⁰Tole mindoran, robar, ilik, pelang dohot sirajaodong.

³¹Angka i ma na ramun di hamu sian saluhut na manjirir; manang ise na manjama angka i dung mate, ingkon ramun ibana sahat ro di bodari.

³²Jala saluhut na tininggang ni bangkena i, ingkon ramun do i, nang saluhut ulaula sian hau, manang pangkean, manang hulingkuling manang tangki pe; saluhut ulaula tahe angka na pinangke tu ulaonna, ingkon rondamon do i tu aek, jala ingkon ramun do i sahat ro di bodari; dung i ias do i muse.

³³Nasa ulaula sian tano liat, tung sura madabu tu bagasanna sian angka bangke i, saluhut isina i ingkon ramun do i, jala ingkon taporon do ulaula i.

³⁴Nasa panganon, angka na pinangan, tung sura saor aek sisongon i tusi, ingkon ramun do i; jala saluhut siinumon na niinum sian nasa ulaula sisongon i, ingkon ramun do i.

³⁵Angkup ni nasa tininggang ni bangke sisongon i, ingkon ramun do i, nang tataring, nang hudon, ingkon bolahononhon do, ai na ramun do i, ingkon ramun do i nang di hamu.

³⁶Alai anggo pansur manang sumur manang tobat, ingkon pansing do i; alai tahe manang ise na manjama bangke na disi, ingkon ramun do i di ibana.

³⁷Tung sura madabu bangke sisongon i tu boni marragamragam, na naeng saburhononhon, tong do ias anggo i.

³⁸Alai tung sura dibahen aek tu boni i, hape madabu muse bangke sisongon i tusi, ingkon ramun do i di hamu.

³⁹Tung sura mate garam sian pinahan na jadi panganonmuna hian nian, manang ise na manjama bangkena, ingkon ramun do ibana sahat ro di bodari.

⁴⁰Angkup ni manang ise na manganhon sian bangkena i, ingkon sunsionna do pangkeanna, jala ingkon ramun do ibana sahat ro di bodari; suang songon i do manang ise na mamboan bangkena i, ingkon sunsionna pangkeanna, jala ingkon ramun ibana sahat ro di bodari. [72†]

⁴¹Jala saluhut gulokgulok na manginsir di atas tano i, ingkon hagigian do i, ndang jadi panganon!

⁴²Saluhut tahe na manginsir marhite sian butuhana, tole saluhut na manjurur na maropat pat ro di saluhut sitorop pat, nang saluhut gulokgulok na manginsir di atas tano i. Ndang jadi panganonmuna, ai hagigian do i.

⁴³Unang gabe hagigian dirimuna marhite sian saluhut gulokgulok na manginsir, jala unang gabe ramun dirimuna bahenon ni, asa unang gabe marlindang hamu bahenon ni.

⁴⁴Ai Ahu do Jahowa, Debatamuna i; dibahen i ingkon parbadiaanmuna dirimuna, asa gabe angka na badia hamu, ai na badia do Ahu. Dibahen i ndang jadi ramunanmuna dirimuna i marhite sian saluhut gulokgulok na manginsir di atas tano i. [73†]

⁴⁵Ai Ahu do Jahowa, naung manogihon hamu ruar sian tano Misir, asa Ahu gabe Debatamuna; dibahen i ingkon gabe angka na badia do hamu, ai na badia do Ahu. [74†]

⁴⁶I ma patik taringot tu pinahan, taringot tu angka pidong dohot taringot tu saluhut na mangolu, na manginsir di bagasan aek ro di sude na mangolu, na manjirir di atas tano i.

⁴⁷Asa tung diboto hamu parsirang ni na ramun sian na pansing, dohot parsirang ni pinahan na jadi panganon sian pinahan na so jadi panganon.