Read Batak Toba 3 MUSA 12 Bible Online

3 MUSA 12 - Batak Toba bible

3 MUSA 12

¹Dung i ro ma hata ni Jahowa tu si Musa songon on:

²Hatahon ma tu halak Israel songon on: Molo gabegabean sada parompuan jala ditubuhon sada anak, ingkon ramun ibana pitu ari lelengna, suang songon di ari haramunon ni hasomalanna hian, ingkon ramun ibana. [75†]

³Tole paualuarihon ingkon sunaton do sibuk ni hulup ni dakdanak i. [76†]

⁴Alai anggo parompuan i ingkon tinggal dope di jabu tolupulu tolu ari lelengna pasalpu mudar pangiasanna; ndang jadi jamaonna manang aha na badia, jala ndang jadi masuk ibana tu bagasan inganan na badia i, paima salpu angka ari haramunonna.

⁵Alai tung sura boruboru tinubuhonna i, ingkon dua minggu lelengna ibana ramun, suang songon di hasomalanna hian; jala ingkon tinggal dope ibana di jabu onompulu onom ari lelengna, pasalpu mudar pangiasanna i.

⁶Ia dung salpu angka ari pangiasanna ala anak manang boru, ingkon boanonna ma sada anak ni birubiru na marumur sataon bahen pelean situtungon dohot sada anak ni darapati manang sada anduhur tabu bahen pelean pardosaan, boanonna tu pintu ni undungundung parluhutan tu malim i. [77†]

⁷Malim i muse mamelehon pelean i di adopan ni Jahowa mambahen pardenggananna, asa ias nasida sian mudar hasomalanna i. I ma patik taringot tu parompuan na manubuhon anak manang boru.

⁸Alai tung sura so dapot tanganna sada anak ni birubiru, ingkon buatonna ma dua anduhur tabu manang dua anak ni darapati, na sada bahen pelean situtungon jala na sadanari bahen pelean pardosaan, asa ingkon malim i mambahen pardenggananna, asa laos ias nasida. [78†]