Read Batak Toba 3 MUSA 13 Bible Online

3 MUSA 13 - Batak Toba bible

3 MUSA 13

¹I. [1] Dung i ro ma hata ni Jahowa tu si Musa dohot tu si Aron songon on: [79†]

²Tung sura tubu di hulingkuling ni daging ni sada jolma bosar manang butir manang riapriap na olo gabe puru di hulingkuling ni dagingna, ingkon boanon jolma i tu malim Aron, manang tu sada sian angka anakna, naung gabe malim.

³Ia dung ditangkasi malim i sahit na di hulingkuling ni dagingna i, pola nunga mamontar imbulu di iposiposna i, jala honul rupa ni iposipos i idaon martimbangkon hulingkuling ni dagingna hian, i ma tandana paboa puru do i; ia dung ditangkasi malim i songon i, ramun ma jolma i dohononna. [80†]

⁴Alai tung sura pe mamontar riapriap di hulingkuling ni dagingna i, hape ndang pola honul idaon martimbangkon hulingkuling i, jala imbuluna pe ndang pola mamontar, ingkon hurungkonon ni malim do jolma na mariposipos i pitu ari lelengna.

⁵Tole papituarihon ingkon ulahan ni malim i manangkasi muse; molo tongtong iposipos i diida matana, ndang pola rarat iposipos i di hulingkuling i, ingkon ulahan ni malim i mangkurungkon ibana pitu ari lelengna.

⁶Molo dung diulahi malim i paduahalihon manangkasi papituarihon, hape ida ma, nunga lam surut iposipos i, ndada ganda raratna di hulingkuling i, ingkon ias ma ibana dohonon ni malim i, ai baro sambing do i; asal sunsion ni jolma i pangkeanna, laos ias ma ibana.

⁷Alai tung sura lam bagas manggagat tu hulingkuling baro i, dung ditangkasi malim i ibana mandokkon ias nian; ingkon ulahan ni malim i paduahalihon manangkasi.

⁸Ia dung ditangkasi malim i, hape ida ma, nunga lam manggagat tu hulingkuling baro i, ingkon ramun ma ibana dohonon ni malim i, ai puru do i tutu.

⁹Tung sura adong tanda ni puru i tarida di sada jolma, ingkon boanon ibana tu malim.

¹⁰Molo dung ditangkasi malim i, hape ida ma, adong do tutu bosar na mamontar di hulingkuling i, pola mamontar dohot imbulu i dibahen, jala tubu sibuk na so hasea di bagasan bosar i.

¹¹I ma tandana paboa puru naung leleng di hulingkuling ni dagingna; dibahen i ingkon ramun ibana dohonon ni malim i, ndang jadi hurungkononna ibana, ai nunga andar ramun ibana.

¹²Alai tung sura pamosari ni puru i dope di hulingkuling i, jala ditutup puru i sandok hulingkuling ni jolma na hona i sian pakpak uluna sahat ro di palak ni patna, nasa na dapot tangkasan ni malim i.

¹³Ia dung ditangkasi malim i, hape ida ma, nunga pola ditutup puru i sandok dagingna, ingkon ias jolma na hona i dohonon ni malim i, ala mamontar sandok dagingna i, ai na ias do ibana.

¹⁴Alai tung sura tarida sibuk na so hasea di dagingna di ari panangkasionna i, ingkon ramun do ibana.

¹⁵Ia dung diida malim i sibuk na so hasea i, ingkon ramun ibana dohononna: Ai sibuk na so hasea i do ramun, i ma puru i.

¹⁶Alai tung sura matapu muse sibuk na so hasea i gabe muba pola mamontar, ingkon ro jolma i tu jolo ni malim.

¹⁷Ia dung ditangkasi malim i ibana, hape ida ma, nunga pola mamontar iposipos i, ingkon ias ma jolma na hona i dohonon ni malim i; ai ias do ibana tutu.

¹⁸Tung sura tubu baro di hulingkuling ni daging ni sada halak, hape malum do muse.

¹⁹Hape tubu muse di iposiposna i bosar na mamontar, manang riapriap tarbontar rara, ingkon tangkasan ni malim ma ibana.

²⁰Ia dung ditangkasi malim i ibana, hape ida ma, honul do rupana martimbangkon hulingkuling na asing, pola mamontar dohot imbuluna dibahen, ingkon ramun do ibana dohonon ni malim i; ai tanda ni puru do i naung tubu di bagasan baro i.

²¹Alai ia dung ditangkasi malim i ibana, hape ida ma, ndang pola mamontar imbulu i di bagasan, jala ndang pola honul martimbangkon hulingkuling na asing, lam surut do tahe, ingkon hurungkonon ni malim ibana pitu ari lelengna.

²²Hape tung sura lam manggagat tu hulingkuling i, ingkon ramun do ibana dohonon ni malim i; ai tanda ni puru do i.

²³Alai tung sura tongtong riapriap i ndang lam rarat, iposipos ni baro i do i, ingkon ias do jolma i dohonon ni malim i. [81†]

²⁴Manang tung sura hona tutung hulingkuling ni daging ni sada jolma, ia dung malum tubu muse di iposiposna i riapriap tarbontar rara, manang bontar sambing pe.

²⁵Ia dung ditangkasi malim i, hape ida ma, nunga pola mamontar imbulu i dibahen jala honul rupana, puru ma i na tubu sian iposipos ni na matutung i; dibahen i ingkon ramun ibana dohonon ni malim i, ai tanda ni puru do i.

²⁶Alai ia dung ditangkasi malim i ibana, hape ida ma, ndang mamontar imbulu di iposiposna i jala ndang honul martimbangkon hulingkuling na asing, jala nunga lam surut, ingkon hurungkonon ni malim i ma ibana pitu ari lelengna.

²⁷Tole papituarihon ingkon tangkasan ni malim i ma ibana; tung sura lam manggagat tu hulingkuling i, ingkon ramun ma ibana dohonon ni malim i, ai bogas ni puru do i.

²⁸Alai tung sura tongtong riapriap i, ndang lam manggagat tu hulingkuling i, lam surut do tahe, i ma tandana paboa bosar ni na hona tutung sambing do i, ingkon ias do ibana dohonon ni malim i; ai iposipos ni na hona tungtung i do i. [82†]

²⁹Tung sura lotupon baoa manang parompuan di uluna manang di janggutna.

³⁰Jadi ro malim manangkasi, hape ida ma, honul do rupana martimbangkon hulingkuling, na asing, jala targorsing ia obukna, jala rangkak, ingkon ramun ma ibana dohonon ni malim i, ai puru do lotup i di ulu manang di janggut.

³¹Alai ia dung ditangkasi malim lotup i, hape ida ma, ndang pola honul rupana martimbangkon hulingkuling na asing, jala ndang adong obukna na birong disi, ingkon hurungkonon ni malim i do jolma na lotupon i pitu ari lelengna.

³²Tole papituarihon ingkon tangkasan ni malim i ma lotup i, hape ida ma, ndang pola rarat lotup i jala ndang adong na gorsing disi, jala ndang honul rupa ni lotup i martimbangkon hulingkuling na asing.

³³Ingkon gorbangonna ma uluna, alai ndang jadi hona gorbang anggo lotup i, jala ingkon hurungkonon ni malim i jolma na lotupon i paduahalihon pitu ari lelengna.

³⁴Tole papituarihon ingkon tangkasan ni malim ma lotup i, hape ida ma, ndang rarat lotup i tu hulingkuling jala ndang honul rupana martimbangkon hulingkuling na asing, ingkon ias ma jolma i dohonon ni malim, asal sunsion ni jolma i pangkeanna, laos ias ma ibana.

³⁵Alai tung sura lam manggagat lotup i di hulingkuling, dung ias ibana didok malim i.

³⁶Ditangkasi malim i ibana muse, hape ida ma, nunga lam rarat lotup i di hulingkuling, ndang jadi be pola usoan ni malim, manang na gorsing obukna; ai na ramun do ibana.

³⁷Alai tung sura tongtong lotup i diida matana, jala martumbur obuk na birong disi, naung malum ma lotup i, nunga ias jolma i, ias ma ibana huhut dohonon ni malim.

³⁸Tung sura marriapriap hulingkuling ni daging ni sada baoa manang parompuan marbolang idaon.

³⁹Dung i ditangkasi malim, gabe ida ma, jumpangsa riapriap tarlangan di hulingkuling ni dagingnasida i, riapriap sambing do i na tubu di hulingkulingna, jala ias do jolma i.

⁴⁰Tung sura marurus obuk ni ulu ni sada baoa pola palpal, na ias do ibana.

⁴¹Tung sura marurus obukna tungkan bohina, pola salaksahon ibana, na ias do ibana.

⁴²Alai tung sura tubu di palpalna dingkan pudi, manang dingkan jolo, lotup tarbontar rara, puru ma i na tubu di palpalna dingkan pudi manang dingkan jolo.

⁴³Dibahen i ingkon tangkasan ni malim ibana, hape ida ma, ia jumpangsa bosar na tarbontar rara di palpalna dingkan pudi manang dingkan jolo, idaon songon rupa ni puru di hulingkuling ni daging.

⁴⁴Jolma na puruon ma ibana tutu jala na ramun ibana; ingkon ramun ibana huhut dohonon ni malim i, ala bosar na di atas uluna i.

⁴⁵Antong manang ise jolma i na puruon naung andap, ingkon sansanan do pangkeanna jala manangkas uluna jala tutuponna sisungutna, jala ingkon jouhononna: Na ramun, na ramun!

⁴⁶Antong manang ise jolma na ramun ibana ala ramun tutu; ingkon punjung ibana maringan, ingkon di balian ni parsaraon ingananna i. [83†] II.

⁴⁷Tung sura adong ringkorang ni puru lohot di sada ulos manang sian imbulu ni birubiru manang sian hapas.

⁴⁸Manang lohot di torna manang di ipahan, sian hapas manang sian imbulu ni birubiru, manang lohot di hulingkuling manang di aha pe hapandean sian hulingkuling.

⁴⁹Tung sura tarrata manang rara ringkorang na lohot i di ulos manang di hulingkuling, di torna manang di ipahan, manang di sandok ulaula na sian hulingkuling, ringkorang ni puru do i tutu; dibahen i ingkon tangkasan ni malim do i.

⁵⁰Ia dung diida malim ringkorang i, ingkon simpanonna do ulos na hona i pitu ari lelengna.

⁵¹Ia dung ditangkasi papituarihon, hape lam rarat do ringkorang i di ulos, di torna manang di ipahan, di hulingkuling manang di sandok hapandean na pinauli sian hulingkuling, ringkorang ni puru na manggagat ma i tutu, ramun do i.

⁵²Ingkon suda tutungonna ulosi manang torna manang ipahan sian imbulu ni birubiru manang sian hapas, manang ulaula dia pe sian hulingkuling, halohotan ni ringkorang i, ai puru na manggagat do i, ingkon suda do i tutungon di bagasan api.

⁵³Alai tung sura diida malim ndang rarat hape ringkorang i di ulos, di torna manang di ipahan, manang di ulaula dia pe na sian hulingkuling.

⁵⁴Ingkon dohonon ni malim jolma i manunsi barang halohotan ni ringkorang i, dung i simpanonna ma i paduahalihon pitu ari lelengna.

⁵⁵Molo diida malim ringkorang i, dung hona sunsi, hape ida ma, ndang muba rupa ni ringkorang i idaon, jala nang so ganda raratna, ramun do i; ingkon suda do i tutungonmu di bagasan api, ai naung panggagatanna do i di ruar manang di bagasan.

⁵⁶Alai tung sura ditangkasi malim i muse, hape ida ma, nunga manoksang halohotan ni ringkorang i, dung hona sunsi, ingkon sansananna do i sian ulos manang sian hulingkuling, sian torna manang sian ipahan pe.

⁵⁷Alai tung sura tong dope tarida di ulos, di torna manang di ipahan manang di ulaula dia pe sian hulingkuling, puru na manggagat ma i, ingkon suda tutungonmu barang halohotan ni ringkorang i di bagasan api.

⁵⁸Alai anggo ulos, torna manang ipahan manang dia tahe ulaula sian hulingkuling, anggo dung longkang ringkorang i dung hona sunsi, ingkon sunsion paduahalihon, asa laos ias.

⁵⁹I ma patik taringot tu ringkorang ni puru na lohot di ulos, sian imput ni birubiru manang sian hapas, na lohot di torna manang di ipahan manang di ulaula dia pe sian hulingkuling, mandokkon na ias do i manang na ramun.