Read Batak Toba 3 MUSA 18 Bible Online

3 MUSA 18 - Batak Toba bible

3 MUSA 18

¹I. [1] Ro muse ma hata ni Jahowa tu si Musa songon on:

²Hatahon ma tu halak Israel jala dohononmu ma tu nasida: Ahu do Jahowa, Debatamuna i!

³Ndang jadi tiruonmuna pambahenan ni halak di tano Misir paisolatanmuna najolo, jala ndang jadi tiruonmuna pambahenan ni halak di tano Kanaan, hasahatanmuna tu joloan on togihononku, jala ndang jadi ihuthononmuna adatnasida i. [122†]

⁴Ingkon radotanmuna do angka uhumhu jala ingkon ingotonmuna angka parentangku, asa marparange hamu hombar tusi, ai Ahu do Jahowa, Debatamuna i.

⁵Dibahen i ingkon radotanmuna angka parentangku dohot angka uhumhu; manang ise jolma na mangulahon angka i, mangolu ma ibana marhite sian i, ai Ahu do Jahowa! [123†] II.

⁶Manang ise pe baoa ndang jadi jumonok ibana tu sada parompuan sihasolhotanna, naeng mangabia, ai Ahu do Jahowa.

⁷Ndang jadi patedehonmu na niabitan ni amangmu manang inangmu; ai inangmu do ibana, dibahen i ndang jadi pagodangonmu.

⁸Ndang jadi pagodangonmu jolma ni amangmu, ala naung sampur amangmu tu nasida. [124†]

⁹Ndang jadi olionmu ibotom tubu ni amangmu manang inangmu, na tubu di bagasan jabu manang di ruar, ndang jadi patedehonmu na niabitanna. [125†]

¹⁰Ndang jadi olionmu pahompum boru, tubu ni anakmu manang borum, ndang jadi patedehonmu na niabitanna, ai hapantanganmu do nasida.

¹¹Ndang jadi olionmu boru ni jolma ni amangmu, tinubuhon ni amangmu, ai ibotom do nasida jala hapantanganmu do nasida.

¹²Ndang jadi olionmu namborum, ai sisada mudar dohot amangmu do nasida.

¹³Ndang jadi olionmu pariban ni inangmu, ai sisada mudar do nasida dohot inangmu.

¹⁴Ndang jadi ramunanmu podoman ni hahaanggi ni amangmu, laho sampur tu jolmana, ai inangmu do nasida.

¹⁵Ndang jadi pagodangonmu parumaenmu, ai jolma ni anakmu do nasida, ala ni umbahen so jadi patedehonmu na niabitanna. [126†]

¹⁶Ndang jadi rampasonmu jolma ni hahaanggim, ala naung sampur tu hahaanggim. [127†]

¹⁷Ndang jadi olionmu sada parompuan rap rodot boruna; jala ndang jadi buatonmu pahompum, tubu ni anakna manang tubu ni boruna bahen jolmam, ai sisada mudar do hamu, ai haurahon bolon do i. [128†]

¹⁸Ndang jadi buatonmu sada parompuan rap dohot anggina bahen jolmam, asa patubu pangiburuon, ala sampur ho dohot imbangna, tagan di ngoluna dope. III.

¹⁹Ndang jadi ho sampur tu jolmam uju marsahithon pantang ni abitna nasida. [129†]

²⁰Jala ndang jadi angkupanmu modom jolma ni donganmu, gabe ramun ho maon marhite sian nasida. [130†]

²¹Jala ndang jadi pasahatonmu nanggo sahalak sian pinomparmu laho mamelehon tu Molok, asa unang ramun bahenonmu Goar ni Debatam, ai Ahu do Jahowa. [131†]

²²Ndang jadi parjolmaonmu baoa songon parompuan, ai hagigian do i. [132†]

²³Angkup ni ndang jadi ho sampur manang tu pinahan dia, gabe ramun ho bahenon ni; jala parompuan pe ndang jadi sampur tu pinahan, ai hagigian bolon do i. [133†]

²⁴Ndang jadi ramunanmuna dirimuna marhite sian saluhutna i, ai marhite sian pambahenan sisongon i tarramun do bangso parbegu, angka sipabalionku maradophon hamu.

²⁵Jadi tarramun ma tano i, gabe ingkon marlulu Ahu dompak tano i ala hajahatonna, asa diutahon tano i angka jolma pangisina i.

²⁶Dibahen i sai radoti hamu ma angka parentangku dohot uhumhu jala unang ulahon hamu nanggo sada sian saluhut biasbias ondeng, nang jolma isi ni tano i hian, nang halak dagang na maisolat di tongatongamuna.

²⁷Ai saluhut angka biasbias ondeng, nunga diulahon isi ni tano i hian, angka na jumolo sian hamu, gabe tarramun tano i dibahen.

²⁸Asa unang dohot hamu diutahon tano i, tung sura tarramun dibahen hamu, suang songon na niutahonna bangso parbegu angka na jumolo sian hamu.

²⁹Ai manang ise na mangulahon nanggo sada sian angka biasbias ondeng, ingkon siaphononhon do hosana i sian tongatonga ni bangsona.

³⁰Dibahen i radoti hamu ma siradotanmuna maradophon Ahu, na so tupa hamu mangulahon nanggo sada sian adat hagigian, angka na niulahon ni halak na jumolo sian hamu, asa unang tarramun dirimuna marhite sian i; ai Ahu do Jahowa, Debatamuna i!