Read Batak Toba 3 MUSA 2 Bible Online

3 MUSA 2 - Batak Toba bible

3 MUSA 2

¹I. [1] Tung sura manang ise naeng mamelehon sada pelean sipanganon tu Jahowa, ingkon itak na lamot buatonna peleanna jala usehononna tusi miak jala ampehononna tusi haminjon.

²Dung i boanonna do i tu angka anak ni si Aron, angka malim i; dung i buaton ni sada sian nasida sian i sampohul, sian itak, sian miak dohot sandok haminjon i, ingkon tutungon ni malim i ma i bahen pelean parningotan di atas ni langgatan i, gabe pelean api, uap na huhus di Jahowa.

³Alai na teba i sian pelean sipanganon i, jambar ni si Aron dohot angka anakna ma i, i ma na badia sahali sian angka pelean api di Jahowa.

⁴Alai tung sura naeng pelehononmu sada pelean sipanganon naung minasak di tataring, ingkon buatonmu do gaburgabur na so niasoman mardongan miak dohot sagusagu na so niasoman marsapu miak.

⁵Alai tung sura peleanmi sada pelean sipanganon sian na ginoreng di balanga, ingkon sian itak na lamot na so niasoman do marsaor miak.

⁶Ingkon parponggolanmu do i jala usehononmu tusi miak, asa manjadi pelean sipanganon do i.

⁷Alai tung sura peleanmi sada pelean sipanganon sian na nilompa di bagasan hudon, ingkon sian itak na lamot do i marsaor miak bahenon.

⁸Ingkon boanonmu do pelean sipanganon na pinaulim sian angka ondeng di Jahowa, boanonmu do i tutu tu malim i, asa ibana muse mamboan tu langgatan i.

⁹Jala ingkon buaton ni malim i sian pelean sipanganon jambar parningotan jala tutungonna do i di atas langgatan, i ma pelean api, uap na hushus di Jahowa.

¹⁰Alai na tinggal i sian pelean sipanganon, i ma gabe jambar ni si Aron dohot angka anakna, i ma na badia sahali sian angka pelean api tu Jahowa.

¹¹Nasa pelean sipanganon na naeng pelehononmuna tu Jahowa, ndang jadi asom bahenon, ai nasa na asom manang situak ni loba, ndang jadi tutungonmuna sian i bahen pelean api tu Jahowa. [4†]

¹²Anggo bahen pelean patumonaan jadi do boanonmuna angka i tu Jahowa, alai ndang jadi anggo tutungon di atas langgatan, bahen uap na hushus. [5†]

¹³Nasa pelean sipanganon tahe, ingkon mardongan sira do bahenonmu, na so tupa tartinggal bahenonmu sian peleanmu sipanganon sira parjanjian tu Debatam; dibahen i ingkon mardongan sira sude peleanmu pelehononmu. [6†] II.

¹⁴Alai molo naeng ho mamelehon pelean sipanganon sian patumonaan tu Jahowa, ingkon boanonmu do biur ni eme na nirondang di bagasan api, na niduda bahen pelean sipanganon sian patumonaan. [7†]

¹⁵Ingkon bahenonmu huhut tusi miak jala ampehononmu tu atasna haminjon, i ma gabe pelean sipanganon.

¹⁶Dung i ingkon tutungon ni malim ma jambar parningotan sian eme na nidugudugu dohot sian miakna rap dohot sandok haminjon i bahen pelean api di Jahowa.