Read Batak Toba 3 MUSA 22 Bible Online

3 MUSA 22 - Batak Toba bible

3 MUSA 22

¹I. [1] Dung i ro muse hata ni Jahowa tu si Musa songon on:

²Paboa ma tu si Aron dohot tu angka anakna i, asa tangkas rohana mangaramoti dirina maradophon na badia di halak Israel, na pinarbadiaannasida di Ahu, asa unang marlea dibahen nasida Goarhu na badia i; ai Ahu do Jahowa.

³Antong paboa ma tu nasida: Manang ise sian sandok pinomparmuna marsundutsundut, ro jumonok laho mangaradoti ulaon na badia, na pinarbadiaan ni halak Israel di Jahowa, tongon di haramunonna; ingkon siaphononhon jolma i sian adopanku, ai Ahu do Jahowa.

⁴Manang ise sian pinompar ni si Aron na puruon manang marnipinipi dagingna, ndang jadi ibana mangan sian na pinarbadiaan saleleng so malum dihilala; laos songon i do manang ise na manjama manang aha na ramun binahen ni bangke, manang tung sabur boni ni manang ise. [166†]

⁵Manang tung dijama manang ise manang aha na manjirir, na paramunhon ibana, manang halak na paramunhon ibana, ro di sude na tau paramunhon ibana.

⁶Manang ise tahe na manjama sisongon i, ingkon ramun ibana sahat ro di bodari, jala ndang jadi ibana mangan sian na pinarbadiaan, ingkon jolo didionna dagingna di bagasan aek. [167†]

⁷Ia dung mate mata ni ari ias ma ibana, dung i jadi ma panganonna sian na pinarbadiaan, ai sipanganonna hian do i.

⁸Na mate garam dohot juhut soroan ndang jadi panganonna, asa unang paramunonna dirina binahen ni; ai Ahu do Jahowa. [168†]

⁹Dibahen i ingkon radotannasida pangoloion tu Ahu, asa unang dapotan dosa nasida marhite sian i, laos mate maon binahen ni, tung sura marlea binahenna i, ai Ahu do Jahowa, na pabadiahon nasida. II.

¹⁰Angkup ni halak ruar pe ndang jadi panganonna na pinarbadiaan, nang halak na manompang di malim, nang anak gajianna, ndang jadi mangan sian na badia.

¹¹Alai tung sura adong sahalak tinuhor ni malim i dohot perakna sandiri, jadi do anggo i mangan sian i; nang halak na tubu di bagasan jabuna, jadi do mangan sian sagusaguna.

¹²Alai anggo boru ni malim, ia dung gabe ripe ni halak ruar, ndang jadi ibana mangan sian pelean tatingan na pinarbadiaan.

¹³Alai anggo boru ni malim naung mabalu manang pinaulak, jala ndang marpinompar, gabe mulak nasida sumuang tu jabu ni amana, i ma na jadi mangan sian sagusagu ni amana, suang songon uju di haposoonna; alai anggo sandok halak ruar ndang jadi mangan sian i.

¹⁴Alai manang ise na mangan sian na pinarbadiaan i binahen ni liluna, ingkon patambaonna saparlima godangna, jala paulahonna tu malim na pinarbadiaan i. [169†]

¹⁵Asa unang marlea dibahen nasida na pinarbadiaan ni halak Israel bahen pelean tatingan tu Jahowa;

¹⁶Asa unang dapotan hajahaton nasida dohot hasalaan, ala pinanganna na pinarbadiaannasida; ai Ahu do Jahowa na pabadiahon nasida. [170†] III.

¹⁷Dung i ro muse hata ni Jahowa tu si Musa songon on:

¹⁸Dok ma tu si Aron ro di angka anakna ro di sandok halak Israel, dohononmu ma tu nasida: Manang ise pe sian pinompar ni halak Israel manang sian halak dagang pe di tongatonga ni halak Israel, molo naeng ibana mamelehon peleanna marguru tu saluhut bagabaganasida, jala marguru tu sandok silehonlehon sian lomonasida i, angka na naeng pelehononna tu Jahowa bahen pelean situtungon.

¹⁹Asa tung jumpangan asi ni roha hamu, ingkon tunggal na so martihas buatonna sian lombu, manang anak ni birubiru manang hambing.

²⁰Saluhut tahe na martihas ndang jadi pelehononmuna, ai ndang dapotan asi ni roha hamu marhite sian i. [171†]

²¹Tung sura adong sahalak na mamelehon sada pelean hamauliateon tu Jahowa naeng manggarar bagabagana, manang bahen pelean lomo ni rohana, ingkon buatonna sian lombu manang birubiru na so martihas, asa dapotan asi ni roha ibana, na so tupa tahe martihas.

²²Molo tung mapitung manang maponggol holiholina manang mabugang manang darangon manang gurapon manang baro on, i ma angka na so jadi pelehononmuna tu Jahowa, jala ndang jadi lehononmuna sian i tu Jahowa bahen pelean situtungon di atas langgatan i.

²³Alai anggo jonggi manang birubiru na maganjangku ruasna manang majempekku, jadi do nian hobasonmu bahen pelean sian lomo ni roham, alai anggo tung manggarar bagabaga ndang tarhalomohon Jahowa.

²⁴Tole pinahan na pinaias binahen ni na tartambing manang tarlisat manang dironton manang dihorot, ndang jadi pelehononmuna tu Jahowa, jala ndang jadi bahenonmuna songon i di tanomuna i.

²⁵Nang sian tangan ni halak sileban ndang jadi sian angka sisongon i pelehononmuna bahen sagusagu lomo ni roha ni Debatamuna, ai busukna do di bagasan nasida gabe tihasna do i, gabe ndang dapotan asi ni roha hamu marhite sian i.

²⁶Dung i ro muse hata ni Jahowa tu si Musa songon on:

²⁷Molo tubu sada anak ni lombu manang anak ni birubiru manang anak ni hambing, ingkon pitu ari lelengna pasombuonmu rap dohot inana, tole paualuarihon manang lobi sian i, jadi ma i pelehononhon bahen pelean situtungon tu Jahowa. [172†]

²⁸Alai ndang jadi rap seatonmuna di bagasan sada ari lombu manang birubiru rap dohot anakna. [173†]

²⁹Alai tung sura naeng pelehononmuna sada pelean pujipujian tu Jahowa, antong pelehon hamu ma i asa dapotan asi ni roha hamu.

³⁰Ingkon laos di ari na sasada i do i panganonmuna, ndang jadi marlobilobi sian i tu marsogot, ai Ahu do Jahowa. [174†]

³¹Dibahen i ingkon radotanmuna angka tonangku, asa mangulahon angka i, ai Ahu do Jahowa.

³²Asa unang marlea dibahen hamu Goarhu na badia i, asa tung badia Ahu di tongatonga ni halak Israel; ai Ahu do Jahowa, na pabadiahon hamu. [175†]

³³Jala Ahu naung manogihon hamu ruar sian tano Misir, asa Ahu gabe Debatamuna i, Ahu Jahowa.