Read Batak Toba 3 MUSA 23 Bible Online

3 MUSA 23 - Batak Toba bible

3 MUSA 23

¹I. [1] Dung i ro muse hata ni Jahowa tu si Musa songon on:

²Paboa ma tu halak Israel, jala dohononmu ma tu nasida: On ma ari raya ni Jahowa, angka sitingtingkononmuna, gabe parluhutan na badia, i ma angka ari raya di Ahu.

³Onom ari lelengna ingkon mangula ulaon ho, alai anggo ari papituhon i ari Sabbat paradianan, ari parluhutan na badia; nanggo sada ulaon ndang jadi ulahononmu disi, ai ari Sabbat di Jahowa do i di saluhut ingananmuna. [176†] II.

⁴Alai angka on do ari raya di Jahowa, ari parluhutan na badia, angka sitingtingkononmuna di tingkina be binuhul hian: [177†]

⁵Di bulan sipaha sada di ari sampulu opat mareak bodari, disi ma ari raya Paska ni Jahowa. [178†]

⁶Tole di ari sampulu lima bulan i, disi ma ari raya sagusagu na so niasoman di Jahowa; ingkon pitu ari lelengna hamu manganhon sagusagu na so niasoman.

⁷Di ari parjolo ingkon ari parluhutan na badia di hamu, nanggo sada ulaon ariari ndang jadi ulahononmuna disi.

⁸Ingkon pitu ari padodot hamu mamelehon pelean situtungon di Jahowa; tole di ari papituhon i ingkon ari parluhutan na badia, nanggo sada ulaon ariari ndang jadi ulahononmuna disi.

⁹Dung i ro muse hata ni Jahowa tu si Musa songon on:

¹⁰Paboa ma tu halak Israel jala dohononmu ma tu nasida: Ia dung sahat hamu tu tano, silehononku tu hamu, jala sanga hamu manggotil gogona i, ingkon boanonmuna ma tibalan parjolo sian patumonaanmuna i tu malim.

¹¹Ingkon malim i muse manatingnating tibalan i di adopan ni Jahowa, asa dapotan asi ni roha hamu; alai marsogotna i pe dung ari Sabbat ingkon tatingan ni malim i. [179†]

¹²Jala di ari panatingnatinganmuna di tibalan i, ingkon pelehononmuna sada anak ni birubiru na so martihas na marumur sataon bahen pelean situtungon di Jahowa.

¹³Rap dohot peleanna sipanganon: Dua parpuluan itak na lamot na nidogil dohot miak bahen pelean situtungon, uap na hushus di Jahowa, tole dohot sada pelean siinumon sian anggur saparopat hin.

¹⁴Jala ndang jadi panganonmuna sagusagu manang tipatipa manang dahanon na niitak sahat ro di ari pamboanmuna di pelean tu Debatamuna; i ma uhum na hot salelenglelengna di pinomparmuna di sandok ingananmuna i. III.

¹⁵Dung i ingkon bilangonmuna ma olat ni ari dung Sabbat i, olat ni ari pamboanmuna tahe di tibalan tatingan pitu ari Sabbat boho. [180†]

¹⁶Sahat ro di ari dung salpu ari Sabbat papituhon i, boho limapulu ari bilanganmuna, asa pelehononmuna sada pelean sipanganon na imbaru di Jahowa.

¹⁷Ingkon boanonmuna tahe sian ingananmuna be dua sagusagu bahen pelean tatingan, sian dua parpuluan itak na lamot na niasoman, na minasak bahen patumonaan di Jahowa.

¹⁸Jala ingkon pelehononmuna dongan ni sagusagu i pitu anak ni birubiru, angka na so martihas na marumur sataon dohot sada lombu na bajar dohot dua birubiru tunggal; luhutna i ingkon gabe pelean situtungon di Jahowa rap dohot peleanna sipanganon dohot siinumon, bahen pelean situtungon, uap na hushus di Jahowa.

¹⁹Ingkon pelehononmuna huhut sada hambing tunggal bahen pelean pardosaan dohot dua anak ni birubiru na marumur sataon, bahen pelean hamauliateon.

²⁰Ingkon tatingon ni malim ma angka i rap dohot sagusagu patumonaan bahen pelean tatingan di adopan ni Jahowa rap dohot anak ni birubiru na dua i; ingkon badia di Jahowa ma i jala jambar ni malim.

²¹Ingkon tingtingkononmuna do ari na sasada i, ingkon ari parluhutan na badia do i di hamu; nanggo sada ulaon ariari ndang jadi ulahononmuna disi; patik na hot salelenglelengna ma i di pinomparmuna di saluhut ingananmuna i.

²²Molo digotil hamu parbue ni tanomuna, ndang jadi suda gotilonmuna duru ni haumamu, jala ndang jadi suda jomputonmu na marpisikpisik di panabianmuna, ingkon tinggalhononmu do i di halak na pogos dohot di halak dagang; ai Ahu do Jahowa, Debatamuna i. [181†] IV.

²³Dung i ro muse hata ni Jahowa tu si Musa songon on:

²⁴Paboa ma tu halak Israel songon on: Di bulan sipaha pitu di artia, ingkon marari raya paradianan hamu disi, ari parningotan di parsaruneon, ari parluhutan na badia. [182†]

²⁵Nanggo sada ulaon ariari ndang jadi ulahononmuna disi, ingkon pelehononmuna do sada pelean situtungon di Jahowa. V.

²⁶Dung i ro muse hata ni Jahowa tu si Musa songon on:

²⁷Tole di ari sampulu di bulan sipaha pitu i, i ma ari raya pardengganan, i ma ari parluhutan na badia di hamu, ingkon paunduhonmuna rohamuna disi dohot mamelehon sada pelean situtungon di Jahowa. [183†]

²⁸Nanggo sada ulaon ndang jadi ulahononmuna di ari na sasada i, ai ari raya pardengganan do i mambahen pardengganan di hamu di adopan ni Jahowa, Debatamuna i.

²⁹Ai manang ise na so paunduk rohana di ari na sasada i, ingkon siaphononhon do i sian tongatonga ni bangsona.

³⁰Jala manang ise na mangula nanggo sada ulaon di ari na sasada i, ingkon Ahu mangago halak sisongon i sian tongatonga ni bangsona.

³¹Nanggo sada ulaon ndang jadi ulahononmuna disi; ingkon patik na hot salelenglelengna ma i di saluhut pinomparmuna di saluhut ingananmuna i.

³²Ingkon ari Sabbat paradianan ma i di hamu, jala ingkon paunduhonmuna rohamuna di ari sia di bulan na sasada i mareak bodari; ingkon sian bodari sahat tu bodari marsogotna i hamu maradian di ari Sabbatmu. VI.

³³Dung i ro muse hata ni Jahowa tu si Musa songon on:

³⁴Paboa ma tu halak Israel songon on: Di ari sampulu lima di bulan sipaha pitu, disi ma ari raya parlapelapean di Jahowa, pitu ari lelengna. [184†]

³⁵Di ari parjolo do ari parluhutan na badia; nanggo sada ulaon ariari ndang jadi ulahononmuna disi.

³⁶Ingkon pitu ari padodot hamu mamelehon pelean situtungon di Jahowa; tole paualuarihon, ingkon ari parluhutan na badia di hamu, jala pelehononmuna pelean situtungon di Jahowa, i ma mata ni ari raya i, nanggo sada ulaon ariari ndang jadi ulahononmuna disi. [185†]

³⁷I ma angka ari raya di Jahowa, ingkon tingtingkononmuna do i bahen ari parluhutan na badia laho mamelehon tu Jahowa angka pelean api, pelean situtungon, pelean sipanganon, pelean sipotongon dohot pelean siinumon, ganup di arina be.

³⁸So padohot angka ari Sabbat di Jahowa jala so padohot angka silehonlehonmuna dohot bagabagamuna dohot sude silehonlehonmuna sian lomo ni rohamuna, angka na nilehonmuna tu Jahowa.

³⁹Dibahen i di ari sampulu lima di bulan sipaha pitu, ia dung dipapungu hamu gogo ni tano i, ingkon bahenonmuna ari raya i di Jahowa, pitu ari lelengna; di ari parjolo do ari paradianan, di ari paualuhon i pe ingkon ari paradianan do.

⁴⁰Jala ingkon buatonmuna di hamu di ari parjolo parbue ni hau angka na denggan, angka bulung ni harambir, angka dangka ni hau na rugun, angka ampolu, jala marlas ni roha hamu di adopan ni Jahowa, Debatamuna i, pitu ari lelengna. [186†]

⁴¹Ingkon bahenonmuna ari raya i di Jahowa pitu ari lelengna di bagasan sataon; patik na hot salelenglelengna ma i di pinomparmuna; di bulan sipaha pitu ingkon marari raya hamu.

⁴²Ingkon pitu ari lelengna hamu maringan di bagasan angka parlapelapean; nasa na tubu di halak Israel, ingkon maringan di bagasan angka undungundung.

⁴³Asa tung diboto pinomparmuna, paboa Ahu mambahen halak Israel maringanan di bagasan angka undungundung, uju Ahu manogihon nasida ruar sian tano Misir; ai Ahu do Jahowa, Debatamuna i.

⁴⁴Dung i dipaboa si Musa ma tu halak Israel angka ari raya ni Jahowa.