Read Batak Toba 3 MUSA 24 Bible Online

3 MUSA 24 - Batak Toba bible

3 MUSA 24

¹I. [1] Dung i ro muse ma hata ni Jahowa tu si Musa songon on:

²Dokkon ma halak Israel, asa diboan nasida tu ho miak Jetun na niduda jala na tinapis bahen miak palito, asa tongtong galak palito i. [187†]

³Ingkon di ruar ni rimberimbe na mangolat poti parpadanan i di bagasan undungundung parluhutan hobason ni si Aron palito i olat ni bodari sahat ro di manogotna i di adopan ni Jahowa. I ma aturan na hot salelenglelengna di pinomparmuna i.

⁴Alai ingkon di atas parpalitoan sian sere na pita hobasonna tongtong angka palito i di adopan ni Jahowa.

⁵Ingkon buatonmu huhut itak na lamot, jala masahanmu ma sian i sampulu dua sagusagu, ganup sagusagu i dua parpuluan.

⁶Jala ingkon peakkononmu do i bahen dua timbunan, onomonom sada timbunan di atas meja sian sere na pita di adopan ni Jahowa. [188†]

⁷Jala ingkon bahenonmu di atas ni ganup timbunan daupa na pita bahen pelean parningotan di roti i, i ma sada pelean api di Jahowa.

⁸Ingkon gonop ari Sabbat do i hobasonna tongtong di adopan ni Jahowa sian halak Israel bahen padan salelenglelengna.

⁹Jala ingkon jambar ni si Aron dohot angka anakna do i, sipanganonnasida do i di bagasan inganan na badia i, ai i ma apala na badia sahali di ibana sian angka pelean api na tu Jahowa, aturan na hot salelenglelengna do i. II.

¹⁰Dung i ruar ma anak ni sada boru Israel, alai halak Misir do anggo amana, di tongatonga ni halak Israel; jadi marbadai ma anak ni boru Israel i dohot sahalak Israel di parsaroan.

¹¹Jadi diinsahi anak ni boru Israel i ma Goar ni Jahowa, laos mamburai ibana. Dung i diboan nasida ma ibana tu jolo ni si Musa; ia goar ni inana i ma si Selomit, boru ni si Dibri sian marga Dan. [189†]

¹²Dung i dibahen nasida ma ibana tu bagasan hurungan, paima tangkas uhum dabuonnasida hombar tu hata ni Jahowa. [190†]

¹³Dung i ro ma hata ni Jahowa tu si Musa songon on:

¹⁴Togihon ma halak pamuraii tu balian ni parsaroan i, jala saluhut halak na umbege pamuraionna i, ingkon mangampehon tangannasida tu atas uluna, laos sandok luhutan i mandangguri ibana mate dohot batu.

¹⁵Jala ingkon dohononmu ma tu halak Israel: Manang ise pe na mamburai Debatana, ingkon manginona tu ibana dosana i.

¹⁶Jala manang ise na manginsahi Goar ni Jahowa, ingkon marutang hosa ibana, ingkon sandok luhutan i mandangguri ibana mate dohot batu, nang halak dagang, nang halak isi ni tano i hian, molo tung diinsahi Goar ni Jahowa, ingkon marutang hosa ibana. [191†] III.

¹⁷Manang ise na mangompongi donganna jolma, pola mate, ingkon marutang hosa ibana. [192†]

¹⁸Manang ise na mangompongi mate pinahan ni halak na asing, ingkon abulonna do i, pinahan singkat ni pinahan.

¹⁹Manang ise na mamukpuhi donganna jolma, suang songon na binahenna bahenon tu ibana. [193†]

²⁰Bugang abul ni bugang, mata abul ni mata, ipon abul ni ipon; manang sahitsahit dia tahe binahenna tu donganna jolma, ingkon suang songon i bahenon tu ibana.

²¹Asa manang ise na mangompongi mate pinahan, ingkon abulonna do i; alai manang ise na mambunu jolma, ingkon marutang hosa ibana.

²²Ingkon sisada uhum di hamu, di halak dagang, suang songon di halak isi ni tano hian; ai Ahu do Jahowa Debatamuna i. [194†]

²³Dung i dipatolhas si Musa ma hata i tu halak Israel, jadi ditogihon nasida ma halak panginsahi i ruar tu balian ni parsaroan jala mate ibana didangguri dohot batu. Asa dibahen halak Israel ma songon na tinonahon ni Jahowa tu si Musa. [195†]