Read Batak Toba 3 MUSA 3 Bible Online

3 MUSA 3 - Batak Toba bible

3 MUSA 3

¹I. [1] Alai tung sura sada pelean hamauliateon, naeng pelehononna sian lombu, manang jonggi manang boruboru, na so tupa marlindang pelehononna di adopan ni Jahowa.

²Ingkon ampehononna tanganna tu ulu ni peleanna i, laos potongonna do i di jolo pintu ni undungundung parluhutan i, jala ingkon pispishonon ni angka anak ni si Aron, angka malim i, anggo mudarna tu langgatan i humaliang.

³Ingkon pelehononna sian pelean hamauliateon bahen pelean api tu Jahowa, i ma pultahan na manghungkupi raoanna, ro di sandok pultahan na di bagasan i.

⁴Tole muse piana na dua i dohot pultahan na lohot tusi na di lansonikna, tole muse hirehire na dalhop tu ateate, mangihut tu piapia buatonna.

⁵Dung i ingkon tutungon ni angka anak ni si Aron ma i di atas langgatan bahen pelean situtungon di atas soban dohot api; i ma gabe pelean api, uap na hushus di Jahowa. II.

⁶Alai tung sura sian pinahan na metmet peleanna i bahen pelean hamauliateon tu Jahowa, nang tunggal, nang boruboru, ingkon na so marlindang do pelehononna.

⁷Molo sada anak ni birubiru naeng pelehononna, ingkon boanonna do i tu adopan ni Jahowa.

⁸Dung i ingkon ampehononna tanganna tu ulu ni peleanna i, jala potongonna do i di jolo ni undungundung parluhutan i; alai anggo mudarna ingkon pispishonon ni angka anak ni si Aron do i tu langgatan i humaliang.

⁹Dung i ingkon pelehononna sian pelean hamauliateon i bahen pelean api tu Jahowa, i ma pultahanna, sandok ihurna, sigotaponna jonok tu hau tanggurungna, tole muse pultahan pangkuphupi ni raoanna ro di sandok pultahan na di bagasan i.

¹⁰Tole muse piana na dua i dohot pultahan na lohot tusi na di lansonikna, tole muse hirehire na dalhop tu ateate mangihut tu piapia buatonna.

¹¹Ingkon tutungon ni malim ma i di atas langgatan bahen sipanganon ni pelean api tu Jahowa. III.

¹²Tung sura hambing peleanna, ingkon boanonna do i tu adopan ni Jahowa.

¹³Dung i ampehononna ma tanganna tu uluna jala potongonna do i di jolo ni undungundung parluhutan i; ingkon pispishonon ni angka anak ni si Aron anggo mudarna tu langgatan i humaliang.

¹⁴Ingkon boanonna huhut sian peleanna bahen pelean api tu Jahowa, i ma pultahan pangkuphupi ni raoanna, ro di sandok pultahan na di bagasan i.

¹⁵Tole muse piana na dua i dohot pultahan na lohot tusi na di lansonikna, tole muse hirehire na dalhop tu ateate mangihut tu piapia buatonna.

¹⁶Ingkon tutungon ni malim do i di atas langgatan bahen sipanganon ni pelean api, gabe uap na hushus; nasa pultahan Jahowa do nampunasa.

¹⁷Uhum na hot ma on salelenglelengna ro di pinomparmuna di sude ingananmuna i: Sandok na so tupa panganonmuna pultahan manang mudar. [8†]