Read Batak Toba 3 MUSA 4 Bible Online

3 MUSA 4 - Batak Toba bible

3 MUSA 4

¹I. [1] Dung i ro ma hata ni Jahowa tu si Musa, songon on:

²Pasahat ma tu halak Israel hata on: Molo tung naung mardosa manang ise ala liluna dompak manang dia sian patik ni Jahowa, gabe diulahon manang aha na so jadi ulaonna nian.

³Tung sura malim naung miniahan nian mardosa, mambahen gasip tu bangso i, ingkon pelehononna ala ni dosana naung niulahonna i sada anak ni lombu na so marlindang tu Jahowa bahen pelean pardosaan.

⁴Ingkon boanonna lombu i tu pintu ni undungundung parluhutan i, tu adopan ni Jahowa, jala ampehononna tanganna tu ulu ni lombu i jala potongonna lombu i di adopan ni Jahowa.

⁵Dung i buaton ni malim naung miniahan i ma sian mudar ni lombu i jala boanonna do i tu bagasan undungundung parluhutan i.

⁶Dung i sornophonon ni malim ma jarijarina tu bagasan mudar i jala pistikkononna sian mudar i pitu hali di adopan ni Jahowa, tungkan jolo ni rimberimbe ni inganan na badia i. [9†]

⁷Ingkon bahenon ni malim i huhut sian mudar i tu angka tanduk ni langgatan panutungan daupa na hushus di adopan ni Jahowa, di bagasan undungundung parluhutan i; dung i sandok mudar na teba i sian lombu i, ingkon usehononna do i tu pantar ni langgatan pamelean ni pelean situtungon, na di jolo pintu ni undungundung parluhutan i. [10†]

⁸Alai anggo sandok pultahan ni lombu pelean pardosaon i buatonna do sian i, tole pultahan pangkuphupi ni raoanna ro di sandok pultahan na di bagasan i.

⁹Tole muse piana na dua i dohot pultahan na lohot tusi na di lansonikna, tole muse hirehire na dalhop tu ateate mangihut tu piapia buatonna.

¹⁰Suang songon na binuatna i sian jonggi pelean hamauliateon, jala ingkon tutungon ni malim do i di atas langgatan pamelean ni pelean situtungon.

¹¹Alai anggo bobak ni lombu i rap dohot sandok sibukna, ro di uluna dohot bitisna, raoanna dohot napana. [11†]

¹²Sandok lombu i tahe ingkon boanonna tu balian ni parsaroan i, tu sada inganan na ias, parpunguan ni sirabun, jala suda tutungonna do i di atas soban di bagasan api, ingkon di atas parpunguan ni sirabun tutungonna. [12†] II.

¹³Alai tung sura sandok luhutan Israel naung mardosa sian liluna, hape buni do hata i maradophon mata ni luhutan i, gabe diulahon nasida manang aha na maralo dompak sada sian patik ni Jahowa, na so jadi nian ulahononna, gabe sala nasida. [13†]

¹⁴Hape patar muse tu luhutan i dosa naung niulahonna i, ingkon sandok luhutan i mamelehon sada anak ni lombu bahen pelean pardosaan, jala boanonna do i tu jolo ni undungundung parluhutan i. [14†]

¹⁵Dung i ampehonon ni angka sintua ni luhutan i tangannasida tu ulu ni lombu i di adopan ni Jahowa, laos potongonna lombu i di adopan ni Jahowa.

¹⁶Dung i boanon ni malim naung miniahan i ma deba sian mudar ni lombu i tu bagasan undungundung parluhutan i.

¹⁷Dung i sornophonon ni malim ma jarijarina tu bagasan mudar i, jala pistikkononna pitu hali di adopan ni Jahowa tungkan jolo ni rimberimbe i.

¹⁸Ingkon bahenonna huhut deba sian mudar i tu angka tanduk ni langgatan i na di adopan ni Jahowa di bagasan undungundung parluhutan i, jala sandok mudar na teba i usehononna do i tu pantar ni langgatan pamelean ni pelean situtungon, na di jolo pintu ni undungundung parluhutan i.

¹⁹Alai anggo sandok pultahanna ingkon buatonna sian i jala tutungonna di atas langgatan i.

²⁰Ingkon bahenonna tu lombu i, suang songon na binahenna i tu lombu pardosaon i, ingkon songon i bahenon ni malim i, asa mambahen pardengganan di nasida, gabe marpamuati rohana di nasida.

²¹Ingkon boanonna lombu i tu balian ni parsaroan, tutungonna disi, suang songon panutungna di lombu parjolo i; i ma gabe pelean pardosaan di luhutan i. [15†] III.

²²Tung sura naung mardosa sada induk, jala diulahon manang aha na maralo tu patik ni Jahowa Debatana, tung diulahon sian liluna na so jadi ulahononhon, gabe marsala ibana.

²³Ia dung patar di ibana dosana naung niulahonna i, ingkon boanonna sada hambing tunggal na so marlindang bahen pelean.

²⁴Dung i ampehononna ma tanganna tu ulu ni hambing tunggal i, laos potongonna do i di inganan pamotongan ni pelean situtungon di adopan ni Jahowa; i ma gabe pelean pardosaan.

²⁵Dung i buaton ni malim i ma deba sian mudar ni pelean pardosaon i marhitehite jarijarina, jala bahenonna do i tu angka tanduk ni langgatan pamelean ni pelean situtungon, ia mudar na teba i usehononna do tu pantar ni langgatan pamelean ni pelean situtungon.

²⁶Alai anggo sandok pultahanna ingkon tutungonna do i di atas langgatan, suang songon pultahan ni pelean hamauliateon; ingkon songon i pardenggananna ala ni dosana bahenon ni malim, gabe marpamuati rohana di ibana. IV.

²⁷Alai tung sura mardosa sahalak situan na torop, isi ni luat i sian liluna, gabe diulahon manang aha na maralo tu patik ni Jahowa, na so jadi ulahononhon, gabe marsala ibana.

²⁸Ia dung patar di ibana dosana naung niulahonna i, ingkon boanonna sada hambing boruboru na so marlindang bahen peleanna ala ni dosana naung niulahonna i.

²⁹Dung i ampehononna tanganna tu ulu ni pelean pardosaon i, jala potongonna do i di inganan ni pelean situtungon.

³⁰Dung i buaton ni malim ma deba sian mudarna i marhitehite jarijarina, jala bahenonna do i tu angka tanduk ni langgatan pamelean ni pelean situtungon, jala mudarna na teba i usehononna tu pantar ni langgatan i.

³¹Alai anggo sandok pultahanna ingkon buatonna do i, songon pambuatna di pultahan ni pelean hamauliateon, jala tutungon ni malim do i di atas langgatan, bahen uap na hushus ni Jahowa; ingkon songon i pardenggananna ala ni dosana bahenon ni malim, gabe marpamuati rohana di ibana. [16†]

³²Alai tung sura sada anak ni birubiru binoanna bahen pelean pardosaan, ingkon boanonna do sada boruboru na so marlindang.

³³Dung i ampehononna ma tanganna tu ulu ni pelean pardosaon i, laos potongonna ma i bahen pelean pardosaan apala di inganan pamotongan ni pelean situtungon.

³⁴Dung i buaton ni malim ma deba sian mudar ni pelean pardosaon i marhitehite jarijarina, jala bahenonna do i tu angka tanduk ni langgatan pamelean ni pelean situtungon, jala sandok mudar na teba i usehononna do tu pantar ni langgatan i.

³⁵Alai anggo sandok pultahanna buatonna do, suang songon na binuatna pultahan ni anak ni birubiru sian pelean hamauliateon, ingkon tutungon ni malim do i di atas langgatan bahen pelean api di Jahowa; ingkon songon i do pardenggananna ala ni dosa naung niulahonna i, asa marpamuati rohana di ibana.