Read Batak Toba 3 MUSA 9 Bible Online

3 MUSA 9 - Batak Toba bible

3 MUSA 9

¹I. [1] Tole paualuarihon, dijou si Musa ma si Aron dohot angka anakna i ro di angka sintua ni Israel. [54†]

²Dung i ninna ma tu si Aron: Buat ma di ho sada anak ni lombu bahen pelean pardosaan dohot sada birubiru tunggal bahen pelean situtungon, unang marlindang duansa, jala boan ma i tu adopan ni Jahowa.

³Dung i dohononmu ma tu halak Israel songon on: Buat hamu ma sada hambing tunggal bahen pelean pardosaan dohot sada anak ni lombu dohot sada anak ni birubiru marumur sataon be, jala unang marlindang duansa bahen pelean situtungon.

⁴Tole muse sada jonggi dohot sada birubiru tunggal bahen pelean hamauliateon, pelehononhon di adopan ni Jahowa, tole muse sada pelean sipanganon na marsaor miak; ai sadarion ma idaonmuna Jahowa.

⁵Dung i dipamboan nasida ma, na nidokkon ni si Musa tu jolo pintu ni undungundung parluhutan i, ro huhut jumonok sandok luhutan i, laos jongjong di adopan ni Jahowa.

⁶Dung i ro ma hata ni si Musa: On ma hata na tinonahon ni Jahowa sibahenonmuna, asa idaonmuna hamuliaon ni Jahowa.

⁷Dung i didok si Musa ma mandok si Aron: Ro ma ho jumonok tu langgatan, jala pelehon ma peleanmi pardosaan dohot peleanmi situtungon mambahen pardenggananmu di ho sandiri dohot di bangso i. Dung i pasahat ma pelean ni bangso i manguras dohot nasida, songon na tinonahon ni Jahowa. [55†]

⁸Dung i jumonok ma si Aron tu langgatan i, jala diseat anak ni lombu i bahen pelean pardosaan di ibana sandiri.

⁹Dung i diboan angka anak ni si Aron ma mudar i tu ibana, disornophon ibana ma jarijarina tu bagasan mudar i, jala didaishon tu angka tanduk ni langgatan i, ianggo mudar na tinggal i diusehon do tu pantar ni langgatan i.

¹⁰Alai anggo pultahanna dohot piana ro di hirehire na ampe tu ateate sian pelean pardosaon i, ditutung ma i di atas langgatan, songon na tinonahon ni Jahowa tu si Musa. [56†]

¹¹Alai anggo sibukna dohot hulingkulingna suda ditutung di balian ni parsaroan i.

¹²Dung i diseat ibana ma pelean situtungon i, anggo mudarna i diboan angka anak ni si Aron ma tu ibana, laos dipistikkon ma i tu langgatan i humaliang. [57†]

¹³Diboan nasida ma dohot pelean situtungon i marponggolponggol ro di uluna tu ibana, asa tutungonna di atas langgatan.

¹⁴Jadi dung diburi ibana raoanna dohot patna, laos ditutung ma i di ginjang ni pelean situtungon i di atas langgatan. II.

¹⁵Dung i diboan ma dohot pelean ni situan na torop i, dibuat ma dohot hambing tunggal i bahen pelean pardosaan manguras bangso i, diseat ma i bahen pelean pardosaan suang songon parjolo i.

¹⁶Dung i dipelehon ma muse pelean situtungon i, hombar tu aturan pamelehonna hian.

¹⁷Dipelehon ma dohot pelean sipanganon i, dibuat ma sian i sanggolom, laos ditutung ma i di atas langgatan, pulik sian pelean situtungon sian manogotna i.

¹⁸Dung i diseat ma jonggi i dohot birubiru tunggal i bahen pelean hamauliateon manguras bangso i; diboan angka anak ni si Aron ma mudar i tu ibana, laos dipispishon ma i tu langgatan i humaliang.

¹⁹Alai anggo pultahan sian jonggi i dohot sian birubiru tunggal i, ro di ihurna dohot pultahan panapti ni raoanna ro di pia dohot hirehire na ampe tu ateate. [58†]

²⁰Luhut pultahan i diampehon nasida tu atas andora ni pelean i, laos ditutung ibana ma sandok pultahan i di atas langgatan.

²¹Alai anggo andora i dohot hae jolo siamun diteatea si Aron ma i bahen pelean teateaan di adopan ni Jahowa, songon na tinonahonna tu si Musa. III.

²²Dung i dipaherbang si Aron ma tanganna tu atas ni bangso i, asa mamasumasu nasida. Jadi dung tolhas dipelehon pelean pardosaan, pelean situtungon dohot pelean hamauliateon i, tuat ma ibana. [59†]

²³Dung i masuk ma si Musa dohot si Aron tu bagasan undungundung parluhutan i. Ruar muse sian i, dipasupasu nasida ma bangso i. Jadi sandok bangso i ma marnida hamuliaon ni Jahowa. [60†]

²⁴Ai ruar ma sada api sian adopan ni Jahowa, jala suda dipangan pelean situtungon dohot pultahan na di atas langgatan i. Jadi dung diida sandok bangso i pangalahona, marolopolop ma nasida, laos manungkap tu tano. [61†]