Read Batak Toba PANURIRANG JEREMIA 29 Bible Online

PANURIRANG JEREMIA 29 - Batak Toba bible

PANURIRANG JEREMIA 29

¹I. [1] On do hata ni surat na tinongos ni panurirang Jeremia sian Jerusalem tu pasipasi ni sintua angka na tarbuang i dohot tu angka malim dohot tu angka panurirang dohot tu sandok bangso i, angka naung binuangkon ni si Nebukadnesar sian Jerusalem tu Babel.

²Dung tarboan raja * Jekonya dohot jolmana ro di angka na pinangkis, angka induk ni Juda dohot Jerusalem dohot angka pande hau dohot pande bosi sian Jerusalem. [380†]

³Na tinongosna tu Babel marhite sian si Eleasa, anak ni si Sapan, dohot si Gemaria, anak ni si Hilkia, na sinuru ni si Sedekia, raja sian Juda, tu si Nebukadnesar raja sian Babel, ninna do:

⁴Songon on do hata ni Jahowa Zebaot, Debata ni Israel, tu saluhut naung tarbuang, angka na hubuangkon sian Jerusalem tu Babel:

⁵Pauli hamu angka bagas, laos ingani hamu, jala pungka hamu angka porlak, laos pangan hamu parbuena!

⁶Buat hamu ma parompuan bahen jolmamu, asa tumubuhon anak dohot boru hamu; paorohon hamu anakmuna jala boruhon hamu borumuna, asa tumubuhon anak dohot boru nasida, asa sopar hamu disi, jala unang moru bilanganmuna.

⁷Ringkoti hamu huhut hasonangan ni huta habuanganmuna na hubahen i, jala tangiangkon hamu nasida tu Jahowa, ai molo marhasonangan huta i, marhasonangan ma dohot hamu.

⁸Songon on do hata ni Jahowa Zebaot, Debata ni Israel: * Unang olo hamu paotootoon ni panurirangmuna manang pangarunding angka na di tongatongamuna, jala unang patangitangi hamu nipi, angka na niipimuna. [381†]

⁹Ai sipaotooto do na sinurirangkonnasida tu hamu marhitehite goarhu; * ndang ahu marsuru nasida, ninna Jahowa. [382†] II.

¹⁰Ai songon on do hata ni Jahowa: Molo dung gok * na pitupulu taon i di Babel, ebatanku ma hamu dohot pasintongkon tu hamu bagabagangku na denggan i asa mamboan hamu mulak tu inganan on. [383†]

¹¹Ai nunga tangkas huboto sangkap angka na husangkapi taringot tu hamu, ninna Jahowa, sangkap hasonangan do tahe ndada tu hamagoan, asa ahu mangalehon tu hamu ujung na hinalungunhonmuna.

¹²Jadi pajoujouonmuna ma ahu, huhut laho hamu martangiang tu ahu, gabe tangihononku ma hamu.

¹³Jala luluanmuna ma ahu laos jumpang hamu, molo tung dilului hamu ahu sian nasa rohamuna. [384†]

¹⁴Jadi jumpang hamu ma ahu, ninna Jahowa, jala * mulak bahenonku angka na tarbuang sian hamu, jala papunguonku hamu sian saluhut bangso parbegu dohot sian saluhut inganan haambolonganmuna na sai laon na hubahen i, ninna Jahowa, jala mulak hamu boanonku tu inganan haborhatanmuna hian laho tarbuang. [385†] III.

¹⁵Hape didok hamu do: Nunga adong panurirang di hami di Babel, dipahehe Jahowa.

¹⁶Ai songon on do hata ni Jahowa taringot tu raja, na marhabangsa di habangsa ni si Daud dohot taringot tu sandok bangso na maringan di huta on, i ma hahaanggimuna angka na so tarboan rap dohot hamu tu habuangan.

¹⁷Songon on do hata ni Jahowa Zebaot: Ida ma, ahu manongoshon tu tongatonganasida podang, haraparon dohot begu antuk, jala ahu mambahen nasida * songon antajau na busuk, angka na so tarpangan dibahen hinabusukna. [386†]

¹⁸Jala ahu paburuburu nasida marhitehite podang, haraparon dohot begu antuk, jala bahenonku nasida gabe siruparupaon * ni saluhut harajaon, angka na di tano on, gabe bura jala gabe hasonggoton, gabe sirehereheon dohot siinsakinsahan di tongatonga ni saluhut bangso parbegu, haambolongannasida na hubahen i. [387†]

¹⁹Ala na so ditangihon nasida angka hatangki, ninna Jahowa, uju na husuru tu nasida angka naposongku, angka panurirang i, tole manogotna i, tole potangna, hape ndang olo hamu manangihon hatanasida i ninna Jahowa. [388†] IV.

²⁰Dibahen i tangihon ma hata ni Jahowa, * saluhut hamu angka na tarbuang i, angka naung husuru sian Jerusalem tu Babel. [389†]

²¹Songon on do hata ni Jahowa Zebaot, Debata ni Israel, taringot tu si Ahab, anak ni si Kolaia dohot taringot tu si Sedekia anak ni si Maaslia, * angka na manurirangkon sipaotooto tu hamu marhitehite goarhu: Ida ma, ahu na pasahathon nasida tu bagasan tangan ni si Nebukadnesar raja sian Babel, asa mate dibunu nasida di jolo ni matamuna. [390†]

²²Jala ingkon buaton sian nasida sada bura di saluhut angka na tarbuang sian Juda, angka na di Babel, songon on: Sai dibahen Jahowa ma tu ho suang songon na tu si Sedekia dohot songon na tu si Ahab, na tinutung ni raja sian Babel di bagasan api.

²³Ala naung binahennasida haotoon di Israel, jala marmainan nasida dohot jolma ni dongannasida, jala dihatahon hata sipaotooto marhitehite goarhu, na so hutonahon i tu nasida. Alai ahu do sibotosa jala sitindangisa, ninna Jahowa. V.

²⁴Jala tu si Semaya isi ni Nehelam i, ingkon dohononmu songon on:

²⁵Boti hata ni Jahowa Zebaot, Debata ni Israel, ala naung tinongosmi angka surat marhitehite goarmu tu saluhut halak angka na di Jerusalem dohot tu malim * Sepania, anak ni si Maaseya dohot tu saluhut angka malim, songon on: [391†]

²⁶Nunga dipabangkit Jahowa ho gabe malim singkat ni malim Joiada, asa hamu gabe siramoti joro ni Jahowa mangaranapi ganup * baoa na lalaen dohot na manurirangi, asa bahenonmu ibana tu hurungan dohot tu beangan. [392†]

²⁷On pe boasa tung so mangonai hata ho tu si Jeremia isi ni Anatot, na manurirangi tu hamu?

²⁸Ala naung tinongosna i tu hami tu Babel mandok: Laon dope hamu disi. Pauli hamu ma angka bagas jala ingani hamu, jala pungka hamu angka porlak asa panganonmuna parbuena.

²⁹Jadi dijaha malim Sepania ma surat i tu pinggol ni panurirang Jeremia.

³⁰Dung i ro ma hata ni Jahowa tu si Jeremia songon on:

³¹Suruhon ma suruanmu manopot saluhut angka naung tarbuang paboahon: Songon on do hata ni Jahowa taringot tu si Semaya isi ni Nehelam i: Ala naung manurirangi si Semaya tu hamu, so manang ahu marsuru ibana, jala dipanalom rohamuna marhaposan tu sipaotooto.

³²Dibahen i songon on do hata ni Jahowa: Ida ma, marlulu ma ahu dompak si Semaya isi ni Nehelam i dohot dompak pinomparna. Ndang jadi adong di ibana nanggo sahalak, na maringan di tongatonga ni bangso on, jala ndang jadi idaonna na denggan sibahenonku tu bangsongkon ninna Jahowa; ala naung hinatahonna * parbalion sian Jahowa. [393†]