Read Batak Toba PANURIRANG JEREMIA 3 Bible Online

PANURIRANG JEREMIA 3 - Batak Toba bible

PANURIRANG JEREMIA 3

¹I. [1] Dung i ninna do songon on: Tung sura * dipaulak baoa jolmana, gabe laho boruboru i sian ibana marsinonduk mangan tu na asing, tung tagamon mulak ma ibana tu boruboru i? Nda ramun situtu ma luat bongkai? Alai anggo ho, atik pe naung torop mangalangkup ho, sai mulak ma tu ahu, ninna Jahowa. [33†]

²Manaili ma ho dompak angka robean, jala ida! Didia na so maruhum na jat ho? Hundul do ho di pinggol ni angka dalan paimaimahon nasida, songon halak Arab di halongonan, gabe diramuni ho tano i marhitehite parsibabijalangonmu dohot hajahatonmu. [34†]

³Jadi alani tarambat udan sipaha pitu, jala ndang ro udan sipaha sada. Alai marpardompahan sibabijalang do ho, ndang diboto ho na maila. [35†]

⁴Nda joujou do ho olat ni rasirasa nuaeng mandok tu ahu: Ale amang, partogingku do ho olat ni sidakdanakonku!

⁵Tung salelenglelengna do ulaning ibana manjujur, jala marsunisunian tongtong? Ida ma, songon i do hatam, alai diulahon ho do angka hajahaton, lam ditambai ho dope. [36†] II.

⁶Dung i ninna Jahowa ma mandok ahu uju di ngolu ni raja Josia: Diida ho do, na binahen ni Israel na marbalik i? Tung laho do ibana tu * nasa dolok na buntul dohot tu toru ni nasa hau na rata, jala maruhum na jat disi. [37†]

⁷Jadi ningku ma, nang dung diulahon sude angka i: Sai mulak ma ho tu ahu! Alai ndang olo ibana mulak. Jadi diida anggina, Juda na marbalik i ma i.

⁸Alai huida, atik pe hupaulak * Israel na marbalik i, na maruhum na jati, ala ni saluhutna i, jala hulehon surat patilaho tu ibana, hape ndang mabiar anggo + anggina Juda na so maruhum i, lam laho do dohot ibana maruhum na jat. [38†]

⁹Jadi sian soara ni parsibabijalangonna tarramun ma tano i, jala maruhum na jat ibana tu batu dohot tu hau.

¹⁰Alai songon i pe angka i sudena, laos so mulak tu ahu anggina, Juda na so maruhum i sian nasa rohana, marpangansi do tahe, ninna Jahowa. III.

¹¹Dibahen i umbahen didok Jahowa mandok ahu: Tigoran dope roha ni Israel na marbalik i sian Juda na so maruhum i. [39†]

¹²Laho ma ho, jala tingtingkon angka hata on dompak utara, jala dok ma: Sai mulak ma ho, ale Israel na marbalik i, ninna Jahowa; unang pe huparupi bohingku mida hamu, ai * pardengganbasa do ahu, ninna Jahowa, ndang manjujur ahu salelenglelengna. [40†]

¹³Asal ditanda ho hajahatonmu, na tinundalanmu Jahowa Debatam, jala mulahulak ho tu angka debata sileban di toru ni saluhut hau na rata, jala ndang ditangihon hamu soarangku, ninna Jahowa.

¹⁴Sai mulak ma, hamu ale angka anak na marbalik i, ninna Jahowa, ai * ahu do harajaanmuna hian, jala alaponku do hamu + sahalak sian sada huta, jala dua halak sian sada marga, jala togihononku do hamu tu Sion. [41†]

¹⁵Jala lehononku tu hamu angka parmahan, hombar tu lomo ni rohangku, jadi marparbinotoan, jala marroha nasida marmahan hamu. [42†]

¹⁶Dung i masa ma, ia dung torop jala mabue hamu di tano i di angka ari sogot, ninna Jahowa, ndang be dohonon ni halak: Poti parpadanan ni Jahowa! Ai ndang be tubu di roha ni manang ise, manang paingotingotonna, jala ndang be lulululuanna manang bahenonna na asing.

¹⁷Goaron ni halak ma Jerusalem di tingki na sasada i: Habangsa ni Jahowa, jala * marpungu tusi sude angka parbegu, tu goar ni Jahowa na di Jerusalem, jala ndang be + paihutonnasida hatangkangon ni rohanasida na jati. [43†]

¹⁸Di angka ari i laho ma pinompar ni Juda tu pinompar ni Israel jala rap ro nasida sian tano na di utara tu tano na huturpukhon tu ompumuna mambahen teanteananna. [44†]

¹⁹Jala nunga pola hudok: Sai pagabeonku do ho di anak, jala lehononku tu ho tano hasudungan ni roha, * partalian hamuliaon di tongatonga ni angka parangan sian angka parbegu! Jala nunga pola hudok: + Damang do ahu goaronmu, jala ndang be tundalanmu ahu. [45†]

²⁰Alai tongon tahe, songon panadingkon ni parompuan di puangna, songon i do panadingkonmuna di ahu, ho ale pinompar ni Israel, ninna Jahowa.

²¹Tarbege do suara di angka robean, partatangison ni anak ni Israel, ala diparoa nasida dalannasida, ala dihalupahon nasida Jahowa Debatanasida i.

²²Sai mulak ma, hamu ale angka anak na marbalik i, asa hupamalum panundalionmuna i! * Ida ma, na ro ma hami manopot ho, ai ho do Jahowa Debatanami. [46†]

²³Tongon tahe, ndang adong hirimon hatuaon sian angka robean, manang sian angka dolokdolok, ai holan sian Jahowa Debatanta ro hatuaon ni Israel.

²⁴Alai haurahon do manganhon na hinangaluthon ni angka ompunta sian sidakdanahonta: Birubirunasida dohot jongginasida, anaknasida dohot boruna.

²⁵Marpangkean do hita di haurahonta, jala dihungkupi haleaonta do hita, ala mardosa hita dompak Jahowa Debatanta, hita tahe dohot ompunta sian sidakdanahonta rasirasa sadarion, jala ndang itatangihon soara ni Jahowa Debatanta.