Read Batak Toba PANURIRANG JEREMIA 30 Bible Online

PANURIRANG JEREMIA 30 - Batak Toba bible

PANURIRANG JEREMIA 30

¹I. [1] On do hata na ro tu si Jeremia sian Jahowa:

²Songon on do hata ni Jahowa, Debata ni Israel: Surathon ma di ho saluhut hata angka naung huhatahon tu ho, tu sada buku. [394†]

³Ai ida ma, na ro do angka ari sogot, ninna Jahowa, mulak ma disi * togihononku angka na tarbuang sian bangsongku Israel dohot Juda, ninna Jahowa, jala mulak nasida togihononku tu tano naung hulehon i tu ompunasida, asa nasida nampunasa. [395†]

⁴On do huhut hata, angka naung hinatahon ni Jahowa taringot tu Israel dohot taringot tu Juda.

⁵Ai songon on do hata ni Jahowa: Hubege hami do soara angguhangguk, hatahutan, jala ndang adong hasonangan.

⁶Ua sungkunsungkun i jala tangkasi humaliang hamu manang dung do baoa mangae posoposo? Boasa tung huida ganup baoa mangampehon tanganna tu gantingna, * songon inaina na mangae posoposona, jala muba saluhut bohi marlangan? [396†]

⁷Oe jea tonanon! Ai tung na * bolon ari na sasada i, na so adong tudosna, jala tingki hagogotan do i di Jakkob; alai atik pe songon i ingkon paluaon ibana sian i. [397†]

⁸Dung i di ari na sasada i, ninna Jahowa Zebaot, ponggolhononku ma * augana sian tangkuhukmu, jala rapuanku angka tali pangihot na di ho, jala ndang be halak ruar marhatobanhon ibana. [398†]

⁹Ingkon Jahowa Debatanasida i oloannasida dohot * si Daud rajanasida i, sipatindangonku di nasida. [399†]

¹⁰Alai anggo ho, ale Jakkob naposongki, * unang ho mabiar, ninna Jahowa, jala unang tarsonggot ho, ale Israel; ai ida ma, ahu paluahon ho sogot sian luat na dao dohot pinomparmu sian tano habuangannasida; jala ingkon mulak Jakkob marnalom ni roha jala marsonangsonang, jala ndang adong nanggo sahalak na manonggoti. [400†]

¹¹Ai ahu do donganmu, ninna Jahowa, laho paluahon ho; ai sun siap do bahenonku saluhut bangso parbegu haambolonganmu na hubahen i na sai laon, alai anggo ho ndang siap bahenonku; ingkon pinsangonku do ho nian * hombar tu uhum, jala ndang tarbahen so toruanku ho. [401†] II.

¹²Ai songon on do hata ni Jahowa: * Tung na targisik do bugangmu, jala bernit situtu torutoru na niaemi. [402†]

¹³Ndang adong nanggo sahalak na mangondihon ho di paruhuman laho pauliulihon bugangmi, jala ndang adong taoar pamalumhon bugangmi.

¹⁴Nunga dihalupahon saluhut angka alealem ho, ndang usouso nasida di ho, ai harageon ni musu hutonahon tu ho, pinsangpinsang ni halak pangarupa, ala ni godang ni hajahatonmu, tung na so habilangan do angka dosami.

¹⁵Boasa tung mangangguhi ho ala ni bugangmu, ala na so hadaonan sahitmu? Binahen ni hinadeak ni hajahatonmu, ala na so habilangan angka dosam umbahen na songon i hubahen tu ho. [403†]

¹⁶Dibahen i luhut angka na mamondut ho, ingkon bonduton do sogot, jala luhut angka na manosak ho, ingkon rap tarboan nasida sogot tu habuangan, jala halak na mamupusi ho, ingkon pupusan sogot, jala luhut halak na mandobo ho, ingkon pasahatonku doboon ni halak. [404†]

¹⁷Ai ahu ma * patupahon hahisaron di ho, jala pamalumonku ho sian bugangmu, ninna Jahowa, ala si habuangan goarmu didok halak ale Sion, na so parduli ni halak nanggo sada. [405†] III.

¹⁸Songon on do hata ni Jahowa: Ida ma, * mulak ma togihononku angka na tarbuang sian undungundung ni si Jakkob jala marpangulahi rohangku mida angka ingananna; jala ingkon paulion muse huta i di atas dolokna jala bagas parhabangsaan i inganan songon uhumna hian. [406†]

¹⁹Jala ingkon ruar sian i soara pujipujian dohot soara ni halak na marlas ni roha; ai ahu patorophon sogot nasida, jala ndang jadi moru nasida, jala marmulia nasida bahenonku, jala na so tupa marmetmet nasida. [407†]

²⁰Ia anaknasida ingkon songon di na robi do, jala parluhutanna ingkon hot di jolongku, jala marlulu do ahu sogot tu saluhut halak na mangarupa ibana.

²¹Jala * jujungan ihutanna, ingkon ro sian ibana, jala rajana bangkit sian tongatongana laos ahu pajonokkon ibana, asa jumonok ibana tu ahu, ai tung ise ma na hum sumeahon dirina laho jumonok tu ahu, ninna Jahowa? [408†]

²²Jadi ingkon hamu gabe bangsongku, jala ahu gabe Debatamuna. [409†]

²³Ida ma, ruar do sada habahaba sian Jahowa, dohot parpiarpiar ni rimas, sada habahaba poting baliung na mamboan hamagoan, manipa tu ulu ni halak parjahat. [410†]

²⁴Ndang tagamon mombun parpiar ni muruk ni Jahowa, nda jolo sahat dibahen jala di hajongjongkon sangkapsangkap ni rohana hian. Di ujung ni angka ari sogot tangkas antusanmuna i!