Read Batak Toba PANURIRANG JEREMIA 4 Bible Online

PANURIRANG JEREMIA 4 - Batak Toba bible

PANURIRANG JEREMIA 4

¹I. [1] Molo tung mulak ho, ale Israel, ninna Jahowa, tu ahu ma ho mulak; jala molo tung dipadao ho angka hasogiron pineopmu sian jolongku, ndang tagamon mompasompas ho.

²* Marmangmang ma ho tu Jahowa na mangolu i di bagasan hasintongan, di bagasan uhum dohot di bagasan hatigoran jadi pasupasuon ni angka parbegu dirina di bagasan ibana jala mamujimuji mida ibana. [47†]

³Ai songon on do hata ni Jahowa tu angka baoa sian Juda dohot tu isi ni Jerusalem: * Rabi hamu ma tombak an di hamu, jala unang hamu manabur tu tongatonga ni sihupi. [48†]

⁴* Sunati hamu ma dirimuna di Jahowa, jala padao hamu hulup ni rohamuna, hamu baoa sian Juda dohot hamu isi ni Jerusalem, asa unang manombo rimashu songon api, jala marsigorgor, hape ndang adong na tuk mangintopi, ala ni hinajahat ni angka pambahenanmuna. [49†] II.

⁵Baritahon hamu ma di Juda, jala patubegehon hamu di Jerusalem, jala dok hamu: Palu hamu ma sarune di luat i; pangiar hamu ma soaramuna maningtingkon: Marpungu ma hamu, asa itatopot angka huta na gonting.

⁶Patindang hamu ma partonggol dingkan Sion, rim ma hamu maporus, unang ngongong, ai * paroonku ma jea sian utara dohot hamagoan bolon. [50†]

⁷Nunga nangkok singa i sian pangaropanna, jala nunga borhat siago angka parbegu, ruar sian ingananna i mambahen halongonan tano i, jala tarulang angka hutam, soada be pangisina.

⁸Dibahen i hohoshon hamu ma abit tangki mananangisi jala mangandungi ma hamu, ai ndang tagamon mulak parpiar ni muruk ni Jahowa sian hita. [51†]

⁹Jadi masa ma di ari bongkai, ninna Jahowa, tarjepol ma roha ni raja dohot roha ni angka partogi, jala tarhatotong angka malim, jala tarsonggot angka panurirang.

¹⁰Ianggo ahu ningku: Oe, ale Tuhan Jahowa! Songon ma sipaotooto situtu dibahen ho tu bangso on dohot tu isi ni Jerusalem, di na nidokmu: * Mardamedame ma hamu! Hape tolpus ro di ateate podang i. [52†]

¹¹Di tingki uju i dohonon ma tu bangso on dohot tu isi ni Jerusalem: Ro do alogo na mohop sian angka robean ni halongonan, tumulus dalan dompak boru ni bangsongku ndada laho marsege manang paiashon.

¹²Alogo na gumogo sian nasida ro sian ahu. Dohot ma ahu nuaeng mardabudabu dohot nasida.

¹³Ida ma, manaek do ibana, songon ombun, jala songon halisungsung angka huretana; dumoras do angka hodana sian lali. Marjea ma hita on, ai nunga pesan hita.

¹⁴* Buri ma roham sian hajahaton i, ale Jerusalem, asa maruli panumpahion ho. Sadia leleng on marmalam angka sangkap ni jeam di bagasan roham. [53†]

¹⁵Ai nunga tarbege barita sian Dan, jala adong na patubegehon jea sian dolok Epraim.

¹⁶Pabotohon hamu ma tu angka parbegu, ida ma, tingtingkon hamu ma tu Jerusalem: Nunga ro angka ari partungkum sian tano na dao, angka na marsurak dompak angka huta ni Juda.

¹⁷Doshon angka pamuro di ladang * pangkalianginasida di ho, ala dialo nasida ahu, ninna Jahowa. [54†]

¹⁸Dalanmu dohot pambahenanmu mangkorhon angka i di ho, jea ni roham do i, umbahen tolhas ro di pusupusum na paet i. [55†] III.

¹⁹Inang butuhangkon, butuhangkon! Hansitnai huhilala ateatengku di bagasan, sai mulbahulbak do pusupusungku, ndang tarbahen ahu sip, ala naung hubege soara ni sarune, dohot hariburon ni hamusuon. [56†]

²⁰Mardapotdapot angka barita hataluan di tingtingkon; tung sandok tano i tarulang do; sompong do maloha angka soposopongku, di na satongkin do angka undungundungku.

²¹Sadia leleng on idaonku partonggol i, begeonku soara ni sarune?

²²Ai na oto do bangsongku; ia ahu, ndang ditanda nasida, angka anak na oto do nasida jala ndang marroha; angka na bisuk do nasida mambahen na jat, alai mambahen na denggan ndang diboto nasida.

²³Hutailihon tano i, jala ida ma, halongonan dohot halalanga! Hubereng dompak langit i, hape ndang marhatiuron.

²⁴Hubereng angka dolok, jadi ida ma, humuntal do sudena i jala humutur do sude angka robean.

²⁵Hubereng humaliang, jadi ida ma, ndang adong jolma, jala nunga marpurpur sude pidong angka na martongatonga langit.

²⁶Hubereng hauma bosar, jadi ida ma, nunga gabe halongonan, jala nunga maloha sude angka huta maradophon Jahowa, maradophon parpiar ni rimasna.

²⁷Ai songon on do hata ni Jahowa: Gabe halongonan do sandok tano i, alai * nda tung laos siap bahenonku. [57†]

²⁸Dibahen i margudompong sandok tano i, jala mangkolom langit i di ginjang ala naung hudok jala husangkapi, jala ndang husolsoli rohangku, jala ndang be mulak rohangku sian i.

²⁹Maradophon soara ni angka parsihundul dohot jolma panior, maporus do sandok isi ni huta i, dibongoti do angka parholipholipan, jala dipanaek do angka sapsap bire; tung langa do sandok huta i, ndang adong be jolma pangisina.

³⁰Ia ho ale na tartaban, aha do bahenonmu? Nang pe disolukkon ho siangmalam, jala marpangkean horunghorung sere, jala marpangiri ho pasihar panailim, laos so marniula do panjengkarim; sai na marhu ni roha do angka haholonganmu mida ho, angka ditahi nasida do hosam.

³¹Ai hubege do soara songon soara ni boruboru na mangae posoposo, soara hagogotan songon na tumubuhon buhabaju; soara ni boru Sion, na marhoi pahortanghortangkon tanganna mandok: Soro ni aringkon, ai mandate ma annon tondingku bahenon ni angka pamunu.