Read Batak Toba PANURIRANG JEREMIA 41 Bible Online

PANURIRANG JEREMIA 41 - Batak Toba bible

PANURIRANG JEREMIA 41

¹I. [1] Jumpang papitubulanhon ro ma * si Ismael anak ni si Netania, tubu ni si Elisama sian pinompar ni rajai rap dohot angka induk pinabangkit ni rajai udur, dohot sampulu halak mandapothon si Gedalia, anak ni si Ahikam, tu Mispa, jala rap mangan sagusagu nasida disi di Mispa. [520†]

²Dung i hehe ma si Ismael anak ni si Netania dohot na sampulu halak angka donganna i, gabe dibunu nasida * si Gedalia, anak ni si Ahikam, tubu ni si Sapan marhitehite podang, gabe mate ibana naung pinabangkit ni raja sian Babel gumomgom luat i. [521†]

³Dibunu si Ismael huhut saluhut halak Jahudi angka dongan ni si Gedalia di Mispa, ro di halak Kasdim angka na jumpangsa disi, angka halak parmusu.

⁴Jadi paduaarihon, dung binununa si Gedalia, laos so botobotoan ni manang ise dope.

⁵Ro ma angka baoa sian Sikem, sian Silo dohot sian Samaria, ualupulu halak toropna, angka na targorbang misena jala na sinansanan pangkeanna jala * na nirarik dagingna jala pelean sipanganon dohot daupa di bagasan tangannasida laho mamboan tu joro ni Jahowa nian. [522†]

⁶Jadi ruar ma si Ismael, anak ni si Netania, sian Mispa, manjumpangkon nasida, mardalandalan huhut tumatangis. Jadi dung pajumpang nasida, ninna ma mandok nasida: Beta hita manopot si Gedalia anak ni si Ahikam!

⁷Alai dung sahat nasida tu tongatonga ni huta i, diseati si Ismael, anak ni si Netania ma nasida, laos direongkon tu godung, ibana dohot angka baoa donganna i.

⁸Alai jumpang do sampulu baoa di tongatonganasida angka na mandok tu si Ismael: Sai unang hami bunu, ai adong do di hami arta angka na buni di ladang, angka eme, miak dohot situak ni loba. Jadi melok rohana, ndang dibunu anggo nasida rap dohot hahaangginasida i.

⁹Ia godung panimpalan ni saluhut bangke ni angka baoa, angka na binununa i, di lambung ni si Gedalia, i ma godung na binahen ni * raja Asa maradophon si Baesa raja sian Israel; i ma na ginohan ni si Ismael, anak ni si Netania dohot halak angka na mate tartullang. [523†]

¹⁰Laos diboan si Ismael do sandok pasipasi ni bangso i na di Mispa: Angka boru ni rajai ro di sandok situan na torop na tinggal di Mispa, na pinasahat ni si Nebusaradan, sintua ni angka parangan i tu si Gedalia, anak ni si Ahikam; saluhut nasida diboan si Ismael, anak ni si Netania, laos laho ibana taripar tu halak Amon. II.

¹¹Jadi dung dibege * si Johanan, anak ni si Karea ro di sude induk ni parangan donganna i, saluhutna hajahaton, na binahen ni si Ismael, anak ni si Netania. [524†]

¹²Diarahon nasida ma saluhut parangan, asa laho marmusu dompak si Ismael, anak ni si Netania, jadi dapot nasida ma ibana mardonokkon * aek godang na di Gibeon. [525†]

¹³Jadi dung diida sandok bangso dongan ni si Ismael, si Johanan, anak ni si Karea, ro di saluhut induk ni parangan donganna i, las ma rohanasida.

¹⁴Jala sandok bangso na binoan ni si Ismael sian Mispa, marbalik muse laho mulak mandapothon si Johanan, anak ni si Karea.

¹⁵Alai anggo si Ismael, anak ni si Netania, sanga do maporus rap dohot ualu halak maradophon si Johanan, gabe laho ibana mandapothon halak Amon. III.

¹⁶Dung i diarahon si Johanan, anak ni si Karea dohot saluhut induk ni parangan donganna i ma sandok pasipasi ni bangso i, na mulak binoanna sian si Ismael, anak ni si Netania, sian Mispa, dung binununa si Gedalia, anak ni si Ahikam: Baoa angka na somal marmusu, angka parompuan dohot dakdanak ro di naposo, angka na mulak binoanna sian Gibeon.

¹⁷Jadi laho ma nasida laos marsaro di ambatan * Kim Kana mardonokkon. Betlehem, asa + borhat nasida mardalan tu Misir. [526†]

¹⁸Maradophon halak Kasdim, ala biarna mida nasida, ala naung binunu ni si Ismael, anak ni si Netania si Gedalia anak ni si Ahikam, naung pinabangkit ni raja sian Babel gumomgom luat i.