Read Batak Toba PANURIRANG JEREMIA 7 Bible Online

PANURIRANG JEREMIA 7 - Batak Toba bible

PANURIRANG JEREMIA 7

¹I. [1] On ma hata na ro tu si Jeremia sian Jahowa songon on:

²Laho ma ho jongjong tu pintu ni bagas ni Jahowa, jala tingtingkon disi hata on, jala dok ma: Tangihon ma hata ni Jahowa, ho ale sandok Juda, angka na bongot tu bagasan pintu on laho marsomba tu Jahowa.

³Songon on do hata ni Jahowa Zebaot, Debata ni Israel: Padenggan hamu ma dalanmuna dohot pambahenanmuna, asa hupaian hamu di inganan on marsonangsonang. [96†]

⁴Unang ma marhaposan hamu di angka hata sipaotooto, angka na mandok: Joro ni Jahowa, joro ni Jahowa, joro ni Jahowa do on!

⁵Alai molo dipadenggan hamu situtu dalanmuna dohot pambahenanmuna; molo dibahen hamu uhum hatigoran ganup baoa tu donganna.

⁶Molo so dirupa hamu * halak na buro, na tading di lampin, boruboru na mabalu, jala unang usehon hamu mudar na so marpipot di inganan on jala unang ihuthon hamu angka debata sileban, gabe hamagoan di hamu. [97†]

⁷Jadi paianonku ma hamu di inganan on, di tano naung hubasabasahon tu ompumuna sian na robi, ro di saleleng ni lelengna. II.

⁸Alai tahe ida ma, marhaposan tu angka hata sipaotooto do hamu, angka na so marguna.

⁹Tung beha ma partorangna? Manangko hamu mambunu, mangalangkup, manolon na tutu, manutung daupa tu Baal, jala mangihuthon tu debata sileban angka na so tinandamuna hian. [98†]

¹⁰Dung i angka ro hamu tindang di jolongku, di bagasan joro on na targoar tu goarhu, jala didok hamu: * Nunga malua hami laho mambahen saluhut angka hasogiron on. [99†]

¹¹Tung gabe * liang ni angka pandobo do joro on, na targoar tu goarhu di rohamuna? Ahu pe, nunga tangkas huida, ninna Jahowa. [100†]

¹²Ua tung laho hamu tu ingananku na jolo, na di * Silo, parmianan ni goarhu hubahen di na robi, jala ida hamu na hubahen tusi ala hajahaton ni bangsongku Israel. [101†]

¹³Nuaeng pe, ala diulahon hamu saluhut angka pambahenan on, ninna Jahowa, jala * hupasogot mangkulingi hamu, hape ndang olo hamu manangihon, jala hujou hamu, hape ndang olo hamu mangalusi. [102†]

¹⁴Jadi * bahenonku ma tu joro, na targoar tu goarhu, na pinangasahonmuna, jala bahenonku do tu inganan na hubasabasahon tu ompumuna, suang songon na hubahen tu Silo na jolo. [103†]

¹⁵Jala bolongkononku ma hamu sian jolongku, * songon na hubolongkon saluhut hahaanggimuna, i ma sandok pinompar ni Epraim. [104†] III.

¹⁶Ia ho, unang ondihon bangso on, jala unang pangiar angguhangguk dohot tangiangmu mangondihon nasida, jala unang sai datdati mangido tu ahu, ai ndang olo ahu tumangihon ho. [105†]

¹⁷Ndang diida ho huroha na binahennasida di angka huta ni Juda dohot di angka alaman ni Jerusalem?

¹⁸Papungupungu soban angka dakdanak i, mangopan api angka amaama, mandogili na niudi angka inaina laho mambahen juada di * langit, jala diusehon nasida tuak tangkasan di angka debata sileban laho mangarsahi ahu. [106†]

¹⁹Tung ahu ma na niarsahannasida disi? Ninna Jahowa. Nda laos nasida niarsahanna bahen haurahon ni bohinasida i?

²⁰Dibahen i songon on do hata ni Tuhan Jahowa: Ida ma, usehononku ma murukku dohot parpiar ni rimashu tu inganan on, tu jolma dohot tu pinahan dohot tu hau di ladang dohot parbue ni tano i, asa marsigorgor, jala ndang adong na mangintopi. IV.

²¹Songon on do hata ni Jahowa Zebaot, Debata ni Israel: Tambai hamu angka pelean situtungon dohot sipotongon, jala pangan hamu ma juhut. [107†]

²²Ai ndang hudokkon ompumuna, jala ndang hutonahon tu nasida, uju di ari na hutogihon nasida ruar sian tano Misir, taringot tu pangalaho ni pelean situtungon, manang pelean sipotongon. [108†]

²³Alai hata on do na hutonahon tu nasida, songon on: Sai tangihon hamu ma soarangku, asa ahu gabe Debatamuna, jala hamu gabe bangsongku; antong dalan i hamu ma saluhut dalan, angka na hutonahon tu hamu, asa marsonangsonang hamu. [109†]

²⁴Alai ndang olo nasida manangihon, jala ndang ditarehon nasida pinggolnasida i, alai sai mardalani nasida di bagasan sangkapsangkap dohot hatangkangon ni rohanasida na jahat i, jala sai ditundali nasida do ahu, ndada didompakkon. [110†]

²⁵Olat ni ari haruruar ni ompumuna sian tano Misir, sahat ro di ari on, sai husuru do tu hamu saluhut naposongku, angka panurirang i, ariari sai hudatdati marsuru nasida. [111†]

²⁶Alai ndang ditangihon nasida ahu, jala ndang ditarehon pinggolnasida, tung ditangkangi nasida do tangkuhukna, na manjahati tahe nasida sian ompunasida i. [112†]

²⁷Dihatahon ho pe tu nasida saluhut hata on, ndang tagamon tangihononnasida ho, dijouhon ho pe tu nasida, ndang tagamon alusanna.

²⁸Dibahen i dohononmu ma tu nasida: On ma sada bangso na so tumangihon soara ni Jahowa Debatana, jala na so olo manjalo pangajaran. Nunga mago * hasintongan, jala siap sian pamanganna. [113†] V.

²⁹Antong nabungi ma obuk ni ulum, jala reongkon, jala pangiar soaram mangandungi di angka robean, ai nunga diambolongkon Jahowa, jala ditadingkon sundut na ni rimasanna i. [114†]

³⁰Ai diulahon anak ni Juda do na roa di adopanku, ninna Jahowa; dipatindang nasida do hasogironnasida tu bagasan joro na targoar tu goarhu laho paramunhon. [115†]

³¹Jala dipauli nasida pantilpantil di * Topet na di rura ni angka anak ni si Hinnom laho mamurun + anaknasida dohot borunasida di bagasan api, na so dung hutonahon, manang na so dung tubu di bagasan rohangku. [116†]

³²Dibahen i, ida ma, ro do angka ari sogot, ninna Jahowa, ndang be dohonon ni halak Topet, manang rura ni angka anak ni si Hinnom, tung rura pamunuan na ma, laos tartanom halak di Topet, ala soada inganan na asing. [117†]

³³Ia bangke ni bangso on, gabe panganon di pidong angka na martongatonga langit dohot di pinahan ni tano on, jala ndang adong na manggorahon. [118†]

³⁴Jadi mansohot bahenonku sian angka huta ni Juda dohot sian alaman ni Jerusalem soara las ni roha dohot olopolop, soara ni pangoli dohot soara ni oroan, ai ingkon gabe halongonan tano i. [119†]