Read Batak Toba ENDE ANDUNG SIAN PANURIRANG JEREMIA 3 Bible Online

ENDE ANDUNG SIAN PANURIRANG JEREMIA 3 - Batak Toba bible

ENDE ANDUNG SIAN PANURIRANG JEREMIA 3

¹I. [1] Ahu ma apala baoa panginonaan ni pardangolan binahen ni linsinglinsing ni rimasna.

²Nunga ditogu jala diadu ibana ahu tu haholoman, ndada tu hatiuron.

³Holan ahu do na tinuju ni tanganna gonop ari.

⁴Nunga merus sibukku dohot sisikku dibahen ibana, jala maropuk angka holiholingku dibahen.

⁵Nunga dipagukguk humaliang ahu rasun dohot hangaluton.

⁶Nunga dipahundul ibana ahu tu bagasan haholoman songon halak naung mate di na robi. [31†]

⁷Nunga ditungkum ibana ahu humaliang, gabe ndang tarbahen ahu ruar, dipaborat do rantengku sian tombaga. [32†]

⁸Tung sura mangangguhi ahu manang joujou, ndang tagamon tolhas tangiangki. [33†]

⁹Nunga dipolpol ibana angka dalanku marhitehite batu na nidakdak, jala dipalegotlegot angka dalanku.

¹⁰Nunga gabe gompul na mangarop ibana di ahu, gabe * singa tahe di pangaropan. [34†]

¹¹Nunga dipasimbil angka dalanku jala di parsurage ahu jala dibahen do ahu tarpunjung.

¹²Nunga disintak ibana siorna, jala dipatindang ahu hira salamat di sumbia. [35†]

¹³Nunga disiorhon angka anak ni parnangkatanna masuk tu bagasan piapiangku.

¹⁴Nunga tung gabe sieleseleson ahu di sandok bangsongki, ende alingnasida manipat ari. [36†]

¹⁵Nunga dipamahap ibana ahu marhitehite angka na paet, tung dipainumhon tu ahu raru.

¹⁶Nunga ibana mangaropangi angka iponku marhitehite batu loting, jala dihungkupi ahu dohot sirabun.

¹⁷Nunga dipaholang ibana rohangku sian hadameon, gabe lupa ahu di na denggan.

¹⁸Jadi ningku ma: Nunga tung mago nalom dohot arop ni rohangku maradophon Jahowa! II.

¹⁹Sai ingot ma dangolhon dohot pangaleleon na tu ahu ro di raru dohot rasun!

²⁰Sai paingotingot ma tutu, asa tung sabam rohangku di bagasan.

²¹I ma antong parateatehononku, ala ni do umbahen marpangkirimon ahu.

²²Asiasi ni Jahowa sambing do umbahen so haru sun siap hami, ai ndang marpansohotan asi ni rohana i. [37†]

²³Mulak rata do i tahe ganup sogot, godang ma tutu habonaronmu! [38†]

²⁴Jahowa do * parjambaranku, ninna tondingku, dibahen i marhaposan tu ibana ma ahu. [39†]

²⁵Pardengganbasa do Jahowa mida angka na marhaposan tu ibana, mida tondi ni na mangalului ibana.

²⁶Martua ma manang ise na hohom mangkalungunhon hatuaon ni Jahowa. [40†]

²⁷Denggan do di baoa i, molo diusung augana tagan di haposoonna.

²⁸Punjung ma ibana hundul, jala hohom, molo dung dipampe Tuhan i tu ibana.

²⁹Denggan nian dibahen pamanganna tu orbuk, anggiat adong sihirimon.

³⁰Denggan nian ditarehon hurumna tu na mamastap, maradu mahap rohana di haurahon.

³¹Ai ndang olo Tuhan i mangambolongkon halak ro di salelenglelengna.

³²Ai ia dung dipajimput manang ise, marpangulahi ma rohana hombar tu godang ni asi ni rohana. [41†]

³³Ai ndada sian lomo ni rohana ibana pasipalhon manang mangarsahi jolma manisia.

³⁴Molo pinajepoljepol luhut angka na tarhurung di tano on.

³⁵Molo pinapeolpeol uhum tu baoa i di adopan ni na tumimbul.

³⁶Molo niruparupaan jolma di parsalisianna, tung so tatapon ni Tuhan i ma i?

³⁷Tung ise ma na guru dokna manjadi, * molo so Tuhan i martona? [42†]

³⁸Tung so sian pamangan ni na tumimbul ruar hinamago dohot tua?

³⁹Boasa sai marmungutmungut i jolma na mangolu i? Dompak dosana ma nian marmungutmungut be. III.

⁴⁰Denggan ma hita mandiordiori angka dalanta jala itasulingkit, jala mulak hita tu Jahowa.

⁴¹Denggan ma itapahehe rohanta rap dohot tanganta tu Debata na di banua ginjang i!

⁴²Nunga * marbalik hami jala manggunturi, umbahen so tarbahen marpangulahi roham. [43†]

⁴³Nunga dilungkuphon ho rimasmu tu hami, jala nunga dilele ho hami, nunga dibunu ho hami ndang maralangalang.

⁴⁴Nunga martabuni ho di bagasan ombun, ndang tartondong tangiang.

⁴⁵Nunga rapanrapan dohot biasbias hami dibahen ho di tongatonga ni angka bangso. [44†]

⁴⁶Luhut angka musunami pangangang babana be dompak hami. [45†]

⁴⁷Hasonggoton dohot godung manjadi jambarnami, tole muse hasiapon dohot hapansingon.

⁴⁸Hira batang aek do mabaor sian matangku, ala ni hapansingon ni boru ni bangsongku. [46†]

⁴⁹Sai mabakbak do iluilu ni matangku, ndang marpansadian, ndang marhasonangan. [47†]

⁵⁰Paima manatap manonggor Jahowa sian banuaginjang.

⁵¹Matangku paholso rohangku taringot tu saluhut boru ni hutangku. [48†]

⁵²Sai dipaburuburu musungku do ahu songon pidong, soada paralaan.

⁵³Nunga direndephon nasida ngolungku di bagasan godung, lam ditompashon dope batu tu ahu. [49†]

⁵⁴Nunga pola disalpui aek ulungku, pola hudok: Tos ma annon hosangki. IV.

⁵⁵Jadi hupajoujou ma goarmu, ale Jahowa, sian godung apala na bagas i. [50†]

⁵⁶Ditangihon ho do soarangku, unang tung padao pinggolmu sian hoihoingki dohot sian angguhanggukki.

⁵⁷Jonok do ho di ari uju na joujou ahu tu ho, nimmu do: Unang ho mabiar!

⁵⁸Nunga dihasuhuthon ho, ale Tuhan, bada tu tondingku; nunga dipalua ho ngolungku.

⁵⁹Nunga diida ho ale Jahowa pangarupaon na tu ahu; sai patingkos ma uhum tu ahu.

⁶⁰Nunga diida ho saluhut partubolonnasida, saluhut sangkapnasida dompak ahu.

⁶¹Nunga dibege ho eleselesnasida, ale Jahowa, saluhut tahi ni rohanasida dompak ahu.

⁶²Pangkuling ni bibir ni angka alongku dohot tubutubu ni rohanasida mangalo ahu manipat ari.

⁶³Sai tatap ma parhundul dohot parhehenasida; ahu do gabe * ende aling di nasida. [51†]

⁶⁴Baloshon ma tu nasida partubolan, ale Jahowa, hombar tu pambahenan ni tangannasida! [52†]

⁶⁵Sai lehon ma tu nasida hatangkangon ni roha, jala harom ma jambarnasida!

⁶⁶Lele ma nasida di bagasan rimasmu, jala pansingkon nasida sian toru ni langit ni Jahowa!