Read Batak Toba ENDE ANDUNG SIAN PANURIRANG JEREMIA 4 Bible Online

ENDE ANDUNG SIAN PANURIRANG JEREMIA 4 - Batak Toba bible

ENDE ANDUNG SIAN PANURIRANG JEREMIA 4

¹I. [1] Tung gabe marbirong hape sere hian, tung mimbar do hape rupa ni sere palangki mamolin tung marambolongan do hape angka batu ni habadiaon di haroroan ni saluhut alaman! [53†]

²Anak ni Sion angka na marmulia, angka na sobokkon mas timbanganna, tung gabe sobokkon ulaula angka na sian tano do hape jadijadian ni tangan ni panopa. [54†]

³Gari binatang manarehon mundalana laho pasusuhon anakna; muba do hape sogir ni boru ni bangsongku, tudoshon pidong andurian di halongonan.

⁴Pola tung lohot dila ni posoposo tu langitlangit ni pamanganna dibahen uas; mangido indahan ia dakdanak hape ndang adong na marsagihon di nasida.

⁵Jolma angka na somal manganhon na tabo na sai laon, mate anturaparon nuaeng di angka alaman; jolma angka na pinaompaompa di bagasan surta na jolo, margulu tena nuaeng.

⁶Umbalga do antong hajahaton ni boru ni bangsongku sian dosa ni Sodom, i do garina balik di bagasan sangkidop mata, ndang pola lumenduk tanganna dibahen. [55†]

⁷Sumillaman do indukna na jolo sian batu holing, sumaksak sian susu; rumara do dagingna sia mata intan, tung sisandok do rupana.

⁸Alai anggo nuaeng umbirong do rupana sian itom, ndang be ditanda halak ibana di angka alaman; hulingkulingna lohot di holiholina, tung masak do songon hau.

⁹Maruntungan do halak angka na mate binahen ni podang, asa halak na mate binahen ni haraparon, angka na mate marsingkor, ala hurangan parbue tano i.

¹⁰Tung tangan ni inaina angka na bonsa roha mangalompa anakkonna sandiri, bahen sipanganonnasida di hapapansing ni boru ni bangsongku. [56†]

¹¹Nunga tung sun hinarimas ni Jahowa, nunga diusehon ibana parpiarpiar ni murukna, jala dipagalak sada api di bagasan Sion, na mansudahon angka ojahanna. II.

¹²Ndang diparhatongon roha ni angka raja ni tano on, ro di isi ni portibi on sudena tahe, tung bongotan ni alo manang musu hape angka bahal ni Jerusalem.

¹³Ala ni dosa ni angka panurirangna do antong, ala ni hajahaton ni angka malimna, angka naung mandurushon mudar ni halak partigor di tongatongana.

¹⁴Marbadoatan do nasida songon halak na mapitung di angka alaman, marsapu mudar, tung na so tarjama halak do pangkeannasida i.

¹⁵Pasiding hamu ma, * ramun do! Angka dijouhon halak tu nasida. Pasiding! Pasiding! Unang jama hamu nasida. Uju na maporus nasida jala madoado, ninna halak ma di tongatonga ni angka parbegu: Ndang be jadi nasida mangulon disi. [57†]

¹⁶Nunga dipaserak bohi ni Jahowa nasida, ndang be tataponna nasida. Ndang pardulinasida angka malim, ndang maralangalang nasida mida * angka na tuatua. [58†]

¹⁷Jongjong dope nian huta i, sai nolnol matanami mangkasiholi pangurupion di hami nian, hape so marniula. Sai manatapnatap do hami di panatapannami mangkalungunhon sada bangso nian hape so olo manolongi.

¹⁸Sai dihampungi nasida do langkanami, maradu so tarbahen hami mardalan di alamannami. Nunga jonok tahe ajalnami, nunga gok ariarinami, ai nunga ro adamnami.

¹⁹Dumoras do halak na paburuburu hami sian lali na martongatonga langit; sai diburu nasida do hami di atas ni angka dolok, sai diarop do hami di halongonan.

²⁰Hosa ni igungnami nian, na miniahan ni Jahowa, gari tardapot di bagasan godung nasida, hudok hami do nian taringot tu ibana: Di linggomanna mangolu ma hita di tongatonga ni angka parbegu. [59†] III.

²¹Marolopolop ma ho jala marlas ni roha, ale boru Edom, na maringan di tano Us! Taripar do nang tu ho * panginumani, ingkon laos mabuk ho jala marsaemara. [60†]

²²Nunga * salese utangmi, ale boru Sion, ndang be buangkononna ho. Luluhononna ma ianggo hajahatonmu, ale boru Edom, jala papataronna angka dosami. [61†]