Read Batak Toba ENDE ANDUNG SIAN PANURIRANG JEREMIA 5 Bible Online

ENDE ANDUNG SIAN PANURIRANG JEREMIA 5 - Batak Toba bible

ENDE ANDUNG SIAN PANURIRANG JEREMIA 5

¹I. [1] Sai ingot ma, ale Jahowa na manginona tu hami! Sai tatap jala bereng haurahonnami.

²Partaliannami nunga bali tu halak sileban, angka bagasnami tu halak na pulik marga.

³Jadi angka na sopot so marama so marina nama hami; inanami hira na mabalu do.

⁴Ingkon martuhor nama aek siinumonnami, arga situtu ia sobannami hutuhor hami.

⁵Sai dilotongi nasida do tangkuhuknami, mandate pe hami laos so diloas do hami mangulon.

⁶Tu Misir husombahon hami tangannami, boti tu Assur, asa pasingkop sipanganon nian.

⁷Ompunami nian, angka na so disi be mardosa, hape manginona tu hami do hajahatonnasida i. [62†]

⁸Hatoban do mangarajai hami, ndang adong na palua hami sian tangannasida i.

⁹Pola sumeahon hosanami hami mangalap sipanganonnami maradophon podang di halongonan.

¹⁰Hira purun do sisiknami hinilala binahen ni parpotirpotir ni haraparon.

¹¹Nunga digogoi nasida angka inaina di Sion, ro di angka namarbaju di bagasan angka huta ni Juda.

¹²Nunga targantung angka induk dibahen tangannasida, bohi ni angka na tuatua pe, ndang marsangap diida.

¹³Ingkon pausungusung pandudaan angka dolidoli, jala angka dakdanak martinggangan mangusung soban.

¹⁴Angka na tuatua mansohot marpartungkoan, angka dolidoli mansohot marhasapi. [63†]

¹⁵Nunga pesan las ni rohanami, panontoronnami nunga hosing gabe arsak ni roha.

¹⁶Nunga peut * tumpal sian ulunami. Marjea ma hami ala naung mardosa hami! [64†]

¹⁷Ala ni do mandate rohanami, ala ni gabe homur matanami.

¹⁸Mida dolok Sion na tarulang i tahe; tung antuasu hape mardalani disi. II.

¹⁹Alai anggo ho, ale Jahowa marhabangsa ro di salelenglelengna, habangsami pe hot do marsundutsundut. [65†]

²⁰Boasa tung tongtong hami * halupahononmu, tung tadingkononmu hami pola na sai leleng! [66†]

²¹Togihon ma hami mulak tu ho, ale Jahowa, asa saut hami mulak! Paimbaru ma arinami, suang songon di narobi. [67†]

²²Tung laos ambolong situtu nama hami pasombuonmu ulaning manang tung sungkot hinarimasmu mida hami so marpangulahi roham tagamon?