Read Batak Toba PANURIRANG HESEKIEL 11 Bible Online

PANURIRANG HESEKIEL 11 - Batak Toba bible

PANURIRANG HESEKIEL 11

¹I. [1] Dung i * dihindat Tondi i ma ahu, jala diboan ahu tu pintu ni joro ni Jahowa sambariba tungkan habinsaran, gabe ida ma, di baba pintu i adong + duapulu lima baoa, di tongatonganasida huida si Jesania, anak ni si Assur dohot Pelatia, anak si Benaia, angka induk ni bangso i. [87†]

²Dung i ninna Ibana ma tu ahu: Ale anak ni jolma, nasida do baoa angka na marsangkap jea, jala mangaturhon tahi na roa di bagasan huta on.

³Angka didok nasida do: Ndang dope jonok! Tole tapauli ma angka bagas! Huta i do hudon, jala hita juhut.

⁴Dibahen i manurirangi ma ho dompak nasida, manurirangi ma ho, ale anak ni jolma.

⁵Jadi songgop ma tu ahu Tondi ni Jahowa, jala ninna tu ahu: Songon on do hata ni Jahowa dohononmu: Hamu ale pinompar ni Israel mandok songon i, apala so huboto tubutubu ni rohamuna i.

⁶Nunga dipatorop hamu jolma angka na tartullang sian hamu di bagasan huta on, jala nunga gok bangke alamanna dibahen hamu.

⁷Dibahen i songon on do hata ni Tuhan Jahowa: Jolma angka naung tartullang i sian hamu, angka na marragean di tongatonga ni huta i, nasida ma juhut i, jala huta i do hudon i; alai anggo hamu haruar do toguonku sian tongatongana.

⁸Podang do na hinabiaranmuna, hape podang i do paroonku dompak hamu, ninna Tuhan Jahowa.

⁹Ahu ma tahe paruar hamu sian tongatongana, jala ahu pasahathon hamu tu bagasan tangan ni halak ruar, jala ahu mangkonahon tu hamu angka torutoru.

¹⁰Ingkon marragean hamu binahen ni podang; di partalpahan ni Israel uhumonku hamu, asa tung diboto hamu ahu do Jahowa. [88†]

¹¹Ndada huta i gabe hudon di hamu, manang hamu gabe juhut di tongatongana; di partalpahan ni Israel tahe uhumonku hamu.

¹²Asa tung diboto hamu ahu do Jahowa, na so pinarangehonmuna angka patikku, jala ndang diulahon hamu angka uhumhu; hombar tu uhum ni parbegu, angka na humaliang hamu balik tahe diulahon hamu.

¹³Dung i uju manurirangi ahu, mate satongkin ma si Pelatia, anak ni si Benaia. Jadi * manungkap ma ahu tu tano, jala hupangiar soarangku mangangguhi, ningku ma: Iale Tuhan Jahowa! Tung sun siap ma bahenonmu pasipasi ni Israel. [89†] II.

¹⁴Dung i ro ma hata ni Jahowa tu ahu songon on:

¹⁵Ale anak ni jolma! Hahaanggimu, hahaanggimu tongon, angka baoa hasolhotonmu ro di sandok pinompar ni Israel, tung tu nasida saluhut do na nidok ni isi ni Jerusalem: Paholang hamu ma sian lambung ni Jahowa! Antong nunga tu hita tano i dipasahat bahen partalian.

¹⁶Dibahen i dohononmu ma: Songon on do hata ni Tuhan Jahowa: Ala ahu * mambolongkon nasida dao tu tongatonga ni angka parbegu, jala ala ahu paserakkon nasida tu angka luat ni halak, jadi laos ahu muse gabe habadiaon di nasida sangombas na metmet di angka luat hasahatannasida i. [90†]

¹⁷Dibahen i dohononmu ma: Songon on do hata ni Tuhan Jahowa: Laos ahu papungupungu hamu sogot sian angka bangso, jala ahu patumpuhon hamu sian angka luat parserahanmuna i, jala ahu mangalehon tu hamu tano Israel. [91†]

¹⁸Jadi dung sahat nasida ro disi, paholangonnasida ma sian i sandok hasogiron dohot saluhut biasbias.

¹⁹Jadi lehononku ma tu nasida roha sisangunjur, jala suanhononku tondi na imbaru tu bagasan ateatenasida, jala paholangonku ma * roha batu sian dagingnasida, jala lehononku ma tu nasida roha sibuk. [92†]

²⁰Asa diihuthon nasida angka patikku, jala diradoti angka uhumhu, jala diulahon, jadi gabe bangsongku ma nasida, jala ahu gabe Debatanasida. [93†]

²¹Alai manang ise marrohahon roha ni angka hasogiron, dohot biasbiasnasida, naeng ihuthononna, manginona tu ulunasida dalannasida i bahenonku, ninna Tuhan Jahowa. III.

²²Dung i dipaperper angka kerubim ma habongnasida i, jala angka roda di lambungnasida, jala hamuliaon ni Debata ni Israel mangalinggomi nasida sian ginjang. [94†]

²³Dung i manaek ma hamuliaon ni Jahowa sian tongatonga ni huta i, jala marsijongjong di atas ni dolok, na tungkan habinsaran ni huta i. [95†]

²⁴Dung i * dihindat Tondi i ma ahu, jala diboan ahu di bagasan alatan marhitehite Tondi ni Debata tu luat Kasdim, tu angka na tarbuang i; dung i manaek ma sian atashu alatan naung huida i. [96†]

²⁵Jadi huhatahon ma tu angka na tarbuang i saluhut hata ni Jahowa, angka na pinapatarna i tu ahu.