Read Batak Toba PANURIRANG HESEKIEL 12 Bible Online

PANURIRANG HESEKIEL 12 - Batak Toba bible

PANURIRANG HESEKIEL 12

¹I. [1] Dung i ro muse hata ni Jahowa tu ahu, songon on:

²Ale anak ni jolma, di tongatonga ni bangso na manggunturi do ho maringan, angka parmata na marnida nian, hape ndang marnida, angka parpinggol na marbinege nian, hape ndang dibege, ai bangso panggunturi do nasida. [97†]

³Dibahen i ho ale anak ni jolma, bahen ma di ho angka parhohas parbungkason, jala bungkas ma ho arian di adopan ni matanasida. Ingkon bungkas ho sian ingananmu tu inganan na asing di adopan ni matanasida, anggiat mamoto rohanasida, ai bangso panggunturi do nasida.

⁴Ingkon paruaronmu angka parhohasmu arian i di adopan ni matanasida, songon angka parhohas parbungkason. Alai ingkon bodari pe ho ruar di adopan ni matanasida, songon na somal haruruar ni halak na bungkas.

⁵Ingkon di adopan ni matanasida dungkirdungkironmu dorpi, asa sian i ho ruar.

⁶Ingkon di adopan ni matanasida ampehononmu tu abaram, dung pe holom asa ruar usungonmu, ingkon tujunganmu bohim, jala ndang jadi idaonmu tano i; ai nunga * hubahen ho gabe tudosan halongangan di bangso Israel. [98†]

⁷Jadi hubahen ma songon na tinonahon i tu ahu: Huparuar arian angka parhohashu, songon angka parhohas parbungkasan, jala hudungkirdungkiri bodarina i dorpi i torus dohot tanganku sandiri; dung pe holom asa ruar huusung, huampehon tu abarangku di adopan ni matanasida. II.

⁸Alai manogotna i ro ma hata ni Jahowa tu ahu, songon on:

⁹Atehe ale anak ni jolma, nda tung adong sian bangso Israel, bangso panggunturi i, angka na mandok tu ho: Aha do na binahenmu?

¹⁰Dohononmu ma tu nasida: Songon on do hata ni Tuhan Jahowa: * Marhahonaan tu raja di Jerusalem do i dohot tu sandok bangso Israel, angka na di tongatongana. [99†]

¹¹Dohononmu ma: Ahu do apala * tanda halongangan di hamu; suang songon na hubahen i, ingkon bahenon tu nasida, ingkon mardalan nasida tu parbungkasan, tu habuangan. [100†]

¹²Ia raja na di tongatonganasida, pasoratonna ma abarana, dung pe holom asa ruar usungonna, dorpi i do dungkirdungkirannasida laho paruarhon sian i; tujunganna ma bohina i, alai na so jadi idaon ni matana tano i. [101†]

¹³Lingkuphononku huhut rambangku tu atasna, asa tartangkup ibana di bagasan jorgongku, jala ahu mamboan ibana tu Babel, tu tano ni halak Kasdim, alai ndang jadi idaonna tano i, laos mate disi ibana. [102†]

¹⁴Jala saluhut angka na humaliang ibana, angka na hinarana ro di sandok paranganna, paserahonku do tu saluhut desa, jala podang i do sintahonku sian pudinasida.

¹⁵Asa tung ditanda nasida ahu do Jahowa, ia dung mampar nasida hubahen di tongatonga ni angka parbegu, jala hupaserak nasida tu angka luat ni halak.

¹⁶Alai * tebahononku do sian nasida angka baoa, hira pamilangina angka na malua sian podang, sian haraparon dohot sian begu antuk, asa nasida sandiri manjamitahon saluhut biasbias angka na niulanasida di tongatonga ni angka parbegu hasahatannasida i, asa ditanda nasida ahu do Jahowa. [103†] III.

¹⁷Dung i ro muse ma hata ni Jahowa tu ahu songon on:

¹⁸Ale anak ni jolma, ingkon mardongan raion ho laho manganhon rotim, jala mardongan hatahuton dohot hagogotan inumonmu aek.

¹⁹Jala dohononmu ma tu bangso ni tano i: Songon on do hata ni Tuhan Jahowa taringot tu isi ni Jerusalem, angka na di tano Israel: Ingkon mardongan hagodoron panganonnasida rotinasida i, jala mardongan hapariron inumonnasida aek, ala naung tarulang tanona, bolong ia hinagabena binahen ni pangarupaon ni saluhut angka pangisina.

²⁰Jala tarulang do huta angka na niinganan na sai laon, jala tano i gabe halongonan, asa tung ditanda nasida ahu do Jahowa. IV.

²¹Dung i ro muse ma hata ni Jahowa tu ahu, songon on:

²²Ale anak ni jolma, umpama dia do i na mehet di hamu di tano Israel songon on: Laon dope angka ari i, jala nunga pesan sandok alatan. [104†]

²³Dibahen i dohononmu ma tu nasida: Songon on do hata ni Tuhan Jahowa: Pasadionku ma umpama i, asa unang be parumpamahononnasida di Israel, ingkon dohononmu ma tu nasida: Nunga jonok angka ari i dohot hata ni sandok alatan i. [105†]

²⁴Ai ndang tagamon adong be agia aha alatan sipaotooto, manang pangarundingon lesemlesem di tongatonga ni bangso Israel.

²⁵Ai ahu Jahowa sandiri mangkatai, manang hata dia huhatahon, ingkon pasautonku do i, ndang be togangonku, ai di angka arimuna, ho ale bangso panggunturi hatahononku, sada hata jala pasautonku, ninna Tuhan Jahowa.

²⁶Dung i ro muse hata ni Jahowa tu ahu songon on:

²⁷Ale anak ni jolma, ida ma, hata ni bangso Israel songon on: Alatan na niidana i, laon dope ariarina, jala taringot tu tingki angka na dao do ibana manurirangi.

²⁸Dibahen i dohononmu ma tu nasida: Songon on do hata ni Tuhan Jahowa: Ndang be togangonku saluhut angka hatangku; hata naung huhatahon i, ingkon pasautonku do i, ninna Tuhan Jahowa.