Read Batak Toba PANURIRANG HESEKIEL 16 Bible Online

PANURIRANG HESEKIEL 16 - Batak Toba bible

PANURIRANG HESEKIEL 16

¹I. [1] Dung i ro muse ma hata ni Jahowa tu ahu, songon on:

²Ale anak ni jolma, pabotohon ma tu Jerusalem biasbias angka na niulana.

³Jala dohononmu ma: Songon on do hata ni Tuhan Jahowa tu Jerusalem: Haroroanmu dohot hatubuanmu sian tano ni halak Kanaan do, marga Amori do amam, jala boru Het do inam.

⁴Pangalaho ni hatutubum songon on do: Ndang diseat pusokmu di ari hatutubum, jala ndang dididi ho dohot aek laho paiashon; jala ndang diososhon sira tu ho, jala ndang diborhosi ho.

⁵Ndang adong na asi roha mida ho nanggo sahalak, mambahen tu ho sada sian angka bongka ondeng, manundunhon ho nian; lam diambolongkon do ho tahe tu ladang, dibahen gigina mida hosam di ari hatutubum.

⁶Jadi mamolus ma ahu sian lambungmu, gabe huida ho marguluguluhon mudarmu, gabe hudok tu ho: Ingkon mangolu ho di bagasan mudarmu! Songon hudok ma tu ho: Ingkon mangolu ho di bagasan mudarmu!

⁷Marloksaloksa ho muse hubahen, songon tumburtumbur di ladang; gabe torop ho jala magodang, jala sungkot hinaulim, lam tu balgana do bagotmu, jala lam martumbur obukmu, alai salangsalang jala marsaemara do ho.

⁸Dung i mamolus muse ahu sian lambungmu, jala huida ho, gabe ida ma, nunga jumpang tingkim, tingki partandangonmu. Jadi * hupaherbang ma habongku mangulosi ho, jala huhungkupi parsaemaraonmu, pola marmangmang ahu tu ho, jala + marpadan ahu tu ho, ninna Tuhan Jahowa, gabe ahu nampuna ho. [130†]

⁹Dung i ahu mandidi ho dohot aek, jala huusa mudarmu sian ho, jala humiahi ho dohot miak.

¹⁰Jala hubahen ho * marpangkean na niangit, dohot martapaktapak sian hulingkuling na arga sahali, jala hubahen ho marulos na halus, jala huhungkupi ulum dohot surta. [131†]

¹¹Jala hubahen ho marpangkean na jagar sahali, jala hubahen angka leang tu tanganmu dohot horunghorung tu rungkungmu.

¹²Hubahen igungmu martintin, jala marantinganting ia pinggolmu, jala tumpal sada na arga situtu tu ulum. [132†]

¹³Jadi marbujonggit ho sian sere dohot sian perak, jala dagangan na halus do parulosonmu, surta dohot hain na niangit. Sagusagu mardongan situak ni loba dohot miak panganonmu, jadi sungkot ma hinaulim, jala pampe tu ho harajaon.

¹⁴Jadi pansar ma baritam tu tongatonga ni angka parbegu * dibahen hinaulim, ai tung na sun denggan do i, dibahen hamuliaonku na hupampe tu ho, ninna Tuhan Jahowa. [133†] II.

¹⁵Hape marhaposan tu hinaulim do ho, jala * marmainan ho mangasahon baritam, jala didaishon ho do parmainanonmu tu ganup na mamolus mangalohoti ibana. [134†]

¹⁶Dibuat ho do huhut sian pangkeanmu asa mambahen di ho angka langgatan siganding, marmainan ho di atasna, na so dung dumatangi, jala na so tagamon masa nang sogot. [135†]

¹⁷Dibuat ho do huhut ulaula ni hajagaronmu sian serengku dohot sian perakku, na hulehon i tu ho, jala dibahen ho di ho angka sumansuman ni baoa, asa marmainan tusi. [136†]

¹⁸Dibuat ho do huhut pangkeanmu na niangit, jala dihungkuphon ho tu nasida, dipatibal ho do huhut miakku dohot daupangku tu jolonasida.

¹⁹Jala rotingku na hubasabasahon i tu ho, i ma sagusagu mardongan miak dohot situak ni loba na hulehon bahen panganonmu nian, hape dilehon ho do i tu jolonasida bahen uap na hushus, i ma tutu, ninna Tuhan Jahowa.

²⁰Angkup ni dibuat ho do * angka anakmu dohot borum, angka na tinubuhonmu di ahu nian, gabe dipelehon ho do i tu nasida asa sudahononna; tung numeang ma i sian angka parmainanonmu di roham? [137†]

²¹Nunga dipotongi ho huhut angka anakku, jala diseahon ho nasida, asa pabolashon nasida sian api pasahathon tu debata sileban.

²²Jala di bagasan saluhut biasbias angka na niulam dohot parmainanonmu, ndang marningot ho di angka ari haposoonmu, * uju salangsalang ho jala marsaemara, tung marguluguluhon mudarmu ho. [138†]

²³Dung salpu saluhut hajahatonmu, jea, jea ma di ho, ninna Tuhan Jahowa!

²⁴Tung dipauli ho do di ho bagas na marpangalaho langkitang, jala dibahen ho do di ho tambak di saluhut alaman.

²⁵Di saluhut haroroan ni dalan dipauli ho angka tambakmu, jala dibahen ho do hinaulim gabe biasbias, jala dipahangkang ho do patmu di ganup na mamolus, asa paganda parmainanonmu.

²⁶Jala laho do ho marmainan tu angka anak ni Misir, hombar balokmu, angka sigodang sibuk, jala dipatamba ho do parmainanonmu, asa pahehe rimashu.

²⁷Jadi ida ma, ala ni hupatoltol tanganku tu atasmu, jala huorui partalianmu hian jala hupasahat ho gabe guru roharoha ni angka na mangkagigihon ho, i ma angka boru Palistim, angka na maila balik mida dalan ni harorangonmu.

²⁸Laho muse ho * marmainan tu angka anak ni Assur ala so olo mahap roham, marmainan ho tahe tu nasida, hape laos so olo mahap roham. [139†]

²⁹Lam digandai ho do parmainanonmu tu tano Kanaan, boti * tu luat Kasdim, laos so olo mahap dope roham disi. [140†]

³⁰Marasnai rohami marisuang, ninna Tuhan Jahowa, di na binahenmi saluhutna i, i ma pambahenan ni parompuan sibabijalang na tarboan rohana.

³¹Di na binahenmi joromi di haroroan ni luhut dalan dohot na binahenmi tambakmu di saluhut alaman, jala ndada ho songon sibabijalang hian na mangigil upa. [141†]

³²Oe ale boru sibabijalang, na manjangkon halak sileban, singkat ni harajaanna hian!

³³Somalna nian di saluhut sibabijalang manjalo ugasan, alai muba do anggo ho, ho do balik mangalehon ugasanmu tu saluhut puangmu dohot mangalehon silua tu nasida, mangela ro manopot ho sian na humaliang marmainan dohot ho. [142†]

³⁴Asa na sumalin do ho diparmainanonmu martimbangkon parompuan angka na asing; ndada ho diihutihut naeng marmainan, ho do balik mangalehon ugasan, ndada tu ho dilehon ugasan, umbahen gabe sumalin ho. III.

³⁵Dibahen i ale sibabijalang, tangihon ma hata ni Jahowa!

³⁶Songon on do hata ni Tuhan Jahowa: Ala naung pinansuasaehonmi hepengmu, jala dipatedek ho hailaonmu, binahen ni parmainanonmu tu angka puangmu, dohot tu saluhut ganaganaan ni hasogiron angka na niulam, jala hombar tu mudar ni anakmu angka na sinombahonmu tu nasida.

³⁷Dibahen i, ida ma, ahu ma papunguhon saluhut puangmu angka na mangkasolohon ho, dohot saluhut angka na hinaholongan ni roham ro di saluhut angka hasomoran ni roham, ahu ma papunguhon nasida sian na humaliang dompak ho, asa hupatedek hailaonmu tu nasida, asa tung diida nasida sandok hailaonmu. [143†]

³⁸Jala ahu * mandabu tu ho uhum na tu angka sibabijalang hian dohot tu parompuan angka na mandurushon mudar, jala ahu pasahathon ho gabe mudar ni harimason dohot pangiburuan. [144†]

³⁹Jala ahu pasahathon ho tu bagasan tangannasida, asa lohaonnasida angka joromi, jala panepneponna angka tambakmu, jala tanggalannasida angka pangkeanmu, jala rampasonnasida angka mata intan jagarjagarmu, jala pasombuonna ho salangsalang dohot marsaemara.

⁴⁰Jala nangkok do togihononnasida dompak ho sada luhutan, jala dangguranna ho dohot batu, jala tampulanna ho dohot podangnasida.

⁴¹Jala * purunanna angka bagasmu dohot api, jala bahenonna tu ho angka uhumi di adopan ni torop parompuan. Asa ahu pasohothon parmainanonmu, panuang pe ndang be lehononmu. [145†]

⁴²Asa tung * sombu rimashu mida ho, jala sumurut pangiburuonku sian ho, gabe sonang ahu, jala unang be tarsunggul rimashu. [146†]

⁴³Ala na so niingotmu angka ari haposoonmu, jala na ritoon i ho dompak ahu di saluhutna i. Ahu pe antong, ida ma, manginona tu ulum bahenonku dalanmu, ninna Tuhan Jahowa, jala ndang be tambaonmu harorangon dongan ni saluhut biasbias, angka na niulam. [147†] IV.

⁴⁴Ida ma, saluhut halak na somal marumpama, dohononna ma hata umpama on dompak ho: Suman tu inana do boruna.

⁴⁵Boru ni inam do ho, naung mahilolong di baoa na dohot di anakkonna; jala anggi ni haham do ho angka na mahilolong mida baoa nasida dohot mambolongkon anaknasida; boru Het do * inamuna, jala marga Amori do amamuna. [148†]

⁴⁶Jala * hahami do Samaria, ibana dohot angka boruna na maringan tungkan sihambirangmu, jala anggim na maringan tungkan siamunmu, i ma + Sodom dohot angka boruna. [149†]

⁴⁷Alai ndang diihuthon ho angka dalannasida, jala ndang diulahon ho hombar tu biasbias angka na niulanasida, hira na maotikku, gabe jumahat ho di sude angka dalanmu, sian nasida.

⁴⁸Songon sintongna mangolu ahu, ninna Tuhan Jahowa, molo tung * tudos binahen ni Sodom anggim i, ibana dohot angka boruna, songon na binahenmi dohot angka borum! [150†]

⁴⁹Ida ma, on do hajahaton ni Sodom anggim i: Roha haginjangon, pargadombuson dohot hapedemon, i ma di ibana dohot di angka boruna; ianggo tangan ni na dangol dohot na parir, ndang dipargogoi nasida. [151†]

⁵⁰Lam jungkat tahe rohanasida jala diulahon do angka biasbias di jolongku, jadi hurendephon nasida, * disi huida. [152†]

⁵¹Samaria i pe, nanggo satonga ni dosami ndang diulahon, andul do digandai do angka biasbiasmi martimbangkon nasida, tung hira * dipintori ho do hahami di saluhut biasbias angka na niulam. [153†]

⁵²Ho pe antong, ingkon usungonmu haurahonmu na niuhumhonmu tu hahami; marhitehite dosam angka na sumogir i binahenmu sian nasida, gabe umpintor nasida sian ho. Dibahen i tarurak ma nang ho, jala usungonmu haurahonmu marhitehite pamintorim di hahami. V.

⁵³Dung i * mulak ma togihononku angka na tarbuang sian nasida, angka na tarbuang sian Sodom dohot sian angka boruna, angka na tarbuang sian Samaria dohot sian angka boruna, nang angka na tarbuang ni habuanganmu nuaeng di tongatongana. [154†]

⁵⁴Asa usungonmu haurahonmu, gabe maila ho mida saluhut na binahenmi, di na niapulanmu nasida.

⁵⁵Jadi mulak ma Sodom anggim i, ro di angka boruna tu haroroanna hian; jala Samaria dohot angka boruna mulak tu haroroanna hian; hape dohot angka borum mulak tu haroroanmuna hian.

⁵⁶Jala Sodom anggim i, ndang be gabe barita sambing di bagasan pamanganmu, songon uju di ari haginjangon ni roham.

⁵⁷Tagan so patar dope hinajahatmu, songon di tingki pangareheon ni angka boru sian Ram dohot saluhut hombarna hundul humaliang ro di boru Palistim, angka na palea ho humaliang. [155†]

⁵⁸Harorangonmu tahe dohot biasbias angka na niulam, angka na manginsombut tu ho, ninna Jahowa.

⁵⁹Ai songon on do hata ni Tuhan Jahowa: Ahu mambahen tu ho suang songon na binahenmi, na tinoisanmi uari laho mangose padan.

⁶⁰Alai anggo ahu, sai * huingot do padan na hubahen i tu ho, ** uju di angka ari haposoonmu, jala huhajongjongkon tu ho + padan saleleng ni lelengna. [156†]

⁶¹Jadi * ingotonmu ma angka dalanmu, laos hailahononmu do di na jinangkonmi haham dohot anggim, angka silehononku tu ho sogot bahen angka boru, alai ndada sian patik parpadanonmu. [157†]

⁶²Jala ahu mangkajongjongkon padanhu tu ho sogot, asa tung diboto ho ahu do Jahowa.

⁶³Asa tung * marningot ho jala maila, pola ndang be hum ho mangungkap pamangan binahen ni ilam, ia dung husalesehon tu ho taringot tu saluhut na binahenna i, ninna Tuhan Jahowa. [158†]