Read Batak Toba PANURIRANG HESEKIEL 25 Bible Online

PANURIRANG HESEKIEL 25 - Batak Toba bible

PANURIRANG HESEKIEL 25

¹I. [1] Dung i ro muse hata ni Jahowa tu ahu songon on:

²Ale anak ni jolma, tujuhon ma bohim dompak halak * Amon, jala manurirangi ma ho taringot tu nasida. [275†]

³Jala dohononmu ma tu halak Amon: Tangihon hamu ma hata ni Tuhan Jahowa! Songon on do hata ni Tuhan Jahowa: Ala naung nidokmu: * Ha, ha, martillahon bagas habadiaonku, ala naung tarramun dohot tano ni Israel, ala naung tarulang dohot pinompar ni Juda, ala naung tarboan nasida tu habuangan! [276†]

⁴Dibahen i, ida ma, ahu pasahathon ho tu angka anak sian habinsaran bahen teanteanan, asa dipajok nasida undungundungnasida di bagasan ho, jala dipajongjong inganannasida di bagasan ho, nasida manganhon parbue ni tanom, jala nasida manginum susu ni pinahanmu.

⁵Jala ahu mambahen, Rabba gabe parudaman ni angka unto, jala angka anak ni Amon gabe pangulonan ni birubiru, asa tung ditanda hamu ahu do Jahowa.

⁶Ai songon on do hata ni Tuhan Jahowa: Ala naung martopaptopap tangan ho jala marhajingjang jala martilla roham di saluhut panengaon ni roham taringot tu tano Israel: [277†]

⁷Dibahen i, ida ma, ahu patoltolhon tanganku dompak ho jala ahu pasahathon ho pupusan ni angka bangso parbegu, jala ahu maniaphon ho sian tongatonga ni angka bangso, jala ahu mangarendephon ho sian angka luat, asa tung hupansingkon ho, asa ditanda ho ahu do Jahowa. II.

⁸Songon on do hata ni Tuhan Jahowa: Ala na nidok ni * Moab dohot Seir: Ida ma, songon saluhut bangso parbegu do hape pinompar ni Juda! [278†]

⁹Dibahen i, ida ma, ahu patalak dalan tu Moab sumola angka huta, angka hutana tutu sahat ro di partalpahanna tano bosar i, sahat ro di Betjesimot, Baal-Meon dohot Kiriataim.

¹⁰Tu angka anak sian habinsaran do i lehononku rap dohot angka anak ni Amon bahen teanteanan, asa unang be taringotan halak Amon di tongatonga ni angka bangso parbegu.

¹¹Tu Moab pe dabuonku do angka uhum, asa tung ditanda nasida ahu do Jahowa. III.

¹²Songon on do hata ni Tuhan Jahowa: Ala mangulahon partubolon Edom tu pinompar ni Juda, gabe marsala godang nasida, ala marsunisunian nasida tu Juda. [279†]

¹³Dibahen i, songon on do hata ni Tuhan Jahowa: Ahu patoltolhon tanganku marlulu dompak Edom, asa mangaripashon sian i jolma nang pinahan, jala tarulang do i bahenonku sian Teman sahat ro di Dedan ingkon marragean nasida bahenon ni podang.

¹⁴Jadi ahu mambahen partubolan tu Edom marhitehite tangan ni bangsongku Israel, asa dibahen nasida tu Edom hombar tu rimashu dohot hombar tu murukku, asa tung ditanda nasida pangaluluhonku, ninna Tuhan Jahowa. [280†] IV.

¹⁵Songon on do hata ni Tuhan Jahowa: Ala marsunisunian pambahen ni * halak Palistim, jala martilla rohanasida mangulahon partubolon, laho mangago, ala musu tihus sian na robi dope. [281†]

¹⁶Dibahen i, songon on do hata ni Tuhan Jahowa: Ida ma, ahu patoltolhon tanganku marlulu dompak halak Palistim, asa husiaphon halak * Heret i, jala huago pasipasi ni halak partopi laut. [282†]

¹⁷Jala hubahen tu nasida angka partubolan godang, asa tung ditanda nasida ahu do Jahowa, molo dung hulaluhon partubolan ni rimashu tu nasida.