Read Batak Toba PANURIRANG HESEKIEL 26 Bible Online

PANURIRANG HESEKIEL 26 - Batak Toba bible

PANURIRANG HESEKIEL 26

¹I. [1] Pasampulu sada taonhon, di ari sada bulan sipaha sada, ro muse hata ni Jahowa tu ahu songon on:

²Ale anak ni jolma, ala na nidok ni Tirus martillahonsa taringot tu Jerusalem: * Ha, ha! Nunga tung maloha pintu haroroan ni angka bangso, mangarongom ro tu ahu ma nuaeng; gok ma ia ahu, tarulang ma ianggo ibana! [283†]

³Dibahen i songon on do hata ni Tuhan Jahowa: Ida ma, marlulu dompak ho ma ahu, ale * Tirus, jala ahu manogihon nangkok dompak ho torop angka bangso parbegu songon habibinsat ni laut binahen ni galumbangna. [284†]

⁴Lohaonnasida ma angka parik ni Tirus jala marumpak bahenonna angka palaspalasna, jala sapuonku ma sian i orbukna, asa hubahen nasida gabe dolok batu manangkas.

⁵Asa gabe paninaran ni angka jala do i di tongatonga laut; ai ahu do na mandok songon i, ninna Tuhan Jahowa; gabe sipupusan ni angka bangso parbegu huhut.

⁶Jala pagaranna angka na di tano na bidang, ingkon marragean do bahenon ni podang, asa tung ditanda nasida ahu do Jahowa. II.

⁷Ai songon on do hata ni Tuhan Jahowa: Ida ma, ahu parohon dompak Tirus si Nebukadnesar, raja sian Babel, sian utara * raja ni angka raja, mardongan hoda dohot hureta porang dohot angka jolma parsihundul dohot parangan mansai deak. [285†]

⁸Bunuonna do marhitehite podang angka pagaranmu * di tano na bidang, alai bahenonna ma batarbatar anggo dompak ho, jala pungkaonna ma parik dompak ho, jala paheheonna dompak ho lombulombu. [286†]

⁹Jala pasolhotonna ma salosap pangaloha tu angka parikmi, jala angka palaspalasmi robohononna ma i marhitehite parhohasna porang.

¹⁰Binahen ni hinadeak ni angka hodana hungkupan ni orbuk ma ho, humuntal ma angka parikmu bahenon ni pardorom ni jolma parsihundul, galapang dohot hureta porang molo bongot ibana tu bagasan angka bahalmu, songon parbongotna tu huta naung matompas parikna.

¹¹Marhitehite tambirik ni angka hodana luntahanna saluhut alamanmu, bunuonna ma ia bangsom marhitehite podang jala angka tiang ni hagogoonmu ingkon tinggangkononna do tu tano.

¹²Jadi pupusannasida ma sinamotmu, jala laumonna boniagam, jala lohaonnasida ma angka parikmu, jala angka bagas hasoloan ni roham rumpakkononna, ianggo angka batu parhaumi dohot turanggong reongkononna do tu tonga laut.

¹³Jadi pasohotonku ma hariburon ni angka endemi, jala * soara ni parhinaloanmi ndang be tarbege. [287†]

¹⁴Jala ahu manjadihon ho gabe dolok batu manangkas, gabe paninaran ni angka jala do ho, ndang be jadi ho paulion, ai ahu Jahowa do na mandok i, ninna Tuhan Jahowa. III.

¹⁵Songon on do hata ni Tuhan Jahowa taringot tu Tirus: Tung so godoron situtu ma angka pulo umbege parlopuk ni hapapatum, di na morongorong angka na tartullang, di na mangangguhi angka na marragean di tongatongami?

¹⁶Jadi mijur be ma sian habangsanasida sude angka induk partopi laut, jala diambolongkon be sampesampenasida, jala ditanggali be pangkeannasida angka na ni angit, gabe marulos hatotongon nasida, hundul be nasida di tano manangkas, jala tarsonggot ganup tongkin, jala tarhalomong nasida mida ho.

¹⁷Jadi pungkaonnasida ma sada andung mida ho, jala dohononnasida ma tu ho: Inange, laho mago ho ale na rame binahen ni angka laut, ho huta na tarbarita na gogo di laut, huta i tahe ro di isina angka na mambahen tahuton saluhut pangisina i. [288†]

¹⁸Ianggo nuaeng godoron ma angka pulo di ari hapapatum, tarhatotong ma tutu pulo angka na di bagasan laut mida ajalmu.

¹⁹Ai songon on do hata ni Tuhan Jahowa: Molo hubahen ho gabe huta na tarulang, songon huta angka na so niinganan, molo hutogihon nangkok marlulu dompak ho pasang naek, gabe angka aek magodang manghungkupi ho.

²⁰Jala hureongkon do rap dohot angka na turun tu godung, tu bangso na robi, jala hupaian ho tu bagasan tano ni angka lung, tu halongonan sian mulamula sahali rap dohot angka na turun tu godung, asa unang be hainganan ho: Jadi bahenonku ma hamuliaon di bagasan tano ni halak na mangolu.

²¹Alai gabe hasonggoton ma ianggo ho bahenonku, asa tung pidom ho; luluan ni halak do ho nian, hape ndang be jumpangsa ho salelenglelengna, ninna Tuhan Jahowa!