Read Batak Toba PANURIRANG HESEKIEL 28 Bible Online

PANURIRANG HESEKIEL 28 - Batak Toba bible

PANURIRANG HESEKIEL 28

¹I. [1] Dung i ro muse hata ni Jahowa tu ahu songon on:

²Ale anak ni jolma, dok ma tu induk sian Tirus: Songon on do hata ni Tuhan Jahowa: Ala * dipaginjang ho roham tung didok ho do: Ahu do Debata, habangsa ni Debata do na huhunduli di tongatonga ni angka laut! Hape jolma sambing do ho, ndada Debata, alai tudoshon bisuk ni Debata do bisukmu disura roham. [299†]

³Ida ma, umbisuk do ho sian * si Daniel ninna roham, saluhut hahomion ndang buni sian ho. [300†]

⁴Marhitehite habisukonmu dohot hapistaranmu dipatupa ho do hamoraonmu, ninna roham jala papungupungu sere dohot perak di bagasan jabu parpeopan ni artam.

⁵Binahen ni hinagodang ni bisukmu dohot partigatigaonmu dipagodang ho sinamotmu, gabe di haginjangkon roham do sinamotmi.

⁶Dibahen i, songon on do hata ni Tuhan Jahowa: Ala tudoshon bisuk ni Debata bisukmu dibahen ho.

⁷Dibahen i, ida ma, ahu parohon halak sileban marlulu dompak ho, bangso parbegu angka na garang sahali, umpatonnasida ma angka podangnasida mangago hinauli ni habisukonmu dohot mangaramuni sondangmi. [301†]

⁸Tung tu godung do onjarhononnasida ho, asa tung mate ho di tongatonga ni laut, songon hamamate ni halak na tartiham. [302†]

⁹Tung tagamon dohononmu dope disi: * Ahu do Debata, di adopan ni na mambunu ho? Hape jolma do ho, ndada Debata, di bagasan tangan ni halak na maniham ho. [303†]

¹⁰Ingkon mate do ho songon hamamate ni halak na marhulup di bagasan tangan ni halak sileban, ai ahu do na mandok i, ninna Tuhan Jahowa. II.

¹¹Dung i ro muse hata ni Jahowa tu ahu songon on:

¹²Ale anak ni jolma, pungka ma sada * ende andung taringot tu raja sian Tirus, jala dohononmu ma tu ibana: Songon on do hata ni Tuhan Jahowa: Ho do nian na jolo tumiti parsuhatan, gok habisuhon, jala sun denggan hinaulim. [304†]

¹³Maringan di * Eden, porlak ni Debata do ho na jolo; saluhut mata intan angka na arga manghungkupi ho, mata intan + sardis, topas, diaman, tarsis, onik, dohot jaspis, sapir, rubin, zamrud dohot sere; jadijadian ni arbabmu dohot sarunem di lambungmi; di ari hababangkitmu hian do i dipadiri di ho. [305†]

¹⁴Ho do nian sada kerubim * na paherbang habongna manghungkupi, jala nunga hupaojak ho di atas + dolok habadiaon ni Debata, di tongatonga ni angka batu na marsinondang do ho mardalandalan. [306†]

¹⁵Tung sun denggan do ho di bagasan angka dalanmu, olat ni ari hababangkitmu sahat ro di hamamasa ni hajungkaton di bagasan ho.

¹⁶Binahen ni hinagodang ni partigatigaonmu gok pangarupaon tongatongami, gabe mardosa ho; dibahen i hutimpalhon ho ala ni haramunonmu paholangkon sian dolok ni Debata, asa huripashon ho ale kerubim na manghungkupi sian tongatonga ni batu angka na marsinondang.

¹⁷Dipaginjang ho do roham binahen ni hinaulim, diago ho do habisukonmu ala ni hamuliaonmu: Dibahen i tu tano reongkononku ho, jala bahenonku do ho tu jolo ni angka raja bahen sitotonduron.

¹⁸Binahen ni hinagodang ni hajahatonmu di bagasan hageduhon ni partigatigaonmu diramuni ho do angka habadiaonmu; dibahen i ahu paruarhon api sian tongatongami na pasudahon ho, jala ahu mambahen ho gabe sirabun di sisik ni tano on di adopan ni saluhut halak na manondurhon ho.

¹⁹Saluhut halak na tumanda ho na jolo di tongatonga ni angka bangso, tarhatotong be mida ho, gabe * hasonggoton bolon do ho, jala ndang adong be ho ro di saleleng ni lelengna. [307†] III.

²⁰Dung i ro muse hata ni Jahowa tu ahu songon on:

²¹Ale anak ni jolma, tujuhon ma bohim dompak * Sidon, jala manurirangi ma ho taringot tusi! [308†]

²²Jala dohononmu ma: Songon on do hata ni Tuhan Jahowa: Ida ma, ahu ro * marlulu dompak ho ale Sidon, jala marmulia ahu bahenonku di tongatongami, asa tung diboto nasida ahu do Jahowa, molo huputushon angka uhum di bagasanna, jala badia ahu hubahen di tongatongana. [309†]

²³Ai tongoshononku ma tu bagasan huta i begu masa dohot durusdurus di mudar di angka alamanna, ingkon marragean jolma na mate tartiham di tongatongana marhitehite podang sian na humaliang, asa tung ditanda nasida ahu do Jahowa.

²⁴Jala ndang adong be sogot di pinompar ni Israel tau suga na manura manang basir na mambugangi sian saluhut halak angka na humaliang nasida, angka na marhu ni roha mida nasida: Asa tung diboto nasida ahu do Tuhan Jahowa. IV.

²⁵Songon on do hata ni Tuhan Jahowa: Molo ahu papungupunguhon sogot pinompar ni Israel sian angka bangso parserahannasida na sai laon, jadi badia ma ahu marhite sian nasida di adopan ni bangso parbegu, jadi maringan ma nasida di tanonasida i naung hubasabasahon hian tu si Jakkob naposongki. [310†]

²⁶Asa marsonangsonang nasida maringan disi huhut pauli angka bagas dohot manuan angka porlak anggur, asa tung marsonangsonang nasida maringan, molo huputushon angka uhum tu saluhut angka na marhu ni roha mida nasida sian angka na humaliang nasida; asa tung ditanda nasida ahu do Jahowa, Debatanasida i.