Read Batak Toba PANURIRANG HESEKIEL 3 Bible Online

PANURIRANG HESEKIEL 3 - Batak Toba bible

PANURIRANG HESEKIEL 3

¹I. [1] Dung i ninna ibana muse tu ahu: Ale anak ni jolma, pangan ma na jumpang ho di jolom; pangan ma tahe balunanon, jala laho ma ho, hatahon ma tu pinompar ni Israel. [18†]

²Jadi hupangangang ma pamanganku, gabe dilehon ibana ma balunan i panganonku.

³Laos didok ma tu ahu: Ale anak ni jolma, ingkon panganonmu, jala onjathononmu tu butuham balunan na hulehon i tu ho. Jadi hupangan ma, gabe tonggi songon situak ni loba di bagasan pamanganku. [19†]

⁴Dung i ninna ibana muse tu ahu: Ale anak ni jolma, laho ma ho mandapothon pinompar ni Israel, jala hatahon ma tu nasida angka hatangki!

⁵Ai ndada tu bangso parhata bobang, manang pardila na hallang ho sinuru, tu pinompar ni Israel do.

⁶Ndada tu torop bangso, angka parhata bobang, manang pardila na hallang, angka na so dapot ho hatanasida antusanmu; atik pe so tu nasida ho husuru, ianggo nasida tangihononna do ho, tung sura.

⁷Alai anggo pinompar ni Israel, ndang olo nasida tumangihon ho, ai ndang olo nasida tumangihon ahu; ai tung sandok pinompar ni Israel, angka sipir pardompahan do, jala angka na tangkang marroha do nasida.

⁸Ida ma, nunga hupapir bohim suman tu bohinasida, jala nunga hupapir pardompahanmu suman tu pardompahannasida i. [20†]

⁹Nunga hupapir pardompahanmu, songon mata intan, umpir sian batu hian tahe; unang ho mabiar mida nasida, jala unang tahuton ho maradophon bohinasida, ai pinompar na tangkang do nasida. [21†]

¹⁰Angkup ni ninna ibana tu ahu: Ale anak ni jolma, luhut hata angka na huhatahon tu ho, ingkon pajoponmu tu bagasan roham, jala pinggolonmu.

¹¹Antong laho ma ho mandapothon angka naung tarbuang, manopot angka anak ni bangsom, pangkulinganmu ma nasida, jala dohononmu tu nasida: Songon on do hata ni Tuhan Jahowa! Manang tangihononna, manang ndang. [22†] II.

¹²Dung i * diluahon Tondi i ma ahu, gabe hubege sian pudingku soara hariburon bolon, ninna ma: Pinuji ma hamuliaon ni Jahowa + sian hajongjonganna! [23†]

¹³Angkup ni hubege soara ni habong ni angka parngolu i, angka na masidolosan, dohot soara ni roda, angka na di lambungna, dohot soara ni hariburon bolon.

¹⁴Jadi dung diluahon Tondi i ahu, laos diusung ahu, gabe piripirion ahu mardalan di mohop ni ateatengku, alai tangan ni Jahowa do margogoihon ahu.

¹⁵Jadi tolhas ma ahu tu angka na tarbuang di Tel-Abib, angka na maringan martopihon batang aek Hebar, laos disi do ahu hundulhundul rap dohot nasida pitu ari padodot, hohom boti di tongatonganasida. III.

¹⁶Jadi dung salpu na pitu ari i, ro ma hata ni Jahowa tu ahu songon on:

¹⁷Ia ho anak ni jolma! Nunga hupabangkit ho bahen * siparmahan halak Israel, dibahen i sai tangihon ma hata na ruar sian pamanganku, angka sipatolhasonmu palumba nasida sian ahu. [24†]

¹⁸Molo hudok tu parjahat i: Ingkon mate ho, hape ndang dipalumba ho ibana, jala ndang diapoi ho ibana tumundalhon dalanna na jahat i, asa dapotan hangoluan ibana nian; sai na mate do nian parjahat i di bagasan hajahatonna, alai * sian tanganmi do partungguhononku mudarna. [25†]

¹⁹Alai anggo dipalumba ho do parjahat i, hape ndang olo ibana tumadingkon hajahatonna i dohot dalanna na jahat i, mate di bagasan hajahatonna ma ibana, alai malua do anggo tondim. [26†]

²⁰Alai molo * ditadingkon partigor i hatigoranna na sai laon, jala diulahon hageduhon, bahenonku ma partuktuhan tu jolona, asa mate ibana, ai ndang dipalumba ho ibana; mate di bagasan dosana do nian ibana, jala ndang be ingoton hatigoranna na niulana i, alai anggo mudarna sian tanganmu do pangidoonku. [27†]

²¹Alai molo tung dipalumba ho partigor i na sai laon, unang nian mardosa partigor i, gabe laos so mardosa ibana, ingkon mangolu ibana, ala na olo ibana palumbaon, ho pe nunga dipalua ho tondim. IV.

²²Dung i * ampe ma disi tu ahu tangan ni Jahowa, jala ninna ma tu ahu: Borhat ma ho, ruar ma ho mandapothon rura i, asa disi huangkupi ho mangkatai. [28†]

²³Jadi borhat ma ahu, jala ruar manopot rura i, gabe ida ma, jongjong disi hamuliaon ni Jahowa, suang songon hamuliaon, na huida di topi ni * batang aek Hebar, gabe manungkap ma ahu tu tano. [29†]

²⁴Jadi bongot ma Tondi i tu bagasan ahu, jala dipajongjong ahu di pathu, laos diangkupi ahu mangkatai, jala ninna mandok ahu: Laho ma ho, hurungkon ma ho di bagasan jabum! [30†]

²⁵Ia ho ale anak ni jolma, ida ma, ampehononnasida ma angka tali tu ho, laos ihotanna ho, asa unang ho ruar tu tongatonganasida.

²⁶Angkup ni lohot ma bahenonku dilam tu langitlangit ni pamanganmu, asa mangungu ho, asa unang be ho jolma paminsang di nasida, ai * bangso panggunturi do nasida. [31†]

²⁷Alai molo huangkupi ho muse mangkatai, bungkaonku ma pamanganmu, gabe dohononmu ma tu nasida: Songon on do hata ni Tuhan Jahowa: Manang ise na umbegesa, dibege ma, manang ise na so olo, ndengkon olo! Ai bangso panggunturi do nasida. [32†]