Read Batak Toba PANURIRANG HESEKIEL 30 Bible Online

PANURIRANG HESEKIEL 30 - Batak Toba bible

PANURIRANG HESEKIEL 30

¹I. [1] Dung i ro muse hata ni Jahowa tu ahu songon on:

²Ale anak ni jolma, manurirangi ma ho, jala dohononmu ma: Songon on do hata ni Tuhan Jahowa: Andungkon hamu ma, oe ari i marisuang!

³Ai nunga * jonok ari i, nunga jonok tongon ari ni Jahowa, ari na hobot, tingki partubolan tu angka bangso parbegu ma i. [318†]

⁴Ingkon masuk ma podang i tu Misir gabe masa parsipalon di Kus di hararage ni halak na mate tartiham di Misir; jala buatonnasida hinagodang ni sinamotna, jala lohaonna angka ojahanna.

⁵Tole halak Kus dohot Pud dohot Lud ro di sandok na hinarana dohot Kub ro di angka anak ni tano parjanjian, rap marragean do nasida marhitehite podang. [319†]

⁶Songon on do hata ni Tuhan Jahowa: Ingkon marragean do halak situngkol Misir, jala ingkon mijur hinatimbul ni gogona; * olat ni Migdol sahat tu Siene marragean nasida di bagasan ibana marhitehite podang, ninna Tuhan Jahowa. [320†]

⁷Jala ingkon tarulang nasida di tongatonga ni luat angka na tarulang, jala angka hutana ingkon di tongatonga ni huta angka na tarulang do. [321†]

⁸Asa tung ditanda nasida, ahu do Jahowa, molo ahu pagalakkon api di Misir, jala tarjepol saluhut halak angka na hinarana.

⁹Di ari na sasada i, ruar ma angka suruan sian jolongku di bagasan angka kopal, asa * manonggoti Kus na tarlalap i, jala masa parsipalon di nasida, suang songon di ari ni Misir, ai ida ma, nunga tung ro! [322†] II.

¹⁰Songon on do hata ni Tuhan Jahowa: Ahu huhut pasadihon hariburon ni Misir marhitehite tangan ni si Nebukadnesar, raja sian Babel.

¹¹Ibana udur dohot bangsona rap dohot bangso * parbegu angka na gumarang, ro be laho umpansingkon tano i, jala umpatonnasida do podangnasida dompak Misir, jala gok jolma na mate tartiham tano i bahenonnasida. [323†]

¹²Jala ahu mambahen marsik angka batang aek i, gadisonku do tano i tu tangan ni halak parjahat, jala tarulang bahenonku tano i ro di isina marhitehite tangan ni halak ruar; ahu Jahowa sandiri do na mandok i. [324†]

¹³Songon on do hata ni Tuhan Jahowa: Pesan do huhut bahenonku angka ganaganaan, jala pasohotonku angka debata sileban sian Nop, jala ndang adong be induk sian tano Misir, jala lehononku do roha hatahuton di tano Misir.

¹⁴Tarulang huhut bahenonku Patros, jala pagalahonku api sada di * Zoan, jala dabuonku angka uhum di + No. [325†]

¹⁵Jala usehononku do rimashu tu Sin, huta na gonting di Misir, jala pindomhononku do hariburon di No.

¹⁶Jala pagalahonku do sada api ni Misir, tarjimput situtu ma hilalaon ni Sin, jala tartaban ia No, jala hagogotan situtu ia Nop ariari.

¹⁷Ianggo angka dolidoli sian * On dohot sian Babustis, ingkon marragean do marhitehite podang jala tarboan tu habuangan isi ni huta i. [326†]

¹⁸Di * Tahpanhes pe mangkolom ari, molo huponggolhon disi angka auga ni Misir, jala pesan disi hinatimbul ni gogona; ombun do manghungkupisa, jala tarboan tu habuangan do angka boruna. [327†]

¹⁹Jadi putus hubahen angka uhum di Misir, asa tung ditanda nasida, ahu do Jahowa. III.

²⁰Pasampulu sada taonhon, di ari pitu bulan sipaha sada, ro muse hata ni Jahowa tu ahu songon on:

²¹Ale anak ni jolma, nunga huponggolhon botohon ni Firaun, raja sian Misir jala ida ma, ndang jadi hona pauli ibana manang taoaran manang hona lilit pe, asa margogo nian muse laho maniop podang. [328†]

²²Dibahen i songon on do hata ni Tuhan Jahowa: Ida ma, ahu ro marlulu dompak Firaun, raja sian Misir, jala ahu umponggolhon botohonna duansa, nang na gogo dope, nang naung maponggol hian, jala peuthononku ma podang i sian tanganna.

²³Jala ahu pamamparhon halak Misir tu tongatonga ni angka bangso parbegu, jala paserahonku nasida tu angka luat ni halak. [329†]

²⁴Pargogoanku ma anggo angka botohon ni raja sian Babel, jala lehononku * podangku tu bagasan tanganna; alai ponggolhononku ma anggo angka botohon ni Firaun, asa mangangguhi ibana songon halak na targisik bugangna, jomjam tu jolona. [330†]

²⁵Pargogoanku ma tutu angka botohon ni raja sian Babel, daoldaol ma anggo botohon ni Firaun, asa tung ditanda nasida, ahu do Jahowa, molo hulehon podangku tu bagasan tangan ni raja sian Babel, asa ditampulhon marlulu dompak tano Misir.

²⁶Asa ahu pamamparhon halak Misir tu tongatonga ni angka bangso parbegu dohot paserakkon nasida tu angka luat, asa tung ditanda nasida ahu do Jahowa.