Read Batak Toba PANURIRANG HESEKIEL 35 Bible Online

PANURIRANG HESEKIEL 35 - Batak Toba bible

PANURIRANG HESEKIEL 35

¹Dung i ro muse hata ni Jahowa tu ahu songon on:

²Ale anak ni jolma, tujuhon ma bohim dompak * dolok Seir, jala manurirangi ma ho taringot tusi! [382†]

³Jala dohononmu ma tu ibana: Songon on do hata ni Tuhan Jahowa: Ida ma, ahu ro marlulu dompak ho, ale dolok Seir, jala patoltolonku tanganku dompak ho, jala bahenonku ho gabe halongonan jala tarulang.

⁴Angka hutam pe tarulang do bahenonku, asa gabe halongonan ho, asa tung ditanda ho, ahu do Jahowa!

⁵Ala na marmusu tihus ho sian na robi dope, jala dipasahat ho halak Israel tu baba ni podang, uju di tingki parsipalonnasida, uju di tingki panimpulan ni hajahaton. [383†]

⁶Dibahen i, songon sintongna mangolu ahu, ninna Tuhan Jahowa, ingkon gabe mudar ho bahenonku, jala parsapataan mudar paburuburu ho, ala * so dihagigihon roham mudar, ingkon parsapataan mudar mangalotongi ho. [384†]

⁷Jala bahenonku do dolok Seir gabe halongonan, jala tarulang, jala siaphononku do sian i halak na marmeang muli.

⁸Jala gok bahenonku angka dolokna halak na mate tartiham sian ibana; marpeahan do huhut di dolokdolokmu, di angka ruram, dohot di saluhut angka sungemi, jolma angka na mate tiniham ni podang.

⁹Ingkon gabe halongonan ho ro di salelenglelengna bahenonku, angka hutam pe ndang be inganan, asa tung ditanda hamu, ahu do Jahowa.

¹⁰Ala naung nidokmi: Na dua bangso i dohot na dua luat i sai na sahat tu ahu do i, jala teanonnami do i, ndang disi Jahowa maringan. [385†]

¹¹Dibahen i, songon sintongna mangolu ahu, ninna Tuhan Jahowa, ingkon bahenonku hombar tu rimasmu dohot hombar tu pangiburuonmu, na binahenmi sian gigim mida nasida, asa tung hupatandahon ahu di tongatonganasida, ia dung hulaluhon uhum tu ho.

¹²Asa tung ditanda ho, ahu do Jahowa, naung umbege saluhut elakelakmu, angka naung nidokmu taringot tu angka dolok Israel songon on: Nunga tung tarulang! Sahat tu hita ma sahalanta.

¹³Gari dompak ahu nunga manenganenga pamanganmuna, jala dipadeakdeak hamu hatahatamuna mangalo ahu, pola ahu umbegesa.

¹⁴Songon on do hata ni Tuhan Jahowa: Molo marlas ni roha be sogot sandok tano on, halongonan ma ianggo ho bahenonku.

¹⁵Hombar tu * las ni roham mida partalian ni pinompar ni Israel ala naung tarulang, suang songon i bahenonku tu ho: Ingkon gabe halongonan ho, ale dolok Seir, tung ro di sandok Edom, asa tung ditanda nasida, ahu do Jahowa! [386†]