Read Batak Toba PANURIRANG HOSEA 9 Bible Online

PANURIRANG HOSEA 9 - Batak Toba bible

PANURIRANG HOSEA 9

¹I. [1] Unang marlas ni roha ho ale Israel pola marolopolop songon angka parbegu, ai nunga * marmainan ho marbalik sian Debatam, nunga mangapian ho di upa parmainanon di atas ni saluhut angka pardegean eme. [72†]

²Dibahen i ndang be parmuduon ni pardegean dohot pangilangan anggur nasida jala ansion ni anggur na imbaru do nasida.

³Ndang be maringan nasida di tano ni Jahowa, ingkon * mulak tu Misir do Epraim, jala panganonnasida do + na ramun di Assur. [73†]

⁴Ndang tagamon usehononnasida anggur di Jahowa, jala ndang tagamon lomo rohana di angka peleannasida i, tudoshon sagusagu hinamago do i di nasida ramun do sude na manganhon. Ai marmudu hosanasida sandiri do sagusagunasida i, ndang tarbahen masuk tu joro ni Jahowa. [74†]

⁵Tung aha ma bahenonmuna di ari luhutan dohot di ari raya ni Jahowa?

⁶Ai ida ma, nunga laho nasida dibahen hasisiap; papungupunguon ni Misir do nasida, Mempis mananom nasida. Homitannasida sian perak teanon ni latong do, * duriduri tubu di bagasan undungundungnasida. [75†]

⁷Nunga ro angka ari partubolan! Nunga ro angka ari pamalosan! Botoon ni Israel ma disi: Na bodo do panurirang, lalaen do baoa partondion dibahen hinadeak ni hajahatonmu dohot dibahen hinagodang ni pangiburuon.

⁸Epraim mangonggop umbajo bangso ni Debatangku; panurirang i do * rambang ni halak sitaoni pidong di saluhut angka dalanna; masa do pangiburuon di bagasan bagas ni Debatana. [76†]

⁹Tung na bagas do halonongannasida, songon * uju di Gibea; ingotonna ma hajahatonnasida, luluhononna ma dosanasida. [77†] II.

¹⁰Songon * parbue ni anggur di halongonan Israel jumpang ahu, songon patumonaan ni antajau huida ompumuna di mulana; hape laho do nasida tu + Baal-Peor pasahathon dirinasida tu haurahon, gabe biasbias nasida suang songon puangnasida. [78†]

¹¹Dibahen i habang do songon pidong hamuliaon ni Epraim, ndang be mangintubu, ndang be marhangoluan jolma, manang olo gabegabean.

¹²Ai nang pe dipagodanggodang nasida angka anaknasida, punu do nasida bahenonku, langa soada jolma. Tongon do, marjea ma nasida molo manginsurut ahu sian nasida.

¹³* Tudoshon Tirus jolo huida Epraim, sinuan di jampalan na lomak; alai ingkon togihonon ni Epraim sogot angka anakna laho pabunuhonsa. [79†]

¹⁴Lehon ma tu nasida, ale Jahowa! Aha tahe patut lehononmu? Lehon ma tu nasida bortian na hol dohot bagot na marsik.

¹⁵Nasa hajahatonnasida di Gilgal do, ai disi do hupungka mangkagigihon nasida. Ala ni roa ni pambahenannasida, onjarhononku ma nasida sian bagashu, ndang be datdatanku mangkaholongi nasida; panggunturi do saluhut induknasida. [80†]

¹⁶Nunga talu Epraim; nunga malos uratna, ndang be marparbue nasida; tung sura pe mangintubu nasida, bunuonku do angka na pinarsinta ni butuhanasida.

¹⁷Bolongkonon ni Debatangku do nasida, ai ndang ditangihon nasida ibana, jadi maotaot ma nasida di tongatonga ni halak parbegu.