Read Batak Toba PANURIRANG AMOS 1 Bible Online

PANURIRANG AMOS 1 - Batak Toba bible

PANURIRANG AMOS 1

¹I. [1] On ma angka hata ni si Amos * sada halak sian angka parmahan sian Tekoa, angka na niidana taringot tu Israel di angka ari ni ** si Usia, raja sian Juda, dohot di angka ari ni + si Jerobeam anak ni si Joas, raja sian Israel, dua taon jumolo ++ sian lalo. [1†]

²Jadi didok ma: * Patungoromon do Jahowa sian Sion, jala dipangiar soarana sian Jerusalem. Jadi malos ma angka jampalan ni angka parmahan, jala hasang punsu ni Karmel. [2†] II.

³Songon on do hata ni Jahowa: Ala ni tolu pangalaosion ni * Damaskus, jala ala ni opat ndang pasurutonku, ala naung + diluntak nasida Gilead marhitehite salosap bosi. [3†]

⁴Alani tongosonku ma api tu bagasan bagas ni si Hasael, gabe suda panganonna angka bagas bolon ni si Benhadad. [4†]

⁵Ponggolhononku dohot ransangransang ni pargumbangan ni Damaskus, jala siaphononku jolma pangisi ni rura ajiajian ro di sitiop tungkot harajaon sian huta Harorangan gabe tarbuang bangso Ram tu * Kir, ninna Jahowa. [5†] III.

⁶Songon on do hata ni Jahowa: Ala ni tolu pangalaosion ni * Gasa, jala ala ni opat ndang pasurutonku, ala dibuangkon nasida hinagok ni angka na tarbuang laho pasahathon tu Edom. [6†]

⁷Dibahen i tongosonku ma api tu bagasan angka parik ni Gasa, gabe suda panganonna angka bagas na bolon.

⁸Jala siaphononku jolma pangisi ni Asdod, ro di sitiop tungkot harajaon sian Askelon; jala patoltolonku ma tanganku dompak Ekron, gabe mago ma pasipasi ni halak Palistim, ninna Tuhan Jahowa. IV.

⁹Songon on do hata ni Jahowa: Ala ni tolu pangalaosion ni * Tirus, jala ala ni opat ndang pasurutonku, ala dipasahat nasida hinagok ni angka na tarbuang tu Edom, jala ndang diingot nasida + padan pardongansabutuhaon. [7†]

¹⁰Dibahen i tongosonku ma api tu bagasan angka parik ni Tirus gabe suda panganonna angka bagas na bolon. V.

¹¹Songon on do hata ni Jahowa: Ala ni tolu pangalaosion ni * Edom, jala ala ni opat ndang pasurutonku, ala na nilelena anggina + patioptiop podang, jala diojoti angka asina jala tongtong manansani rimasna, jala martaronggop murukna salelenglelengna. [8†]

¹²Dibahen i tongosonku ma api tu bagasan Teman, gabe suda panganonna angka bagas bolon * di Bosra. [9†] VI.

¹³Songon on do hata ni Jahowa: Ala ni tolu pangalaosion ni * halak Amon, jala ala ni opat ndang pasurutonku, ala + dilapa nasida angka na gabegabean di Gilead asa pabidang parbalohannasida. [10†]

¹⁴Dibahen i pagalahonku ma api di bagasan angka parik ni Rabba, gabe suda panganonna angka bagas na bolon, mardongan suraksurak di ari tongtangan, mardongan habahaba di ari hamamasa ni halisungsung.

¹⁵Tarboan dohot rajanasida tu habuangan, ibana rap dohot induk pinabangkitna i, ninna Jahowa.