Read Batak Toba PANURIRANG AMOS 2 Bible Online

PANURIRANG AMOS 2 - Batak Toba bible

PANURIRANG AMOS 2

¹I. [1] Songon on do hata ni Jahowa: Ala ni tolu pangalaosion ni * Moab, jala ala ni opat ndang pasurutonku, ala tinutunganna i angka holiholi ni raja ni Edom bahen hapur. [11†]

²Dibahen i tongosonku ma api tu bagasan Moab, gabe suda panganonna angka bagas bolon di Keriot, gabe mate Moab di hagunturon, marsoara toletole, marsoara sarune.

³Jala siaphononku ma panguhum sian tongatongana, jala bunuonku sude indukna rap dohot ibana, ninna Jahowa. [12†] II.

⁴Songon on do hata ni Jahowa: Ala ni tolu pangalaosion ni Juda, jala ala ni opat ndang pasurutonku ala ditoishon nasida patik ni Jahowa, jala ndang diradoti angka tonana, gabe gabusnasida, angka na niihuthon ni angka ompunasida dope paotootohon nasida.

⁵Dibahen i tongosonku ma api tu bagasan Juda, gabe suda panganonna angka bagas bolon di Jerusalem. III.

⁶Songon on do hata ni Jahowa: Ala ni tolu pangalaosion ni Israel, jala ala ni opat ndang pasurutonku, ala digadishon nasida partigor i tu perak dohot na pogos i * ali ni sipatu sapasang. [13†]

⁷Nasida angka na mangkauashon orbuk ni tano i * ampe tu ulu ni halak na pogos, jala dipailingiling dalan ni halak na dangol; udur anak dohot amana laho tumopot sada parompuan, asa diramuni goarhu na badia. [14†]

⁸Marbustangan nasida di angka * ulos gade di lambung ni saluhut langgatan, jala anggur ni angka na hona dando disobur nasida di bagas ni angka debatanasida. [15†]

⁹Hape ahu nian mamansingkon halak * Amori maradophon nasida, atik pe nasa timbo ni hau ares timbona, jala songon hau hariara bolonna; ahu mamansingkon parbuena sian ginjang, jala uratna sian toru. [16†]

¹⁰Jala ahu nian manogihon hamu ruar sian tano Misir, jala huiringiring hamu, di halongonan opatpulu taon lelengna laho manean tano ni halak Amori. [17†]

¹¹Jala ahu pabangkithon sian angka anakmuna bahen panurirang, jala sian dolidolimuna bahen halak * na pinapulik. Atehe, nda tongon do, hamu ale angka anak ni Israel! ninna Jahowa. [18†]

¹²Hape dipainumhon hamu do anggur tu halak na pinapulik, jala ditonahon hamu tu angka panurirang: * Ndang jadi hamu manurirangi! [19†]

¹³Ida ma ahu ma manipa hamu, songon panipa ni hureta, na gok tibalan.

¹⁴Jadi * ndang marguna hapoporus ni halak na bontis, jala ndang targogohon halak na gogo gogona i, jala ndang tarpalua ulubalang hosana. [20†]

¹⁵Halak sisintak sior pe, ndang manahan jongjong, jala halak na bontis mardalan ndang malua, halak parsihundul di hoda pe, ndang tarpaluasa hosana.

¹⁶Jala halak na todos roha sian angka ulubalang, marsaemara ibana maporus di ari na sasada i, ninna Jahowa.