Read Batak Toba PANURIRANG AMOS 9 Bible Online

PANURIRANG AMOS 9 - Batak Toba bible

PANURIRANG AMOS 9

¹I. [1] Huida do Tuhan i jongjong di atas ni langgatan, jala ninna do: Lotak ma pasina, asa * humuntal angka balok, jala ropuhi nasida di atas ni ulu ni saluhut nasida! Jala pinomparnasida bunuonku do marhitehite podang; ndang adong + na malua sian nasida angka na maporus i, ndang adong na malua tutu nanggo sada. [83†]

²Tung sura pe ditondong nasida sahat tu bagasan parbeguan, alapon ni tanganku do nasida sian i; jala tung sura pe manaek nasida tu banua ginjang, paijuronku do nasida sian i. [84†]

³Tung sura pe martabuni nasida di punsu ni Karmel hampunganku do nasida, huhut mamboan nasida sian i; tung sura pe martabuni nasida maradophon matangku di bagasan lung ni laut, dohononku do sian i naga i, asa dipargut nasida.

⁴Tung sura pe laho nasida tu habuangan di jolo ni angka musu nasida, dohononku do sian i podang i, asa dibunu nasida. Sai * nolnol do matangku mangalo nasida mambahen marhinamago, ndang anggo na denggan. [85†]

⁵Molo Tuhan Jahowa Zebaot manjama tano on * gabe malala ma jala margudompong sude pangisina i, + gabe binsat songon batang aek Nil sandok tano i jala moru muse songon Nil ni Misir. [86†]

⁶Ibana do * paulihon angka bilutna parginjang di banua ginjang, jala punguanna diojakkon di atas tano on. + Ibana do na manjou angka aek ni laut, jala diusehon muse tu sisik ni tano on, Jahowa do goarna! [87†] II.

⁷Nda * songon angka anak ni halak Kus, hamu ale halak Israel di ahu? ninna Jahowa. Nda ahu do na manogihon halak Israel ruar sian tano Misir, jala halak ** Palistim sian Kaptor, jala halak Ram + sian Kir? [88†]

⁸Ida ma, sai nolnol do mata ni Tuhan Jahowa mangalo harajaon pardosaon i, sai siaphononku do i sian sisik ni tano on, * alai tahe ndatung sun siap bahenonku pinompar ni si Jakkob, ninna Jahowa. [89†]

⁹Ai ida ma, ahu martona jala marsege sogot pinompar ni Israel di tongatonga ni saluhut bangso parbegu, songon na marsege di anduri, jala ndang mapisik tu tano na porngis, nanggo sangkamata.

¹⁰Binahen ni podang marmatean sogot nasa pardosa ni bangsongki, * angka na mandok: Ndang tagamon sahat manang mangonai tu hita hinamago i. [90†]

¹¹Di ari na sasada i * pajongjongonku ma muse undungundung ni si Daud na malohai, jala paulionku parik angka na bungbung i, jala pajongjongonku muse angka na malohai, jala paulionku do i, suang songon di angka ari mulamula. [91†]

¹²Asa nasida manean pasipasi ni Edom dohot saluhut bangso parbegu angka na targoar tu goarhu, ninna Jahowa, na pasauthon songon i.

¹³Ida ma, na ro do sogot angka ari, ninna Jahowa: * Masijaloan ma paninggala dohot panggotil, pardege dohot panabur; jadi + manetekkon anggur angka dolok, jala binsat angka dolokdolok sudena. [92†]

¹⁴Dung i * togihononku ma mulak angka na tarbuang sian bangso Israel; jala paulionnasida muse huta angka na tarulang, laos inganannasida ma, jala + pungkaonnasida ma angka porlak anggur, laos inumonna ma anggurna, jala pangkeonnasida ma angka porlak, laos panganonna dohot parbuena. [93†]

¹⁵Jala * lopokhononku ma nasida tu tanonasida, jala ndang be pabalionku nasida sian tanonasida, na hulehon i tu nasida, ninna Jahowa Debatam. [94†]