Read Batak Toba PANURIRANG JONA 3 Bible Online

PANURIRANG JONA 3 - Batak Toba bible

PANURIRANG JONA 3

¹I. [1] Dung i ro ma muse hata ni Jahowa tu si Jona paduahalihon, songon on:

²* Borhat ma ho laho tu Ninive huta na bolon i, jala tingtingkon tusi tingting sipaboaonku tu ho. [15†]

³Jadi borhat ma si Jona laho tu Ninive hombar tu hata ni Jahowa. Alai * huta na bolon do ianggo Ninive di jolo ni Debata, partoluarian mardalan lambasna. [16†]

⁴Dung i dipungka si Jona ma mardalan di bagasan huta i parsadarian, jala martingting ma ibana mandok: Opatpulu ari nari na ma, jadi marongrong ma Ninive! II.

⁵Jadi porsea ma angka jolma i isi ni Ninive i di Debata, jala ditingtingkon mandokkon marpuasa sadari, jala marulos hori nasida sian halak na magodang ro di na metmet. [17†]

⁶Dung i sahat ma hata i tu raja ni Ninive. Jadi hehe ma ibana sian habangsana, jala diosari pangkeanna hian sian dagingna, jala martujungkon hori ibana, jala hundul tu sirabun.

⁷Dung i disuru rajai ma martingting paboahon tu bagasan Ninive, songon on do tingting ni rajai dohot donganna angka na sangap: Nang jolma dohot pinahan, tole lombu dohot birubiru, ndang jadi mandai agia aha, ndang jadi manggagat, aek pe ndang jadi inumonna.

⁸Ingkon marulos hori jolma, nang pinahan, jala gogoonna be joujou tu Debata; jala ganup jolma ingkon mulak sian dalanna na roa i, dohot sian hatodoson na niula ni tangannasida. [18†]

⁹* Ise umbotosa, anggiat tung marpangulahi jala solsolan ni Debata rohana, jala mulak ibana sian parpiar ni rimasna, asa unang mago hita. [19†]

¹⁰Jadi dung diida Debata pambahenannasida, na mulak i nasida sian dalannasida angka na roa i, * gabe disolsol Debata ma rohana taringot tu hamagoan na nilumbahonna bahenonna hian tu nasida, gabe ndang saut dibahen. [20†]