Read Batak Toba 4 MUSA 1 Bible Online

4 MUSA 1 - Batak Toba bible

4 MUSA 1

¹I. [1] Dung i ro muse hata ni Jahowa tu si Musa di halongonan Sinai, di bagasan undungundung parluhutan i, di artia bulan sipaha dua, paduataonhon dung ruar nasida sian tano Misir, ninna ma:

²Surathon ma bilangan ni sandok luhutan ni Israel marmargamarga, marompuompu, marsasahalak nasa baoa tahe. [1†]

³Olat ni na marumur duapulu taon dohot lobi sian i, nasa baoa sialo musu di Israel, ingkon bilangonmuna nasida mangihuthon parduaannasida, ho dohot si Aron. [2†]

⁴Jala ingkon adong donganmuna sasahalak sian ganup marga, i ma gabe ihutan di nasida na samarga.

⁵Jala on do goargoar ni angka baoa na jongjong mandongani hamu: Sian marga Ruben: Si Elizur, anak ni si Sedeur.

⁶Sian Simeon: Si Selumiel, anak ni si Zurisaddai.

⁷Sian Juda: Si Nahason anak ni si Aminadab. [3†]

⁸Sian Isasar: Si Netaneel, anak ni si Zuar.

⁹Sian Zebulon: Si Eliab, anak ni si Helon.

¹⁰Sian angka anak ni si Josep, sian Epraim: Si Elisama, anak ni si Amihud; sian Manasse: Si Gamaliel, anak ni si Pedazur. [4†]

¹¹Sian Benjamin: Si Abidan, anak ni si Gidion i. [5†]

¹²Sian Dan: Si Ahieser, anak ni si Amisaddai. [6†]

¹³Sian Aser: Si Pagiel, anak ni si Okran.

¹⁴Sian Gad: Si Eliasap, anak ni si Deuel.

¹⁵Sian Naptali: Si Ahira, anak ni si Enan. [7†]

¹⁶I ma halak angka na tarpio tu parluhutan i, angka induk marmargamarga, dohot marompuompu; angka ihutan marsasaribu halak di Israel do nasida. II.

¹⁷Dung i dipapulik si Musa dohot si Aron ma angka baoa i, angka napola ginoar.

¹⁸Laos sandok luhutan i paluhuthon nasida di artia bulan sipaha dua, asa dipasurathon partubuna be marmargamarga dohot marompuompu dohot marsasahalak baoa, olat ni na marumur duapulu taon dohot lobi sian i.

¹⁹Hombar tu na tinonahon ni Jahowa tu si Musa, laos dibilangi ma nasida di halongonan Sinai.

²⁰Ia bilangan ni pinompar ni si Ruben, anak buhabaju di Israel, mangihuthon partubunasida marmargamarga, marompuompu, marsasahalak pe, nasa baoa na marumur duapulu taon dohot lobi sian i, nasa baoa sialo musu.

²¹Angka na tarbilang sian marga Ruben opatpulu onom ribu lima ratus halak toropna.

²²Ia bilangan ni pinompar ni si Simeon, mangihuthon partubunasida marmargamarga, marompuompu, marsasahalak pe, nasa baoa na marumur duapulu taon dohot lobi sian i, nasa baoa sialo musu.

²³Angka na tarbilang sian marga Simeon limapulu sia ribu tolu ratus halak toropna. [8†]

²⁴Ia bilangan ni pinompar ni si Gad, mangihuthon partubunasida marmargamarga, marompuompu, marsasahalak pe, na marumur duapulu taon dohot lobi sian i, nasa baoa sialo musu.

²⁵Angka na tarbilang sian marga Gad opatpulu lima ribu onom ratus limapulu halak toropna.

²⁶Ia bilangan ni pinompar ni si Juda mangihuthon partubunasida, marmargamarga, marompuompu, marsasahalak pe, na marumur duapulu taon dohot lobi sian i, nasa baoa sialo musu.

²⁷Angka na tarbilang sian marga Juda pitupulu opat ribu onom ratus halak toropna.

²⁸Ia bilangan ni pinompar ni si Isasar mangihuthon partubunasida, marmargamarga, marompuompu marsasahalak pe, na marumur duapulu taon dohot lobi sian i, nasa baoa sialo musu.

²⁹Angka na tarbilang sian marga Isasar limapulu opat ribu opat ratus halak toropna.

³⁰Ia bilangan ni pinompar ni si Zebulon mangihuthon partubunasida marmargamarga, marompuompu, marsasahalak pe, na marumur duapulu taon dohot lobi sian i, nasa baoa sialo musu.

³¹Angka na tarbilang sian marga Zebulon limapulu pitu ribu opat ratus halak toropna.

³²Ia bilangan ni pinompar ni si Josep, i ma sian Epraim mangihuthon partubunasida marmargamarga, marompuompu, marsasahalak pe, na marumur duapulu taon dohot lobi sian i, nasa baoa sialo musu.

³³Angka na tarbilang sian marga Epraim opatpulu ribu lima ratus halak toropna.

³⁴Ia bilangan ni pinompar ni si Manasse mangihuthon partubunasida marmargamarga, marompuompu, marsasahalak pe, na marumur duapulu taon dohot lobi sian i, nasa baoa sialo musu.

³⁵Angka na tarbilang sian marga Manasse tolupulu dua ribu dua ratus halak toropna.

³⁶Ia bilangan ni pinompar ni si Benjamin mangihuthon partubunasida marmargamarga, marompuompu, marsasahalak pe, na marumur duapulu taon dohot lobi sian i, nasa baoa sialo musu.

³⁷Angka na tarbilang sian marga Benjamin tolupulu lima ribu opat ratus halak toropna.

³⁸Ia bilangan ni pinompar ni si Dan mangihuthon partubunasida marmargamarga, marompuompu, marsasahalak pe, na marumur duapulu taon dohot lobi sian i, nasa baoa sialo musu.

³⁹Angka na tarbilang sian marga Dan onompulu dua ribu pitu ratus halak toropna.

⁴⁰Ia bilangan ni pinompar ni si Aser mangihuthon partubunasida marmargamarga, marompuompu, marsasahalak pe, na marumur duapulu taon dohot lobi sian i, nasa baoa sialo musu.

⁴¹Angka na tarbilang sian marga Aser opatpulu sada ribu lima ratus halak toropna.

⁴²Ia bilangan ni pinompar ni si Naptali mangihuthon partubunasida marmargamarga, marompuompu, marsasahalak pe, nasa baoa sialo musu.

⁴³Angka na tarbilang sian marga Naptali limapulu tolu ribu opat ratus halak toropna.

⁴⁴I ma sude jolma na tarbilang, angka na binilang ni si Musa dohot si Aron rap dohot induk ni Israel na sampulu dua halak i, ganup nasida ihutan di nasida na saompu.

⁴⁵Asa saluhut angka na tarbilang sian halak Israel marompuompu, olat ni na marumur duapulu taon dohot lobi sian i, nasa baoa sialo musu di Israel.

⁴⁶Luhut angka na tarbilangi tahe onom ratus tolu ribu lima ratus limapulu halak toropna. [9†] III.

⁴⁷Alai anggo halak Lepi, nasida na samarga marompuompu, ndang masuk tu bilangannasida.

⁴⁸Ai nunga didok Jahowa hian tu si Musa songon on:

⁴⁹Holan marga Lepi ndang jadi bilangonmu, jala ndang jadi papunguon toropnasida i di tongatonga ni halak Israel. [10†]

⁵⁰Ingkon pabangkitonmu tahe halak Lepi patureture joro panindangion i ro di sude ulaulana dohot angka na masuk tusi; ingkon nasida do mangusung undungundung i ro di sude ulaulana, jala nasida marhalado disi, laos marsaro humaliang undungundung i. [11†]

⁵¹Ia jumpa borhat undungundung i, ingkon halak Lepi do manduduk; jala ia jumpa mangulon undungundung i, ingkon halak Lepi muse pajongjongkon; tung sura jumonok halak sileban tusi, ingkon marutang hosa ibana. [12†]

⁵²Ingkon marsaro dohot halak Israel, ganup di parsaroanna be, jala ganup mardonokkon partonggolna mangihuthon parduaan ni paranganna.

⁵³Alai anggo halak Lepi, ingkon marsaro humaliang undungundung panindangion i, asa unang mangonai rimas na marpiarpiar tu luhutan ni halak Israel; dibahen i ingkon radotan ni halak Lepi do siradotan i di undungundung panindangion i.

⁵⁴Dung i dibahen halak Israel ma hombar tu saluhut na tinonahon ni Jahowa tu si Musa, laos songon i dibahen nasida.