Read Batak Toba 4 MUSA 10 Bible Online

4 MUSA 10 - Batak Toba bible

4 MUSA 10

¹I. [1] Dung i ro muse hata ni Jahowa tu si Musa songon on:

²Bahen ma di ho dua sarune sian perak, ingkon sian sangkimpal perak do i topaonmu jala ingkon marhite sian i paluhutonmu luhutan i, jala dohononmu borhat angka parsaroan i. [86†]

³Molo tung duansa sarune i dipalu, ingkon marluhut ma sandok luhutan i tu lambungmu di adopan ni pintu ni undungundung parluhutan i.

⁴Molo holan sada sarune i mangkuling, ingkon marluhut ma tu lambungmu angka induk, angka ihutan ni halak Israel marriburibu.

⁵Alai molo marsoara toletole sarune i, ingkon tole ma borhat parsaroan angka na marsaro tungkan habinsaran.

⁶Molo marsoara toletole sarune i paduahalihon, ingkon borhat parsaroan angka na marsaro tungkan dangsina; ingkon jolo marsoara toletole sarune i, asa jadi borhat nasida.

⁷Alai molo naeng paluhuton luhutan i ingkon pola sangombas mangkuling sarune i, unang marsoara toletole.

⁸Ingkon angka anak ni si Aron, angka naung bangkit malim mamalu sarune i; i ma aturan na hot di hamu dohot di pinomparmuna ro di salelenglelengna.

⁹Tung sura borhat hamu tu parporangan di tanomuna i mangalo musumuna na manosaknosak hamu, ingkon marsoara toletole hamu marsarune, taringotanna ma hamu di adopan ni Jahowa, Debatamuna i, jala paluaonna hamu sian musumuna i.

¹⁰Suang songon i di ari halalas ni rohamuna, di angka ari rayamuna pe naung binuhul hian dohot di poltak ni bulan, ingkon paluonmu do angka sarune i laho pasahathon peleanmuna situtungon dohot peleanmuna hamauliateon, asa mambahen parningotan di hamu di adopan ni Debatamuna; ai Ahu do Jahowa, Debatamuna i. [87†] II.

¹¹Tole paduataonhon, di bulan sipaha dua, di ari duapulu, manaek ma ombun i sian atas ni undungundung panindangion i.

¹²Dung i borhat ma halak Israel mangihuthon jojornasida i mardalan sian parhorsihan Sinai, gabe mangulon ombun i muse di halongonan Elaparan.

¹³Jadi borhat ma parjolo i marguru tu hata ni Jahowa marhite sian si Musa. [88†]

¹⁴Borhat tahe jumolo partonggol ni parsaroan ni halak Juda rap dohot parduaannasida i jala ihutan ni parduaanna i, i ma si Nahason, anak ni si Aminadab.

¹⁵Jala ihutan ni parduaan ni marga ni halak Isasar, i ma si Natanael, anak ni si Zuar.

¹⁶Jala ihutan ni parduaan ni marga ni halak Zebulon, i ma si Eliab, anak ni si Helon.

¹⁷Dung i diloha ma undungundung i, jadi borhat ma angka anak ni si Gerson dohot si Merari, angka na mangusung undungundung i.

¹⁸Dung i borhat ma partonggol ni parsaroan Ruben rap dohot parduaannasida, jala ihutan ni parduaanna i, i ma si Elizur, anak ni si Sedeur.

¹⁹Jala ihutan ni parduaan ni marga ni halak Simeon, i ma Selumiel, anak ni si Zurisadai.

²⁰Jala ihutan ni parduaan ni marga ni halak Gad, i ma si Eliasap, anak ni si Deuel.

²¹Dung i borhat ma huhut halak Kohat i, angka na mangusung habadiaon i, asa sanga parjolo i pajongjongkon undungundung i, paima ro nasida.

²²Dung i borhat ma partonggol ni parsaroan ni halak Epraim, rap dohot parduaannasida i jala ihutan ni parduaannasida i, i ma si Elisama, anak ni si Amihud.

²³Jala ihutan ni parduaan ni marga ni halak Manasse, i ma si Gamaliel, anak ni si Pedazur.

²⁴Jala ihutan ni parduaan ni marga ni halak Benjamin, i ma si Abidan, anak ni si Gidion i.

²⁵Dung i borhat ma partonggol ni parsaroan ni halak Dan, rap dohot parduaannasida i, i ma panimpuli di sandok parsaroan, jala ihutan ni parduaanna i, i ma si Ahieser, anak ni si Amisaddai.

²⁶Jala ihutan ni parduaan ni marga ni halak Aser, i ma si Pagiel, anak ni si Okran.

²⁷Jala ihutan ni parduaan ni marga ni halak Naptali, i ma si Ahira, anak ni si Enan.

²⁸I ma parture ni haborhatan ni halak Israel rap dohot parduaannasida i, sai songon i do nasida borhat. III.

²⁹Dung i ro ma hata ni si Musa tu si Hobab, anak ni si Reguel, halak Midian, simatua doli ni si Musa: Na tole ma hami borhat tu inganan naung pinorbagabaga ni Jahowa hian: Ahu mangalehonsa tu hamu ninna; antong rap ma hita mardalan, marjambar na denggan pe ho bahenonnami, ai nunga diparbaga Jahowa na denggan tu Israel. [89†]

³⁰Alai ninna ibana ma mangalusi: Ndang olo ahu mardalan rap dohot hamu, naeng mulak ma ahu tu luathu dohot tu hahaanggingku.

³¹Alai ninna si Musa ma: Ua unang tadingkon hami, ai tangkas do diboto ho manang ingkon didia parsaroan na denggan di halongonan i, ingkon ho nian hira gabe matanami.

³²Molo tung mardalan ho rap dohot hami, jala ro na denggan i, na naeng bahenon ni Jahowa tu hami, ingkon bahenonnami huhut na denggan i tu ho.

³³Jadi borhat ma nasida sian dolok ni Jahowa tolu ari mardalan daona, jala poti parpadanan ni Jahowa mardalan di jolonasida, tolu ari mardalan daona, mangalului pangulonan di nasida. [90†]

³⁴Jala ombun ni Jahowa di atasnasida arian, molo borhat nasida sian parsaroan. [91†] IV.

³⁵Ia naeng borhat poti i, ninna si Musa ma martangiang: Hehe ma Ho, ale Jahowa, asa tung marserak angka musum jala maporus angka na mangkagigihon Ho maradophon Bohim. [92†]

³⁶Jala ia jumpa mangulon poti i, ninna ma martangiang: Sai mulak ma Ho, ale Jahowa tu halak Israel na marriburibu loksa toropna!