Read Batak Toba 4 MUSA 15 Bible Online

4 MUSA 15 - Batak Toba bible

4 MUSA 15

¹I. [1] Dung i ro muse hata ni Jahowa tu si Musa songon on:

²Patolhas ma tu halak Israel hatangkon: Ia dung sahat hamu tu tano siingananmuna i, na naeng basabasahononku tu hamu.

³Tung sura naeng hobasonmuna sada pelean api di Jahowa: Pelean situtungon manang pelean sipotongon, asa marbagabaga hasurungan, manang pelean sian lomo ni roha, manang di ari rayamuna laho mambahen tu Jahowa sada uap na hushus sian lombu manang sian birubiru. [135†]

⁴Manang ise na naeng mamelehon peleanna tu Jahowa, ingkon boanonna do saparpuluan itak na lamot na nidogil dohot saparopat Hin miak bahen pelean sipanganon. [136†]

⁵Ingkon boanonmu huhut anggur bahen pelean siinumon saparopat Hin dongan ni pelean situtungon manang pelean sipotongon, dongan ni ganup anak ni birubiru tahe. [137†]

⁶Alai anggo dongan ni sada birubiru tunggal, ingkon hobasonmu do dua parpuluan itak na lamot na nidogil dohot miak sapartolu Hin bahen pelean sipanganon.

⁷Ingkon boanonmu huhut anggur bahen pelean siinumon sapartolu Hin, ingkon pelehononmu do i tu Jahowa bahen uap na hushus.

⁸Tung sura naeng pelehononmu sada anak ni lombu bahen pelean situtungon manang pelean sipotongon, marbagabaga hasurungan manang bahen pelean hamauliateon tu Jahowa.

⁹Ingkon boanonmu huhut dongan ni anak ni lombu i tolu parpuluan itak na lamot na nidogil dohot miak satonga Hin bahen pelean sipanganon.

¹⁰Ingkon boanonmu huhut anggur bahen pelean siinumon satonga Hin, i ma sada pelean api bahen uap na hushus di Jahowa.

¹¹Ingkon songon i bahenon ni halak di ganup lombu manang di ganup birubiru tunggal manang di ganup birubiru boruboru manang di hambing pe.

¹²Marguru tu bilangan ni pelean na pinelehonmuna i, ingkon songon i bahenonmuna di ganup pelean mangihuthon bilanganna.

¹³Nasa halak isi ni tano i hian, ingkon songon i bahenonna laho mamelehon sada pelean api bahen uap na hushus di Jahowa.

¹⁴Jala tung sura maisolat sahalak dagang di lambungmuna manang tung maringan ibana di tongatongamuna marsundutsundut, gabe naeng hobasonna sada pelean api bahen uap na hushus di Jahowa, suang songon na binahenmuna i, ingkon songon i bahenonna.

¹⁵Ingkon sisada aturan do sandok luhutan i, di hamu dohot di halak na maisolat; aturan na hot salelenglelengna do i di pinomparmuna marsundutsundut, suang songon hamu, ingkon songon i nang halak dagang di adopan ni Jahowa. [138†]

¹⁶Ingkon sisada patik jala sisada uhum di hamu dohot di halak dagang na maisolat di tongatongamuna i. II.

¹⁷Dung i ro muse hata ni Jahowa tu si Musa songon on:

¹⁸Patolhas ma tu halak Israel hatangkon: Ia dung sahat hamu tu tano, hasahatanmuna muse Ahu manogihon tusi.

¹⁹Jala tole hamu manganhon sian sagusagu gogo ni tano i, ingkon pelehononmuna sada pelean tatingan tu Jahowa. [139†]

²⁰Bahen patumonaan ni itak na niudi, ingkon pelehononmuna do sada sagusagu bahen pelean tatingan; suang songon pelean tatingan sian pardegean, ingkon songon i do i tatingonmuna. [140†]

²¹Ingkon lehononmuna do tu Jahowa sian patumonaan ni itakmuna na niudi bahen pelean tatingan di pinomparmuna marsundutsundut.

²²Jala tung sura lilu hamu gabe ndang diulahon hamu luhut tona on, angka na pinaboa ni Jahowa tu si Musa. [141†]

²³Tung luhut do naung tinonahon ni Jahowa tu hamu marhite sian si Musa, olat ni ari dung dipungka Jahowa martona dohot tu joloan on di pinomparmuna marsundutsundut.

²⁴Tung sura buni maradophon mata ni luhutan i masa sada haliluan, ingkon hobason ni sandok luhutan i sada anak ni lombu bahen pelean situtungon, gabe uap na hushus di Jahowa, rap dohot peleanna sipanganon dohot peleanna siinumon hombar tu aturan i; tole muse sada hambing tunggal bahen pelean pardosaan.

²⁵Ingkon songon i pardengganan bahenon ni malim tu sandok luhutan ni halak Israel, asa salese dosanasida i, ai sada haliluon do i; ingkon nasida tahe mamboan peleannasida bahen pelean api tu Jahowa huhut bahen peleannasida pardosaan di adopan ni Jahowa, ala haliluonnasida i.

²⁶Jadi salese ma dosa ni sandok luhutan ni halak Israel, nang dosa ni halak dagang na maisolat di tongatongamuna, ai haliluan di sandok bangso i do i.

²⁷Jala tung sura sahalak mambahen dosa ala liluna, ingkon boanonna do sada hambing boruboru na marumur sataon bahen pelean pardosaan. [142†]

²⁸Ingkon malim i mambahen pardengganan di halak na lilu, molo mardosa ibana sian liluna di adopan ni Jahowa, ingkon bahenonna do pardenggananna, asa salese dosana i.

²⁹Ingkon sisada patik do di hamu, nang di halak Israel isi ni tano i hian, nang di halak dagang na maisolat di tongatongamuna, molo marsala ibana sian liluna.

³⁰Jala tung sura sahalak mambahen dosa sian jungkatna, nang halak isi ni tano i hian ibana, nang halak dagang. Jahowa do na niinsahanna disi, dibahen i ingkon siaphononhon halak sisongon i sian tongatonga ni bangsona. [143†]

³¹Ala naung marlea binahenna hata ni Jahowa jala na niosena tonana, ingkon siaphononhon jolma sisongon i, ingkon manginona tu ibana do hajahatonna i! III.

³²Jadi uju di halongonan halak Israel i, jumpang nasida ma sada baoa na marsobansoban, tongon di ari Sabbat. [144†]

³³Jadi halak na marnida ibana marsobansoban mamboan ibana tu si Musa dohot tu si Aron dohot tu sandok luhutan i.

³⁴Dung i dihurungkon nasida ma ibana tu bagasan hurungan, ai ndang dope andar diboto nasida uhum sidabuon tu ibana. [145†]

³⁵Dung i ro ma hata ni Jahowa tu si Musa: Ingkon marutang hosa do baoa i; ingkon sandok luhutan i mandangguri ibana dohot batu di balian ni parsaroan.

³⁶Jadi sandok luhutan i manogihon ibana ruar tu balian ni parsaroan, laos didangguri nasida ibana mate dohot batu, songon na tinonahon ni Jahowa hian tu si Musa. IV.

³⁷Dung i ro muse hata ni Jahowa tu si Musa songon on:

³⁸Pasahat ma tu halak Israel hatangkon: Ingkon bahenonnasida di nasida angka rambu di ujung ni sampesampenasida marsundutsundut, jala ingkon bahenonnasida tu rambu i sada tali bonang na rata langit. [146†]

³⁹Jala on do lapatan ni rambu i, asa paberengberengonmuna do i huhut pasingothon tu hamu saluhut tona ni Jahowa, asa diulahon hamu angka i, asa unang dipaihut hamu elaela ni rohamuna manang matamuna, pola tung marmainan hamu marhite sian i.

⁴⁰Asa tung diingot jala diulahon hamu saluhut tonangku, gabe angka na badia hamu di Debatamuna i.

⁴¹Ahu do Jahowa, Debatamuna i, na manogihon hamu ruar sian tano Misir, asa Ahu gabe Debatamuna; Ahu ma tutu Jahowa, Debatamuna i.