Read Batak Toba 4 MUSA 17 Bible Online

4 MUSA 17 - Batak Toba bible

4 MUSA 17

¹I. [1] Dung i ro muse hata ni Jahowa tu si Musa songon on:

²Dokkon ma si Eleasar, anak ni malim Aron, asa dipapungupungu angka pardaupaan i sian holangholang ni turanggong i, jala ditirihon api i, ai na badia do angka ulaula i.

³Ia angka pardaupaan ni halak na mardosa on, pola manginona tu hosanasida i, ingkon topaon ni halak do i gabe pamaluti lampishononhon tu langgatan; ai nunga pola angka i diboan tu adopan ni Jahowa, dibahen i nunga gabe badia, ingkon gabe tanda huhut di halak Israel.

⁴Jadi dibuat malim Eleasar ma angka pardaupaan tombaga, angka naung binoan ni halak naung pinangan ni api, laos ditopa ma i bahen pamaluti ni langgatan.

⁵Bahen parningotan di halak Israel, asa unang be hum jolma sileban, na so sian pinompar ni si Aron jumonok naeng manutung daupa di adopan ni Jahowa, jala asa unang marjea ibana songon si Kora dohot donganna saparbulanan, songon naung nilumbahon ni Jahowa hian tu ibana marhite sian si Musa. [159†] II.

⁶Tole marsogotna i marmungutmungut muse ma sandok luhutan ni halak Israel dompak si Musa dohot si Aron ninna ma: Hamu do naung mambunu bangso ni Jahowa.

⁷Jadi dung marluhut huria i tu lambung ni si Musa dohot si Aron humusor ma nasida dompak undungundung parluhutan i, jadi ida ma, nunga dihungkupi ombun i undungundung i, jala tarida hamuliaon ni Jahowa. [160†]

⁸Jadi ro ma si Musa dohot si Aron tu adopan ni undungundung parluhutan i.

⁹Jadi ro ma hata ni Jahowa tu si Musa songon on:

¹⁰Lumindak ma hamu sian tongatonga ni huriaon, asa suda nasida hurendephon di bagasan satongkin! Jadi manungkap ma nasida na dua tu tano. [161†]

¹¹Dung i didok si Musa ma tu si Aron: Buat ma pardaupaan i jala bahen tu bagasan ni i api sian atas langgatan, jala ampehon tusi daupa, haru silu ma ho laho mandapothon huria i mambahen pardenggananna, ai nunga pola ruar rimas na marpiarpiar sian adopan ni Jahowa, nunga pola mamungka rahat begu masa i. [162†]

¹²Dung i dibuat si Aron ma pardaupaan i, songon na nidokkon ni si Musa i, laos marlojong ma ibana tu tongatonga ni huria i, hape ida ma, nunga pola mamungka rahat begu masa i di tongatonga ni bangso i, gabe ditutung ma daupa i, asa mambahen pardengganan tu bangso i.

¹³Jadi jongjong ma ibana di holangholang ni halak naung mate dohot na mangolu, gabe mansohot ma begu masa i.

¹⁴Alai anggo halak naung mate binahen ni begu masa i sampulu opat ribu pitu ratus halak toropna, so padohot angka na mate paihuthon tahi ni si Kora.

¹⁵Dung i mulak ma si Aron tu si Musa tu pintu ni undungundung parluhutan i, laos mansohot ma anggo begu masa i. III.

¹⁶Dung i ro muse ma hata ni Jahowa tu si Musa songon on:

¹⁷Patolhas ma hatangkon tu halak Israel jala buat sian nasida sada tungkot sian ganup marga, sian angka induknasida marompuompu, gabe sampulu dua tungkot, jala ingkon surathononmu goar ni ganup tu tungkotna be.

¹⁸Alai anggo goar ni si Aron ingkon surathononmu tu tungkot ni si Lepi, ai di ganup induk marompuompu sada be tungkot i.

¹⁹Ingkon peakkononmu do angka i tu bagasan undungundung parluhutan i di adopan ni poti panindangion i, tusi Ahu somal manopot hamu. [163†]

²⁰Jadi manang ise jolma na hupilliti, tungkotna i ma marbunga, asa tung hupasohot parungutunguton ni halak Israel ala Ahu, na marmungutmungut i nasida dompak hamu. [164†]

²¹Jadi dipatolhas si Musa ma hata i tu halak Israel, gabe sude induknasida i mangalehon tungkotna be tu ibana ganup induk marompuompu sada be tungkot i, gabe sampulu dua tungkot, tungkot ni si Aron di tongatonga ni tungkotnasida i.

²²Dung i dipeakkon si Musa ma angka tungkot i di adopan ni Jahowa di bagasan undungundung panindangion i.

²³Tole manogotna i, di na masuk si Musa tu bagasan undungundung panindangion i, ida ma, nunga marbunga tungkot ni si Aron na di marga Lepi, nunga tutu martumbur jala marbunga na mangerbang jala marparbue na matoras.

²⁴Dung i diboan si Musa ma sude tungkot i ruar sian adopan ni Jahowa tu adopan ni sude halak Israel, asa diida nasida, laos dibuat nasida ma ganup tungkotna be.

²⁵Dung i ro ma hata ni Jahowa tu si Musa: Boan ma mulak anggo tungkot ni si Aron tu adopan ni poti panindangion i, asa dipajop disi bahen tanda di angka anak na somal manggunturi, asa tung marhaujungan ungutungutnasida i ala Ahu, asa unang mate nasida. [165†]

²⁶Dung i dibahen si Musa ma songon i, songon na tinonahon ni Jahowa tu ibana, songon i ma dibahen.

²⁷Dung i ro ma hata ni halak Israel tu si Musa songon on: Ida ma, na marragean ma hami, na mago ma hami, tung saluhut do hami mago!

²⁸Manang ise na hum jumonok tu undungundung ni Jahowa mate do i, tung ingkon luhut do hami rendep tagonan? [166†]