Read Batak Toba 4 MUSA 21 Bible Online

4 MUSA 21 - Batak Toba bible

4 MUSA 21

¹I. [1] Jadi dung dibege si Arad, raja ni halak Kanaan na maringan di tano tungkan dangsina, naung ro halak Israel sian dalan laho tu Atarim, gabe diporang ibana ma halak Israel, pola diboan deba sian nasida dapot tartangkup.

²Dung i marbagabaga ma halak Israel tu Jahowa, ninna ma: Molo tung pasahatonmu bangso on tu bagasan tanganku, ingkon haromhononku ma angka hutanasida i. [196†]

³Jadi ditangihon Jahowa ma soara pangidoan ni Israel, dipasahat ma halak Kanaan tu nasida, gabe diharomhon Israel ma nasida ro di hutanasida i, jala dibahen ma goar ni inganan i Horma. [197†] II.

⁴Jadi borhat ma nasida sian dolok Hor manulus dalan dompak laut arung, asa mangaliat pasiding luat ni halak Edom gabe murhing ma roha ni bangso i di tongan dalan. [198†]

⁵Dung i marmungutmungut ma bangso i dompak Debata dohot dompak si Musa: Boasa tung togihononmuna hami nangkok sian Misir, asa mate hami di halongonan on huroha? Ai so manang adong sagusagu manang aek dison, jala nunga ginegine ateatenami mida sagusagu na giakgiak on.

⁶Dung i ditongos Jahowa ma tu tongatonga ni bangso i angka ulok tulung api, angka na mamarguti bangso i, gabe marmatean mansai torop sian Israel. [199†]

⁷Dung i ro be ma bangso i manopot si Musa, angka ninna ma: Nunga mardosa hami, ala na marmungutmungut hami dompak Jahowa dohot dompak ho; martangiang ma ho tu Jahowa, asa dipadao sian hami ulok tulung api i. Jadi martangiang ma si Musa mangondihon bangso i.

⁸Dung i ro ma hata ni Jahowa: Bahen ma di ho sada ulok tulung api jala sangkothon ma i tu hau partonggol, ia adong manang ise na hona pargut jala dibereng tusi, ingkon mangolu ibana. [200†]

⁹Jadi disuman si Musa ma sada ulok sian tombaga, jala disangkothon ma i tu hau partonggol; jala ia adong manang ise na pinargut ni ulok i jala dibereng dompak ulok tombaga i, laos mangolu ma ibana. III.

¹⁰Dung i borhat ma halak Israel sian i jala marsaro di Obet.

¹¹Dung i borhat muse nasida sian Obet jala marsaro di bona ni dolok Abarim di halongonan, tondong ni Moab, tungkan habinsaran.

¹²Borhat muse nasida sian i jala marsaro martopihon sunge Zered.

¹³Borhat muse nasida sian i jala marsaro di bariba i sunge Arnon na mardalan di halongonan, na marharoroan sian partalpahan ni halak Amori; ai Arnon i do parbolatan ni Moab, di holangholang ni Moab dohot Amori.

¹⁴Ala ni do umbahen tarsurat di bagasan buku parporangan ni Jahowa: Mardonokkon Waheb di Supa dohot mardonokkon angka sunge ni Arnon. [201†]

¹⁵Tole muse hapuasan ni angka sunge, angka na mabaor tungkan inganan Ar, jala mandiori di partalpahan ni Moab.

¹⁶Borhat muse nasida sian i tu Beer (sumur); i ma sumur i, na nidok ni Jahowa tu Musa: Papungu ma bangso i, asa Ahu mangalehon aek inumon tu nasida.

¹⁷Uju i ma diendehon halak Israel hata ni ende on: “Binsat ma ho, ale sumur, marende taripar ma hamu!

¹⁸I ma sumur na hinali ni angka induk, na saut nidungkir ni halak na sangap sian bangso i marhite sian tungkot harajaon, marhite sian angka tungkotnasida i tahe.” Dung i borhat muse nasida sian halongonan tu Matana.

¹⁹Jala sian Matana tu Nahaliel, jala sian Nahaliel tu Bamot.

²⁰Jala sian Bamot tu rura na di ladang ni Moab na patondong dohot punsu ni Pisga, panatapan tungkan halongonan. IV.

²¹Dung i disuru Israel ma angka suruanna manopot si Sihon, raja ni halak Amori, mandok tu ibana: [202†]

²²Ua loas ma hami mamolus sian luatmu! Unang pe hami manimbil tu ladang manang tu porlak anggur; jala ndang olo hami minum aek sian sumur; dalan na bolon i do tulusonnami, paima salpu hubolus hami luatmu. [203†]

²³Alai ndang diloas si Sihon halak Israel i mamolus sian luatna, pola dipaluhut si Sihon sandok bangsona jala ruar mandopang Israel tu halongonan; jadi dung sahat ibana tu Jahas, tole ma ibana marporang dompak Israel.

²⁴Alai ditaluhon Israel do ibana marhite sian baba ni podang, laos disoluk ma luatna olat ni Arnon sahat tu Jabok, sahat tu halak Amon; ai tung na gonting do partalpahan ni halak Amon.

²⁵Dung i dipapatu Israel ma sude angka huta i, laos maringan Israel di saluhut huta ni halak Amori, di Hesbon, dohot di sude sosorna humaliang.

²⁶Ai Hesbon do huta ni si Sihon, raja ni halak Amori, ai nunga jolo diporang ibana raja ni halak Moab, jala dilaum sian ibana sandok tanona sahat ro di Arnon.

²⁷Ala ni do umbahen didok angka parende aling: Beta hita tu Hesbon, asa hona pauli jala pinagonting huta ni si Sihon.

²⁸Ai ruar do api sian Hesbon, nala ni api sian huta ni si Sihon, i ma na mansudahon Ar di Moab, ro di angka tuan nampuna dolokdolok ni Arnon.

²⁹Marjea ma ho, ale Moab! Nunga mago ho, ale bangso na marsomba tu Kamos! Tung dipasahat ibana do anakna angka naung malua nian jala tarboan do angka boruna tu si Sihon, raja ni halak Amori. [204†]

³⁰Jala nunga hupatunduk hami nasida, nunga mago Hesbon sahat ro di Dibon; jala nunga hutaban hami nasida sahat ro di Nopal, pola ro di Medeba.

³¹Jadi maringan ma Israel di tano ni halak Amori.

³²Dung i disuru si Musa ma halak laho mangkahapi Jaser, laos dipapatu nasida ma angka sosorna, jala dipabali halak Amori, angka na maringan disi.

³³Dung i mamedu ma nasida jala nangkok manulus dalan tu Basan; jadi ruar ma si Og, raja di Basan, manjumpangkon nasida manguluhon sandok bangsona laho marporang di Edrei. [205†]

³⁴Dung i ro ma hata ni Jahowa tu si Musa: Unang ho mabiar mida ibana, ai nunga Ahu pasahathon ibana tu bagasan tanganmu ro di bangsona dohot luatna, ingkon bahenonmu tu ibana, suang songon na binahenmi tu si Sihon, raja ni halak Amori na maringan na jolo di Hesbon. [206†]

³⁵Jadi dipapatu nasida ma ibana ro di angka anakna dohot sandok bangsona, nanggo sahalak tahe ndang tading di ibana, laos disoluk nasida ma tanona i.