Read Batak Toba 4 MUSA 29 Bible Online

4 MUSA 29 - Batak Toba bible

4 MUSA 29

¹I. [1] Di artia di bulan sipaha pitu ingkon pansangon di hamu sada luhutan na badia, ndang jadi ulahononmuna disi agia aha ulaon ariari, ai ari raya parsaruneon do i di hamu. [276†]

²Ingkon pelehononmuna disi sada anak ni lombu, sada birubiru tunggal, pitu anak ni birubiru na marumur sataon, angka na so martihas bahen pelean situtungon, uap na hushus di Jahowa.

³Rap dohot itak na lamot na nidogil dohot miak bahen pelean sipanganon: Tolu parpuluan dongan ni anak ni lombu i, dua parpuluan dongan ni birubiru tunggal i.

⁴Jala saparpuluan dongan ni ganup birubiru na pitu i.

⁵Angkup ni muse hambing tunggal sada bahen pelean pardosaon, mambahen pardengganan di hamu.

⁶Di balik ni pelean situtungon di poltak ni bulan rap dohot peleanna sipanganon ro di pelean situtungon na tongtong i rap dohot peleanna sipanganon ro di peleanna siinumon tahe hombar tu uhumna hian, bahen uap na hushus, pelean api tu Jahowa. II.

⁷Tole di ari sampulu di bulan sipaha pitu i, ingkon pansangon di hamu sada luhutan na badia, ingkon paunduhonmuna rohamuna disi, nanggo sada ulaon, ndang jadi ulahononmuna disi. [277†]

⁸Ingkon pelehononmuna disi sada anak ni lombu, sada birubiru tunggal, pitu anak ni birubiru na marumur sataon, angka na so martihas bahen pelean situtungon, uap na hushus di Jahowa.

⁹Rap dohot itak na lamot na nidogil dohot miak bahen pelean sipanganon: Tolu parpuluan dongan ni lombu i, dua parpuluan dongan ni birubiru tunggal i.

¹⁰Jala saparpuluan dongan ni ganup anak ni birubiru na pitu i.

¹¹Tole muse sada hambing tunggal bahen pelean pardosaon, di balik ni pelean pardosaon bahen pardengganan ro di pelean situtungon na tongtong i rap dohot peleanna sipanganon dohot peleanna siinumon. [278†] III.

¹²Tole muse di ari sampulu lima bulan sipaha pitu i ingkon pansangonmuna di hamu sada luhutan na badia, nanggo sada ulaon ariari ndang jadi ulahononmuna disi, ingkon marari raya di Jahowa hamu pitu ari lelengna. [279†]

¹³Ingkon pelehononmuna disi sampulu tolu anak ni lombu, dua birubiru tunggal, sampulu opat anak ni birubiru na marumur sataon, angka na so jadi martihas bahen pelean situtungon, sada pelean api, uap na hushus di Jahowa.

¹⁴Rap dohot itak na lamot na nidogil dohot miak bahen pelean sipanganon: Tolu parpuluan di ganup anak ni lombu na sampulu tolu i, dua parpuluan di ganup birubiru tunggal na dua i.

¹⁵Jala saparpuluan di ganup anak ni birubiru na sampulu opat i.

¹⁶Tole muse sada hambing tunggal bahen pelean pardosaon, di balik ni pelean situtungon na tongtong i rap dohot peleanna sipanganon dohot peleanna siinumon.

¹⁷Tole muse di ari paduahon i sampulu dua anak ni lombu, dua birubiru tunggal, sampulu opat anak ni birubiru na marumur sataon, angka na so martihas.

¹⁸Rap dohot peleanna sipanganon dohot peleanna siinumon, dongan ni angka anak ni lombu, angka birubiru tunggal dohot angka anak ni birubiru marguru tu bilanganna be, hombar tu uhumna hian.

¹⁹Tole sada hambing tunggal bahen pelean pardosaon, di balik ni pelean situtungon na tongtong i rap dohot peleanna sipanganon dohot peleanna siinumon.

²⁰Tole muse di ari patoluhon sampulu sada anak ni lombu, dua birubiru tunggal, sampulu opat anak ni birubiru, angka na so martihas.

²¹Rap dohot peleanna sipanganon dohot peleanna siinumon, dongan ni angka lombu, angka hambing tunggal dohot angka anak ni birubiru, marguru tu bilanganna be, hombar tu uhumna hian.

²²Angkup ni muse sada hambing tunggal bahen pelean pardosaon, di balik ni pelean situtungon na tongtong i rap dohot peleanna sipanganon dohot siinumon.

²³Tole muse di ari paopathon sampulu anak ni lombu, dua birubiru tunggal, sampulu opat anak ni birubiru na marumur sataon, angka na so martihas.

²⁴Rap dohot peleanna sipanganon dohot peleanna siinumon, dongan ni angka lombu, angka birubiru tunggal dohot angka anak ni birubiru marguru tu bilanganna be, hombar tu uhumna hian.

²⁵Angkup ni sada hambing tunggal bahen pelean pardosaon, di balik ni pelean situtungon na tongtong i rap dohot peleanna sipanganon dohot peleanna siinumon.

²⁶Tole muse di ari palimahon sia anak ni lombu, dua birubiru tunggal, sampulu opat anak ni birubiru, angka na so martihas.

²⁷Rap dohot peleanna sipanganon dohot peleanna siinumon, dongan ni angka anak ni lombu, angka birubiru tunggal dohot angka anak ni birubiru marguru tu bilanganna be, hombar tu uhumna hian.

²⁸Angkup ni sada hambing tunggal bahen pelean pardosaon, di balik ni pelean situtungon na tongtong i rap dohot peleanna sipanganon dohot peleanna siinumon.

²⁹Tole muse di ari paonomhon ualu anak ni lombu, dua birubiru tunggal, sampulu opat anak ni birubiru na marumur sataon, angka na so martihas.

³⁰Rap dohot peleanna sipanganon dohot peleanna siinumon dongan ni angka anak ni lombu, angka birubiru tunggal dohot angka anak ni birubiru, marguru tu bilanganna be, hombar tu uhumna hian.

³¹Angkup ni sada hambing tunggal bahen pelean pardosaon di balik ni pelean situtungon na tongtong i rap dohot peleanna sipanganon dohot peleanna siinumon.

³²Tole muse di ari papituhon pitu anak ni lombu, dua birubiru tunggal, sampulu opat anak ni birubiru na marumur sataon, angka na so martihas.

³³Rap dohot peleanna sipanganon dohot peleanna siinumon, dongan ni angka anak ni lombu i, angka birubiru tunggal dohot angka anak ni birubiru, marguru tu bilanganna be, hombar tu uhumna hian.

³⁴Angkup ni sada hambing tunggal bahen pelean pardosaon, di balik ni pelean situtungon na tongtong i rap dohot peleanna sipanganon dohot peleanna siinumon.

³⁵Tole muse di ari paualuhon, ingkon disi ma mata ni ari raya i, nanggo sada ulaon ariari, ndang jadi ulahononmuna disi.

³⁶Alai ingkon pelehononmuna disi sada anak ni lombu, sada birubiru tunggal, pitu anak ni birubiru na marumur sataon, angka na so martihas bahen pelean situtungon, pelean api uap na hushus di Jahowa.

³⁷Rap dohot peleanna sipanganon dohot peleanna siinumon, dongan ni anak ni lombu i, dongan ni birubiru tunggal i dohot dongan ni angka anak ni birubiru, marguru tu bilanganna be, hombar tu uhumna hian.

³⁸Angkup ni sada hambing tunggal bahen pelean pardosaon, di balik ni pelean situtungon na tongtong i rap dohot peleanna sipanganon dohot peleanna siinumon.

³⁹I ma pelean angka sipelehononmuna tu Jahowa di angka ari rayamuna, di balik ni angka bagabagamuna dohot silehonlehonmuna sian lomo ni roha bahen angka pelean situtungon, angka pelean sipanganon, angka pelean siinumon dohot angka pelean hamauliateon di hamu.