Read Batak Toba 4 MUSA 34 Bible Online

4 MUSA 34 - Batak Toba bible

4 MUSA 34

¹I. [1] Dung i ro muse hata ni Jahowa tu si Musa songon on:

²Ingkon pasahatonmu ma hatangkon tu nasida: Molo dung masuk hamu tu tano Kanaan, on do tano i, na gabe partalianmuna, tano Kanaan i tahe ro di parbalohanna. [320†]

³Hamu do nampuna tano sambariba tungkan dangsina tutu olat ni halongonan Zin mardonokkon Edom, asa parbalohanmuna tungkan dangsina olat ni ujung ni laut sira tungkan habinsaran. [321†]

⁴Dung i mamedu ma parbalohan dangsina i sahat tu robean Akrabim jala taripar tu Zin jala nangkok tungkan dangsina ni Kades-Barnea, ruar sian i muse tu Hazar-Adar, jala taripar sian i muse tu Azmon.

⁵Mamedu muse parbalohanna sian Azmon tu sunge Misir, jala partalpahanna marbalokkon laut.

⁶Ia parbalohanna tungkan hasundutan (laut), ingkon laut na bolon i do parbalohanna di hamu; i ma parbalohan na tungkan hasundutan.

⁷Ia parbalohanna tungkan utara, ingkon mangoriori sian laut na bolon sahat ro di dolok Hor.

⁸Sian dolok Hor muse ingkon gistang sahat ro di Hamat, asa partalpahan ni tano i sahat tu Zedad.

⁹Ruar muse parbalohan i sian i sahat tu Sipron, asa partalpahanna sahat tu Hazor-Enan. I ma parbalohanmuna tungkan utara.

¹⁰Ia parbalohanmuna sambola tungkan habinsaran olat ni Hazor-Enan sahat ro di Sepam.

¹¹Tuat muse parbalohan i sian Sepam tu Ribla tungkan habinsaran sian Ain, tuat muse parbalohan i pola dolos tu pasir ni tano Kineret tungkan habinsaran. [322†]

¹²Dohot muse parbalohan i sahat tu Jordan, jala partalpahanna martopihon laut sira. I ma gabe tanomuna mangihuthon parbalohanna humaliang.

¹³Dung i ro ma hata ni si Musa mandok tu halak Israel: I ma tano i sibagionmuna marhite sian rujiruji, na tinonahon ni Jahowa lehononna tu na sia marga dohot tu na satonga marga Manasse.

¹⁴Ai nunga maruli partalian be anggo marga ni halak Ruben marompuompu dohot marga ni halak Gad marompuompu ro di satonga marga Manasse. [323†]

¹⁵Na dua marga dohot na satonga marga, nunga maruli partalian di baribaon di Jordan, tondong ni Jeriko tungkan habinsaran. II.

¹⁶Dung i ro muse hata ni Jahowa tu si Musa songon on:

¹⁷On do goargoar ni baoa angka na marbagi tano i tu hamu: malim Eleasar, dohot si Josua, anak ni si Nun. [324†]

¹⁸Angkup ni ingkon buatonmuna do sada induk sian ganup marga laho marbagi tano i.

¹⁹Jala on do goargoar ni angka baoa i: si Kaleb, anak ni si Jepune sian marga Juda. [325†]

²⁰Si Semuel, anak ni si Amihud, sian marga Simeon.

²¹Si Elidad, anak ni si Kilson, sian marga Benjamin.

²²Si Bukki, anak ni si Jogal i, induk sian marga Dan.

²³Si Hanniel, anak ni si Epod, sian pinompar ni si Josep, induk sian marga Manasse.

²⁴Si Kemuel, anak ni si Siptan, induk sian marga Epraim.

²⁵Si Elizapan, anak ni si Parnak, induk sian marga Zebulon.

²⁶Si Paltiel, anak ni si Azan, induk sian marga Isasar.

²⁷Si Ahihud, anak ni si Selomi, induk sian marga Aser.

²⁸Si Pedahel, anak ni si Amihud, induk sian marga Naptali.

²⁹I ma baoa angka na tinonahon ni Jahowa, ingkon bagionna tano Kanaan i di halak Israel.