Read Batak Toba 4 MUSA 35 Bible Online

4 MUSA 35 - Batak Toba bible

4 MUSA 35

¹I. [1] Dung i ro muse hata ni Jahowa tu si Musa di adaran Moab, martopihon Jordan, tondong ni Jeriko, ninna ma:

²Dokkon ma halak Israel i, asa dilehon nasida angka huta sian partalian hapunjunganna be tu halak Lepi, bahen inganannasida. [326†]

³Lehonon huhut tu halak Lepi tano upa parik humaliang hutanasida i bahen panjampalan; asa angka huta i gabe inganan di nasida jala angka panjampalan i di dorbianasida dohot di pinahannasida marragamragam.

⁴Alai angka upa parik ni huta, angka silehononmuna tu halak Lepi, ingkon sian balian ni parik ni huta i suhatan saribu asta humaliang.

⁵Ingkon suhatanmuna sian balian ni parik i sambariba tungkan habinsaran dua ribu asta dohot sambariba tungkan dangsina dua ribu asta dohot sambariba tungkan hasundutan dua ribu asta dohot sambariba tungkan utara dua ribu asta, asa huta i di porsitongaanna; ingkon i ma upa parik ni angka huta i.

⁶Alai angkup ni huta angka silehononmuna tu halak Lepi, i ma na onom huta haporusan, angka silehononmuna, asa maporus tusi halak sibunu jolma, lehononmuna dope tu nasida opatpulu dua huta. [327†]

⁷Jadi torop ni sude huta angka silehononmuna tu halak Lepi opatpulu ualu huta rap dohot upa parikna.

⁸Ingkon sian partalian ni halak Israel do lehononmuna angka huta i, gumodang do sian halak na gumodang partalianna, jala ummotik sian halak na otik partalianna; ganup marguru tu partalianna na sinagihon tu ibana, lehononna sian angka hutana tu halak Lepi. [328†] II.

⁹Dung i ro muse hata ni Jahowa tu si Musa songon on:

¹⁰Patolhas ma hatangkon tu halak Israel: Ia dung ditaripari hamu Jordan masuk tu tano Kanaan.

¹¹Ingkon papulihonmuna di hamu angka huta na tau bahen huta haporusan di hamu, asa tarbahen maporus tusi halak sibunu jolma, so pangkirimanna.

¹²Asa angka huta i bahen haporusan di hamu maradophon jolma parlulu, asa unang mate halak sibunu jolma i so jolo sanga jongjong ibana di adopan ni luhutan paruhuman.

¹³Jala sian huta angka na pinatongonmuna, ingkon onom gabe huta haporusan di hamu.

¹⁴Ingkon tolu huta patongononmuna di baribaon ni Jordan, jala tolu huta patongononmuna di tano Kanaan: Ingkon gabe huta haporusan do i.

¹⁵Na onom huta i ingkon gabe haporusan nang di halak Israel, nang di halak dagang, nang di halak paisolat di tongatongamuna, asa tarbahen maporus tusi manang ise na mambunu jolma so pangkirimanna. III.

¹⁶Tung sura manang ise mambunu jolma marhite sian ulaula bosi, pola mate, sibunu jolma ma ibana tutu, ingkon marutang hosa do halak pamunui.

¹⁷Manang tung sura mate jolma i dibunu marhite sian batu na di tanganna tau pamunu hian, sibunu jolma ma ibana tutu, ingkon marutang hosa halak pamunui.

¹⁸Manang tung sura mate jolma i dibunu marhite sian panggado hau na di bagasan tanganna, tau pamunu hian, sibunu jolma ma ibana tutu, ingkon marutang hosa halak pamunui.

¹⁹Ingkon jolma parlulu hian mambunu halak pamunui, manang didia pe ibana dapotsa, jadi ma bunuonna ibana.

²⁰Manang tung sura ditenju jolma i sian hosom ni rohana, manang dituntun maninggangkon manang aha tu ibana pola mate.

²¹Manang tung sura dipastap ibana ala naung musuna hian pola mate, ingkon marutang hosa jolma pamastapi, ai sibunu jolma do ibana; ingkon jolma parlulu hian mambunu halak pamunui, manang didia ibana dapotsa.

²²Alai tung sura ndada sian sangkapna hian jala ndada ala musuna hian umbahen ditenju ibana manang ditinggangkon tu ibana manang aha, ndada sian tuntunna hian.

²³Manang tung sura ditinggangkon batu tu ibana, tau pamunu hian, so botobotoanna, pola mate jolma i, alai ndada musuna hian, jala ndada disangkap hian hamagoanna.

²⁴Ingkon luhutan i manguhum jolma pamunui dohot jolma parlulu i, hombar tu angka uhumon.

²⁵Ingkon luhutan i paluahon jolma pamunui sian tangan ni jolma parlulu i, ingkon luhutan i manogihon ibana mulak tu huta haporusanna hian; ingkon disi do ibana maringan, paima mate sintua ni malim, naung miniahan marhite sian miak na badia. [329†]

²⁶Alai tung sura ruar jolma pamunui salpu sian parbalohan ni huta haporusanna hian.

²⁷Laos dapot jolma parlulu i ibana di ruar ni parbalohan ni huta haporusanna i, gabe dibunu parlulu i ma halak pamunui, ndang marutang mudar ibana.

²⁸Ai ingkon tinggal hian ibana di bagasan huta haporusanna i, paima mate sintua ni malim, alai dung mate sintua ni malim, jadi ma jolma pamunui mulak tu huta partalianna hian.

²⁹Luhutna i ingkon gabe patik ni uhum di hamu marsundutsundut di saluhut huta ingananmuna i.

³⁰Manang ise na mambunu jolma, ingkon bunuon ma pamunui, dung binege hata ni angka sitindangi; alai anggo holan sada do sitindangi ndang masuk maralus dompak jolma i pola marutang hosa uhumon. [330†]

³¹Jala ndang jadi jaloonmuna hepeng partobus ni hosa ni halak sibunu jolma, na marutang hosa hian, ingkon saut do ibana bunuon.

³²Jala ndang jadi jaloonmuna hepeng partobus sian jolma naung maporus tu huta haporusanna, mangaloas ibana mulak maringan di tanona hian, jumolo sian na mate sintua ni malim i.

³³Unang tung ramuni hamu tano na niingananmuna i, ai mudar i do paramunhon tano i, jala ndang dapot padengganon tano i, ala ni mudar naung nidurushon disi, nda holan marhite sian mudar ni jolma na mandurushon. [331†]

³⁴Dibahen i unang ramuni hamu tano na niingananmuna i, pola dohot Ahu maringan di tongatongana; ai Ahu do Jahowa na maringan di tongatonga ni halak Israel. [332†]