Read Batak Toba PANURIRANG MIKA 1 Bible Online

PANURIRANG MIKA 1 - Batak Toba bible

PANURIRANG MIKA 1

¹On ma hata ni Jahowa na ro tu * si Mika sian Maressa, uju + di angka ari ni si Jotam, Ahas dohot Hiskia, angka raja sian Juda; hata angka na niidana taringot tu Samaria dohot Jerusalem. [1†] I.

²Tangihon ma, hamu ale angka bangso saluhutna! Patinggil ma pinggolmu, ale tano on ro di pangisina i! Asa gabe sitindangi Tuhan Jahowa dompak hamu, Tuhan i sian joro habadiaonna. [2†]

³Ai ida ma, ruar do Jahowa sian ingananna, jala tuat ibana, jala mardalan di atas buntulbuntul ni tano on. [3†]

⁴Jadi malala ma angka dolok di toruna, jala mabola angka rura, songon pantis maradophon api, songon aek tangkuju na mabaor sian robean. [4†]

⁵Ala ni pangalaosion ni si Jakkob do saluhutna i, jala ala dosa ni pinompar ni Israel. Ise do parbonsiran ni pangalaosion ni si Jakkob? * Nda Samaria do i? Jala ise do mula ni angka buntulbuntul ni Juda? + Nda Jerusalem do i? [5†]

⁶Jadi bahenonku ma Samaria gabe tambak batu di ladang, gabe porlak panuanan anggur; jala baorhononku tu rura angka batuna, jala patedehonku angka ojahanna.

⁷Jala saluhut ganaganaannasida ropukkononhon sogot, jala * nasa upa parmainanna mosokkononhon do tu api, jala nasa ganaganaannasida agohononhon do; ai sian upa parmainan dipapungupungu jadi ingkon mulak do i muse gabe upa parmainan. [6†] II.

⁸Ala ni do ahu mangandungi jala tumatangis, mardalan ahu so marsipatu, jala marsaemara; marauang ahu songon antuasu, jala margudompong songon pidong unto. [7†]

⁹Ai targisik do bugangna, pola sahat ibana tu Juda, dolos ibana sahat tu bahal ni bangsongku, sahat tu Jerusalem.

¹⁰Unang baritahon hamu barita i di Gat, unang tangis hamu di Akko. Margulu sirabun ahu di Bet Leapara. [8†]

¹¹Borhat ma ho, ale isi ni Sapir marsaemara mardongan haurahon. Ndang ruar anggo isi ni Zenan, tarbege do andung sian Bethejel, ai buatonna do sian hamu hajongjonganna. [9†]

¹²Ai margondok ni roha do isi ni Marot ala mago na denggan i; ai nunga tuat sian Jahowa hamagoan sahat tu bahal ni Jerusalem. [10†]

¹³Pasang ma hoda tu hureta, ho ale isi ni Lakis; parbonsiran ni dosa do huta i tu boru Sion, ai di bagasan ho do jumpang angka pangalaosion ni Israel.

¹⁴Dibahen i tongosonmu ma surat partulahan taringot tu Maressa Gat, angka bagas sian Aksib, gabe gabus di angka raja ni Israel.

¹⁵Paroonku dope angkupni sada sipanean di ho, ale isi ni Maressa; sahat ro di Adullam hamuliaon ni Israel.

¹⁶Marnabung ma ho, asa palpal ho ala ni angka anak hasudunganmu; pabidang ma palpalmu, songon lali: Ai nunga tarboan nasida sian ho.