Read Batak Toba PANURIRANG NAHUM 1 Bible Online

PANURIRANG NAHUM 1 - Batak Toba bible

PANURIRANG NAHUM 1

¹On ma lumbalumba tu Ninive. Buku pangungkapon ni si Nahum, halak Elkos. I.

²Debata * parrimas jala parlulu do Jahowa, parlulu do tongon Jahowa, jala parrimas situtu, parlulu do Jahowa dompak angka alona, jala parsunisunian ibana dompak angka musuna. [1†]

³Lambat do Jahowa tarrimas alai na gogo situtu, * sai na luluhononna do: Jahowa mardongan habahaba dohot halisungsung parhiteanna, jala ombun do orbuk ni patna. [2†]

⁴Mangonai hata ibana tu laut gabe marsik, sude angka batang aek pe marsik dibahen; malos ia Basan dohot Karmel, malos dohot bunga ni Libanon.

⁵Angka dolok * humutur maradophon ibana, jala angka dolokdolok malala, jala tano i humuntal maradophon bohina ro di portibi on dohot pangisina sudena. [3†]

⁶Tung ise ma manahan jongjong maradophon piripirina? Tung ise ma tarbahen tindang mida parpiar ni rimasna? Marjimburjimbur do songon api murukna, jadi angka torban ma dolok batu maradophon ibana.

⁷* Pardenggan basa do Jahowa, tau partanobatoan di ari hagogotan, jala + ditanda do angka na marhaposan tu ibana. [4†]

⁸Alai marhitehite aek na sumar sun siap inganannasida dibahen ibana, jala haholomon mangalotongi angka musuna.

⁹Tung aha ma ditahi rohamuna mangalo Jahowa? Sun siap nasida dibahen ibana. Ndang pola dua hali hehe hagogotan.

¹⁰Ai hira angka na nirait ni suga, jala hira angka na mabuk di parmabuhannasida sudahononna nasida, songon durame tahe na pate hiang.

¹¹Sian ho do ruar jolma na martahi hajahaton mangalo Jahowa, jolma partahi na jat situtu. II.

¹²Songon on do hata ni Jahowa: Nang pe rimpas nasida, jala songon i torop, laos songon i do siap nasida sabion jala laho salpu boti. Ia dung hupajimput ho, ndang be ulahanku pajepol ho. [5†]

¹³On pe ponggolhononku ma nuaeng augana sian ho, jala rapuanku angka rantem.

¹⁴Alai nunga martona Jahowa taringot tu ho: Ndang be tarbarita goarmu; siaphononku do sian bagas ni debatam ganaganaan na niuhir dohot na tinuang; ahu do mambahen tanomanmu, ai maneangku do ho jumpang.