Read Batak Toba PANURIRANG NAHUM 3 Bible Online

PANURIRANG NAHUM 3 - Batak Toba bible

PANURIRANG NAHUM 3

¹I. [1] Marjea ma * huta sisopsop mudar, tung gok gabus do i dohot pandoboon, ndang mansadi adong nilaumna. [9†]

²Nunga pola tarbege parlisik ni batahi dohot parlopuk ni galapang dohot hoda na marinjak, dohot hureta na maringkatingkat.

³Tole jolma parsihundul marrongoman ro dohot podang na marjillamjillam dohot hujur na marsillam, dohot torop halak angka na mabugang dohot bangke margugungugun, tung na so habilangan do bangke angka na marragean, pola martinggangan nasida dibahen angka na matena sian nasida.

⁴Binahen ni hinadeak ni angka parmainanon ni parompuan * sibabijalang na geduk, parutiutian na pande, naung manggadis torop angka bangso marhite sian parmainanonna dohot angka marga binahen ni ujarujaranna. [10†]

⁵Ida ma, marlulu ma ahu dompak ho, ninna Jahowa Zebaot, * lingkuphononku ma sarungmi tu bohim, jala paidahononku ma parsaemaraonmu tu angka bangso dohot hailaonmu tu angka harajaon. [11†]

⁶Jala reongkononku ma tu ho biasbias, palea ho, jala bahenonku ho sitotonduron.

⁷Asa ganup na marnida ho maporus sian ho, jala dohononna do: Nunga tung siap Ninive, tung ise be mangandungi ibana? Sian dia na ma luluanku angka na mangapul ho? II.

⁸Tung dumenggan ma ho huroha sian * No-Ammon, na maringanan martopihon batang aek Nil, aek humaliang ibana, na martanobato laut, laut i tahe parikna? [12†]

⁹Tole Kus na gonting dohot Misir, na so habilangan, Put dohot Kub, angka na hinaram manolongi ho.

¹⁰Nasida pe nunga tarboan tu habuangan, posoposona pe dirosahi do di suhisuhi ni nasa alaman, jala * marruji do nasida taringot tu angka na marmulia, jala sude angka na raja ditali do dohot rante. [13†]

¹¹Ho pe, * ingkon mabuk sogot gabe monjap, ho pe luluanmu do partanobatoan maradophon musu. [14†]

¹²Saluhut angka partanobatoanmu tudoshon hau antajau do marparbue na gulokon, molo hinutur, gabe madekdek do angka i tu pamangan ni halak na manganhon.

¹³Ida ma, * boruboru do bangsom di tongatongami; ingkon talak do angka harbangan ni tanom dapoton ni musum, api manganhon ransangransangmi. [15†]

¹⁴Datdati ma tahui aek di ho tumagam tungkumtungkum, patang partanobatoanmu, luntahi ma gambo, jala dogili tano liat, patogu ma liang panutungan.

¹⁵Sai na suda do ho panganon ni api disi, siaphonon ni podang ho, gagatonna ho, songon panggagat ni * sihapor. Padeak ma ho songon tamponok, padeak ma ho songon sihapor. [16†] III.

¹⁶Tumorop hian angka partigatigam dibahen ho sian bintang, angka na di langit, marrongoman angka sihapor, laos habang muse.

¹⁷Songon sihapor do angka jujunganmi, jala songon gulomitgulomit angka indukmi, angka na marasar di dorpi uju di ari ngali: Binsar mata ni ari muse, gabe di purpurhon nasida, jala ndang tanda be ingananna manang didia.

¹⁸Nunga mondokondok angka parmahanmi, ale raja sian Assur; nunga modom be angka partogim. Nunga marserak bangsom di atas ni angka dolok, jala ndang adong na papunguhon.

¹⁹Ndang hadaonan hamamagom, nunga targisik bugangmi. Nasa na umbege baritam martopap be do martillahon ho, ai ise na so dibolus hajahatonmu tongtong? [17†]