Read Batak Toba PANURIRANG SEPANIA 2 Bible Online

PANURIRANG SEPANIA 2 - Batak Toba bible

PANURIRANG SEPANIA 2

¹I. [1] Tungki ma hamu jala mardangoldangol; ho ale bangso na so umboto na maila!

²Tagan so songgop dope uhumi, * songon hurangkam do laho salpu ari, tagan so songgop dope tu hamu parpiar ni rimas ni Jahowa, tagan so songgop dope tu hamu ari pangarimasan ni Jahowa. [14†]

³Lulu i ma Jahowa, sude hamu, ale angka na unduk roha di tano on, hamu angka na mangaradoti uhumna; lulu i hamu ma hatigoran, lulu i haserepon, anggiat tung diondingi hamu di ari pangarimasan ni Jahowa. [15†] II.

⁴Ai ingkon tarulang do Gasa sogot, jala Askelon gabe halongonan; ingkon tarlele di hos ni ari ianggo Asdod, jala ingkon pabalihonna ia Ekron. [16†]

⁵Marjea ma hamu angka isi ni luat martopihon laut, bangso ni halak * Heret i! Manginona ma hata ni Jahowa tu ho, ale Kanaan, + tano ni halak Palistim, jala agoonku ma ho, asa unang be marpangisi nanggo sada. [17†]

⁶Jala gabe jampalan do luat martopihon laut, jala panjampalan ni angka birubiru.

⁷Jadi pasipasi ni bangso Juda nampuna luat i, nasida marmahan disi, di bagasan angka jabu sian Askelon nasida mangulon bodarina i; ai marpangulahi roha ni Jahowa, Debatanasida mida nasida, jala * mulak boanonna sogot angka na tarbuang sian nasida. [18†]

⁸Nunga hubege panginsahion ni * Moab dohot reherehe ni + halak Amon, angka na mangarehei bangsongki, jala manenganenga nasida taringot tu parbalohannasida i. [19†]

⁹Dibahen i songon sintongna mangolu ahu, ninna Jahowa Zebaot, Debata ni Israel: Ingkon tudoshon * Sodom do Moab sogot, jala tudoshon Gumora angka anak ni Amon, hatubuan ni latong, jala panombangan sira, jala halongonan ro di salelenglelengna. Ingkon pasipasi ni bangsongki martaban nasida sogot, jala ebaeba ni bangsongki tumean nasida. [20†]

¹⁰I ma songgop tu nasida, balos ni hajungkatonnasida, ala mangarehei nasida, jala manenganenga dompak bangso ni Jahowa Zebaot.

¹¹Songkal ma Jahowa idaon nasida, ai rasiponna ma nasa debata sileban di tano on, gabe marsomba tu ibana ganup sian ingananna, sude angka pulo ni bangso parbegu. [21†] III.

¹²Nang hamu ale * halak Kus, ingkon bunuon ni podangku do hamu. [22†]

¹³Dipatoltol ibana huhut tanganna dompak utara, jala agoonna ma Assur, jala bahenonna Ninive gabe halongonan, hasang songon parhorsihan. [23†]

¹⁴Jadi * mangulon ma di tongatongana, angka parduan, sude angka binatang harangan, + nang sipauk, nang tanggiling marborngini di angka galapangnasida. Tarbege do suara parendeon di bagasan pandiloan, pangulangan di lobulobu; ai nunga diloha ibana parhau ares. [24†]

¹⁵I ma huta na riburan, na nalom maringanan, na mandok di bagasan rohana: * Ahu do bongkai dungkon ni ahu ndang adong! Songon dia do pangulangna disi, gabe pangulonan ni angka binatang panoro! Ganup na mamolus sian i bursikanna do, topaponna tanganna. [25†]